استايل هدوم رجل برج السرطان

بقلمأنجي سليمان فيبرج السرطان visibility129

شخص لطيف ومحبوب وعاطفي جدا، بيقدس العائلة وبيهتم اوي بعلاقته العائلية، حنين جدا خصوصا على نساء عائلته امه واخواته وزوجته وبناته، لكن لأنه مليا مشاعر فهو بيخاف على مشاعره دي وبيخبيها تحت قشرة وهمية من الصلابة، فمش من الساهل انه يعبر عن مشاعره وغالبا بيحيط نفسه بهالة من الغموض والصمت وبيكتم جوه نفسه، اما اسوأ جانب من شخصيته فبيظهر لو حد جرحه لأنه مش بينسى الاساءة بسهولة ومش بيسامح في الجرح ابدا، وده بيظهر كمان على طريقه اختيار هدومه يعني صفاته بتنعكس على استايل هدوم رجل برج السرطان

اختياراته وراها رسايل

ده مفتاح اختيار رجل برج السرطان لهدومه، لأنه غالبا بيلبس هدومه عشان حد معين سواء من ناحية الارضاء او انه يجذب النظر او انه يلفت انتباه حد عن طريق الهدوم اللي هو لابسها، اما لو بنتكلم عن الشغل مثلا اوالدراسة بمعنى ان مش الغرض منهم لفت النظر فهو برضه بيختار هدوم تدي رسالة معينة وهي الالتزام والاحترام يعني مثلا لو حيلبس بلوفر يحب انه يلبس تحته قميص عشان يبان شكله فورمال، اما الجزء الغامض منه فبيظهر في اختيارات الالوان بتاعته اللي هي عبارة عن مجموعة كبيرة من الباستيلات والبيج وممكن يدخل معاهم شوية ابيض، لكن اللبني الفاتح والباستاج هما اكتر الالوان اللي بيلبسها.

استايل هدوم رجل برج السرطان
استايل هدوم رجل برج السرطان

اللبس المريح من اهم الاولويات

رجل برج السرطان مش بيحب الهدوم الضيقة او اللي بتكتف وتقييد، بيحب يبقى مرتاح في لبسه ولأنه غالبا بيهتم بجسمه وبيحب يبان رياضي فهو بيحاول يلبس هدوم تظهر عضلاته بس مش عن طريق انها تكون ضيقة بالعكس بيحب يلبس الهدوم الواسعة اللي بتتحرك على الجسم لكنه برضه مش بيحب الباجي والفضفاض اوي يعني بيحب الهدوم الواسعة بطريقة جذابة، وده برضه بيظهر في الاختيارات اللي اغلبها بيكون قطن عشان يدي اكتر احساس بالراحة وده بيخليه واقف على خيط رفيع بين الاناقة والغرور اللي هو في الحقيقة مش من صفات رجل برج السرطان

استايل هدوم رجل برج السرطان
استايل هدوم رجل برج السرطان

بالنسبة للقمصان

رجل برج السرطان بيفضل لبس القمصان اكتر من التيشيرتات وبيحب يلبس القميص بداخل البنطلون ومعاها حزام بس عشان هو كمان بيحب يبان بطريقة عسرية وشبابية وبالنسباله الطريقة دي في اللبس بعيدة عن الكجوال فهو بيضطر يلبس القميص من بره بس برضه مش بيتخلى عن استايله الخاص وبيهرب من الهدوم الضيقة على قد ما يقدر، عشان كده بينسق القمصان مع بنطلونات واسعة نسبيا وبيختار الاقمشة الناعمة الفضفاضة شوية زي الاقطان والكتان والصوف وبيهتم اوي ان تفصيلة البنطلون تبقى مريحة من منطقة البطن عشان بالنسبة له الواسع اوي والضيق اوي مرفوضين

استايل هدوم رجل برج السرطان
استايل هدوم رجل برج السرطان

الفورمال

من الاختيارات المريحة بشكل عام لرجل السرطان عشان بيحب يظهر جانب الالتزام في شخصيته على الاقل في العمل وفي حياته الخاصة، ولأن زي ما اتفقنا عائلته وشريكته مهمين اوي في حياته فهو بيختار الطقم والمناسبة الخاصة بعناية وبيظهر اهتمامه ورومانسيته من خلال لبسه عشان يدي انطباع الدفء والاحترام، وده بيخلي عنده مجموعة من البدل اللي الوانها سوفت زي الرمادي الفاتح والازرق الناعم عشان بيحتاجهم في المناسبات الخاصة دي ، ومع انه مش بيحب لبس الكرافت وبيحاول يتهرب من لبسها علي اد ما يقدر الا انه لما بيحس ان المناسبة لازم لها كرافته فهو بيلبسها بي بيختار لون ساده او نقشه بسيطة جدا وبيبعد على اد ما يقدر عن الالوان الفاقعة

استايل هدوم رجل برج السرطان
استايل هدوم رجل برج السرطان

الاحذية

رجل برج السرطان مش بيقيد نفسه بموديل احذية معين لكنه سواء بيحب الكاجوال او الكلاسيك فهو مش من هواة لبس الكوتشي الرياضي لكن ممكن يلبس الاسنيكرز الخفيفة، اما من ناحية الالوان فهو بيختار الالوان على حسب الملابس يعني مش بيقيد نفسه في الاسود والبني وبس، لكن لأن عموما بيحاول يلتزم بالمظهر الجاد فبتكون اختاراته من الاحذية الكلاسيكية

استايل هدوم رجل برج السرطان
استايل هدوم رجل برج السرطان

تقدروا تشفوا من هنا دليل كامل عن كل ما يخص برج السرطان، وبالنسبة لموضوع الملابس فهي بالتأكيد بتفرق من شخص للتاني على حسسب الذوق وشكل الجسم وعوامل تانية كتير لكن بشكل عام دي كانت السمات العامة اللي بتميز استايل هدوم رجل برج السرطان