إزاي تنضفي فرشاة وإكسسوارات الشعر بطرق بسيطة

آية حسان
آية حسان
1095

طريقة تنظيف فرشاة الشعر الصحيحة مهم جدا انك تكونى عرفاها لأن فرشاة أو مشط الشعر وحتى التوك والإكسسوارات لما تكون فيها مشكلة أو مش نضيفة ده بيسبب مشاكل لشعرك. يعني مثلا ماينفعش تكوني غاسله شعرك و مظبطاه شامبو وبلسم وحمام كريم وغيره و بعدين تروحي تسرحيه بفرشاة شعر متربة أو مش نضيفة وتضيعي كل المجهود اللي عملتيه في انك تغسلي شعرك كويس عشان يبقى نضيف وصحي، عشان كده اهتمينا في المقال ده اننا نعرفك على طرق مختلفة تقدري تنضفي بيها الفرشاة أو المشط اللي بتستخدميه لشعرك كل يوم، خلينا نبدأ على طول

إزاي تنضفي فرشاة وإكسسوارات الشعر بطرق بسيطة

في الأول خلينا نتكلم عن أنواع الأمشاط و الفرش المختلفة اللي ممكن تستخدميها لتصفيف شعرك

المشط البلاستيك :

بيعتبر من أكتر الأنواع المشهرة والشعبية جدا و بيستخدمها تقريبا كل الناس، لكن احنا مابننصحش باستخدامها لأنها بتكون نوع من الكهرباء الاستاتيكية أو الثابتة اللي بتتسبب في ان الشعر يكون هايش وجاف، عشان كده بننصح بانك تستبدلي البلاستيك بالمشط أو الفرشاة اللي فيها أسنان متغطية بالنايلون .

المشط البلاستيك
المشط البلاستيك

المشط أو الفرشاة الخشب:

لطيفة على فروة الرأس وعلى الشعر و بيساعد المشط الخشب في انه يعمل ترطيب طبيعي لشعرك وده لأنه بيساعد في توزيع الزيوت الطبيعية اللي بتفرزها فروة الرأس من الجذور للأطراف وكمان بيساعدوا في تنشيط الدورة الدموية في فروة الرأس وده بالتالي بيعزز نمو الشعر و المشط الخشب بينتج كمية أقل بكتير من الكهرباء الثابتة اللي بتحصل نتيجة احتكاك المشط بشعرك و بالتالي شعرك مابيبقاش هايش او جاف.

المشط الخشب
المشط الخشب

فرشاة الشعر المدورة

فرش الشعر المستديرة بيكون ليها أسنان وشعيرات صغيرة في كل مكان على طول جسم الفرشاة وبتستخدم في عمل تسريحات الشعر الكيرلي وبتكون موجودة بأنواع وأحجام مختلفة بسهولة.

الفرشاة المدورة
الفرشاة المدورة

فرشاة الشعر بالنهايات المستديرة

بتكون عادة مسطحة ، كبيرة ، ولها قاعدة واسعة و مصنوعة إما من الخشب أو البلاستيك أو المواد الخزفية وبتكون مثالية لشعر كثيف وطويل ومستقيم.

الفرشاة المسننة
الفرشاة المسننة


طريقة تنظيف فرشاة الشعر

خلينا نبدأ مع الأدوات الأساسية اللي هتحتاجيها للتنظيف

خلة أسنان.

فرشاة أسنان.

طبق عميق كبير.

شامبو أوبلسم شعر.

فوطة ناشفة.

سيشوار شعر (اختياري)

مقص (اختياري)

طريقة التنضيف

1- استخدمي صوابعك في إزالة أى شعر في المشط أو الفرشاة واستخدمى خلة الأسنان عشان تشيلي التجمعات القديمة والصعبة، وممكن برده تستخدمى المقص.

2- ابدأي جهزي محلول التنظيف، املي طبق عميق بمياة دافية مع كمية قليلة من الشامبو أو أي منظف تفضليه و اخلطيهم ببعض كويس.

