نصائح وافكار إزاي تلبسي اللون الأبيض صح

اللون الابيض بيعتبر من أحلى الألوان اللي ممكن تلبسيها، لأن سهل تنسيقه وبيقدر في كل مرة يخليكي تعملي لوك شيك وإليجانت بدرجة كبيرة لمجرد انك بس لبستي لون أبيض، كله فخامة وأنوثة والا ماكنش يبقى لون فستان الفرح اللي بتحلم بيه أي بنت، بس المهم انك تلبسيه ببساطة وتعرفي ازاى تلبسيه من غير زيادات تخليه يبان أوفر ومش حلو، او يبقى كأنه “لوك عروسة” بزيادة، في المقال ده هنقولك نصائح وافكار إزاي تلبسي اللون الأبيض صح

نصائح وافكار إزاي تلبسي اللون الأبيض صح

ابعدي عن الدانتيل

اللون الأبيض مع الخامات الناعمة زي الدانتيل والجبير بيبقى شكلهم حلو جدا مع بعض، لكن الخامات دي بتخلى الابيض يبان شكله سوارية ورومانسي اكتر عشان كده لو عايزة تعتمدي على اللون الابيض في خروجاتك اليومية او تعملي بيه لوك نهاري مناسب للشغل والخروجات يبقى ابعدي عن الخامات دي و استبدليها بخامات تانية زي الشيفون والكريب والقطن وغيرها، وممكن كمان تعتمدي على اللوك الرياضي أكتر.

جربي ستايلات بسيطة

جربي تلبسي الابيض في قطع تعملي بيها ستايلات بسيطة من غير تفاصيل كتيرة، يفضل انها تكون سادة مع اكسسوار بسيط جدا زى حلق أو سلسلة او حتى خاتم مناسب وبس.

البسي قطع بتفاصيل واضحة

جربي تلبسي قطعة بخطوط وقصات واضحة و باينة في تفصيلتها عشان تعملى لوك جرئ وقوي، لأن غالبا اللون الابيض مع العروسة بالذات بيميل انه يكون في الفساتين اللي قصاتها ناعمة وانسيابية ، عشان كده البسي الابيض في ستايلات بخطوط جريئة أو ستايلات رياضية أكتر.

العبي بالخامات

طريقة تانية تعرفي بيها ازاي تلبسي اللون الابيض صح هي انك تنوعي في الخامات الموجودة في اللوك بتاعك، جربي تلبسي بلوزة من الحرير أو الشيفون مع بليزر على جينز أبيض مثلا. وكمان ممكن تجربي ستايلات من التريكو.

اكسري الابيض بلون تاني

نصيحة تانية مهمة جدا هى انك تجربي ان اللوك بتاعك مايبقاش بالكامل من اللون الابيض وكمان ممكن تجربي تكسري الابيض بلون تاني واضح وجرئ زي الازرق أو الأحمر ، أو بحاجة منقوشة ممكن تكون في حزام او شوز أو شنطة او بليزر. لكن مهم انك ماتزوديش عن لون واحد مع الابيض عشان تتجنبي ان اللوك بتاعك يكون مبهرج او غير متناسق.