استايل هدوم رجل برج العذراء

بقلمأنجي سليمان فيبرج العذراء visibility734

 شخص ذكي جدا، مهموم ومهووس بالنظام والتفاصيل، طول الوقت هو في حالة تركيز وذهنه مشغول بكل حاجة، وعلى اد ما بيحاول يحاوط نفسه بالهدوء والسلام، الا انه دايما مشغول بأنه يبقى صاحب تأثير ايجابي في العالم اللي حواليه، اما طريقته المفضله في الهروب من الافكار والتفاصيل اللي بتلف في عقله طول الوقت فهي انه يغرق نفسه في الشغل او في مساعده اللي حواليه سواء اهله او اصحابه او حبيبته او حتى محتمعه زي الجمعيات الخيريه او الاعمال التطوعية، ونتيجه اهتمامه بكل اللي بيحصل ومحاولته ان ياخد باله من اللي حواليه ويساعدهم طول الوقت بيخليه يزعل اوي ويلوم نفسه لو حصلت اي غلطة او موقف هو مكانش حاسبله، وبيخليه كمان صاحب مباديء واخلاق عالية جدا وصاحب شخصية ساحرة ومؤثرة، وبالتأكيد اسلوب الحياة ده بينعكس على استايل هدوم رجل برج العذراء

البساطة والحيادية اول اختياراته

رجل برج العذراء بيتمنى لو كان كل اللبس في الدنيا ينيفورم، اولا لانه بيعشق النظام وبيتمنى لو يبقى الدولاب متقسم اطقم على حسب الايام ويكررها بالشكل ده طول الوقت، ثانيا لأن الوقت عنده مهم جدا جدا ومش بيحب يضيع وقت كتير في اختيار الهدوم، عشان كده بيرتاح اوي في الهدوم المحايدة من ناحية كل شيء بمعنى انه مثلا بيختار الموديلات اللي تنفع كاجوال وكلاسيك والالوان اللي ممكن تتلبس بالصبح او بالليل وهكذا المهم انه يكون مهندم ولايق على الحدث اللي هو فيه لكن مش بيفرق معاه اوي انه يعكس اي انطباعات من خلال اللبس او المظهر.

هدوم رجل برج العذراء
هدوم رجل برج العذراء

القمصان والفورمال

بالنسبة لرجل برج العذراء اغلب الهدوم بتبقى قمصان وبيحب الالوان الفاتحة بشكل عام مش شرط تكون باستيلات بس بالنسبة له درجات الرمادي والبيج والابيض واللبني من اجمل الحاجات اللي بتريحه في اختيار لبسه وهو خارج عشان بيليقوا على كل المناسبات، اما من ناحية الموديلات فهو بيفضل الموديل الكلاسيك مش بيحب الضيق المجسم ولا بيحب الواسع الاوفرسايز دايما بيدور على التفصيلة الكلاسيكية، اما لو حب يغير شوية يبقى ممكن يختار قميص مقلم بس مش ملون كتير ولا كاجوال، يعني  لو مثلا ابيض مقلم لبني او رمادي يبقى بالنسبة له اختيار ممتاز

هدوم رجل برج العذراء
هدوم رجل برج العذراء

البنطلونات

اختيارات رجل برج العذراء في البنطلونات سواء فورمال او كاجوال دايما عملية جدا يعني بيحب يختار الخامات اللي بتتحمل، عشان كده الجينز بالنسبة له مهم جدا وبيحب يختار موديلات واسعة من فوق شوية او على الاقل مريحة عشان تساعده على الحركة والشغل والحركة طول اليوم اللي مش حينفع معاها ابدا بنطلون ضيق يحسسه بالتقييد وعدم الراحة، وبالنسبة لغير الجينز فهو مش بيحب الاقمشة الناعمة او الفخمة اوي اللي مش بتتحمل الحركة وبيفض الجبردين مثلا او البنطلونات الرياضية، وبفي كل الاحوال هو برضه بيطبق نظرية الالوان المحايدة وبيختار بين الكاكي والزيتي والكحلي والرمادي والاسود غير طبعا الحينز الازرق

هدوم رجل برج العذراء
هدوم رجل برج العذراء

الكاجوال

حبه للبساطة بيخلي اختياراته دايما متوقعه وعشان كده رجل برج العذراء لما بيحب يلبس كاجوال بيختار الشكل النعتاد من الكاجوال وهو التي شيرت البولو المعتاد، ومش بيغير طبعه من ناحية الالوان المحايدة بس ممكن يلبس من درجات الاحمر او النبيتي في هدومه الكاجوال على عكس الفورمال كنوع من التغيير والاحساس بالتخلص من قيود الفورمال والشغل.

هدوم رجل برج العذراء
هدوم رجل برج العذراء

الاحذية

رجل برج العذراء بيفضل الاحذية العملية المريحة اللي تساعده على العمل والشغل والحركة طول الوقت، عشان كده النعل العريض والشوز الجلد الطبيعي او الشمواه من اختياراته الاساسية في الشوزات، ولأنه مش من هواه التغيير فهو ممكن يلبس نفس الشوز على كل الهدوم لدرجة انه ممكن يلبس شوز بني ونعله اسود عشان يبقى محايد مع الهدوم اللي بتتلبس مع البني او الهدوم اللي بتتلبس مع اسود، المهم في الاخر ان الشوز يقضي الوظيفة المطلوبه منه من ناحية الراحة والتحمل

هدوم رجل برج العذراء
هدوم رجل برج العذراء

بشكل عام رجل برج العذراء شخصية عملية جدا وبسمسل للبساطة وبيكره التكلف والتصنع والمظهر المبالغ فيه، بصرف النظر بقى عن الاذواق والفروق الشخصية بين الناس لكن بشكل عام دي كانت الصفات المشتركة المميزة لاستايل هدوم رجل برج العذراء ومن هنا تقدروا تتعرفوا على كل شيء يخص صفات برج العذراء