3- ابدأى التنظيف بانك تنقعي المشط أو الفرشاة لمدة 15 دقيقة في محلول التنظيف اللي جهزناه، بعد كده باستخدام فرشاة الاسنان ادعكي فرشاة الشعر قريب من جذور الأسنان وباستخدام قماشة قطنية أو فوطة قديمة جففي الفرشاة أو المشط.

4- بعد ما تتخلصي من الرطوبة “عشان ماتتسببش في تكون أي بكتيريا أو ميكروبات” اشطفي الفرشاة أو المشط مرة تانية كويس أوي، وبعد كده جففيها تاني باستخدام فوطة جديدية غير اللي استخدمتيها أول مرة و سيبيها تنشف طول الليل في مكان جيد التهوية وممكن تستخدمي السيشوار مرة تانية عليها.

حاولى تعملي خطوات التنظيف الأساسية دي مرة كل أسبوع علشان نضافة فروة رأسك مهمة جدا، ولو ماكنتيش نظفتي الأدوات اللي بتستخدميها على شعرك من فترة طويلة يبقى لازم تعملي تنظيف عميق وهنقولك خطواته دلوقتي.

إزاي تعملي التنظيف العميق؟

الأدوات اللازمة للتنظيف العميق:

كحول للتنظيف أو خل أبيض أو خل تفاح.

خلة أسنان.

طبق عميق.

فوطة للتجفيف.

سيشوار شعر.

مقص.

الخطوات :

هي نفس خطوات عملية التنظيف الأساسية لكن هتستبدلي الشامبو بكمية من الخل بمقدار مساوي لمقدار المياة اللي هتستخدميه ، وهتسيبي المشط أو الفرشاة في الخليط ده على الأقل لمدة من 15 لـ 20 دقيقة.

ملاحظة مهمة:

لو كنتى هتنظفي مشط خشب أو فرشاة مسننة ماتنقعيهومش في المياة بشكل كامل، خلى الأسنان بس هي اللى تلامس المياة لدقايق بسيطة و نظفيهم وجفيفهم بالراحة عشان مايتكسروش أو يبوظوا.

طرق طبيعية لتنظيف فرشاة أو مشط الشعر

1- خليط البيكنج صودا مع الخل:

اخلطي البيكنج صودا مع الخل والمياة بنسبة 1 لـ 4 وانقعى المشط أو الفرشاة فيهم عشان تشيلي أى أتربة بعمق وبسرعة، لكن الطريقة دى مابتنفعش للمشط أو الفرشاة الخشب.

البيكنج صودا مع الخل
البيكنج صودا مع الخل

الأمونيا

ممكن كمان تستخدمي خليط الأمونيا “أو النشادر” للتنظيف، اخلطي الأمونيا مع مياة فاترة بنسبة 1 لـ 4 لكن ماتستخدميش الأمونيا مع الفرشاة الضعيفة أو اللي من مواد حساسة واتأكدى انك شطفتي الفرشاة أو المشط وجففتيه كويس بعد التنظيف عشان فروة رأسك ماتتعرضش لتأثير الأمونيا.

الأمونيا
الأمونيا

المياة المغلية مع مياة الأكسجين:

اخلطى المياة المغلية مع مياة الأكسجين بنسبة 4 لـ 1 لتنظيف الفرشاة أو المشط، الطريقة دي بتساعدك تتخلصي من أي أتربة وبكتيريا ممكن تكون موجودة في المشط أو الفرشاة بتاعتك وكمان هتساعدك تعقميهم.

مياة مغلية

مقالات متعلقه

تأثير المية الساقعة والسخنة على الشعر

تأثير المية الساقعة والسخنة على الشعر

نصايح ليلية لجمالك باستخدام العسل

نصايح ليلية لجمالك باستخدام العسل

افردي شعرك بالنشا

افردي شعرك بالنشا