طريقة عمل حلوى تشوروز الاسبانية بالخطوات والفيديو

بقلمريهام محمود فيحلويات visibility1287

التشوروز هو واحد من اشهر انواع الحلويات الاسبانية اللذيذة جدا, وتقريبا كل اللي يسافر اسبانيا لازم اول حاجة بيعملها انه ياكل التشوروز مع صوص الشوكولاتة لانه معروف جدا بجمال طعمه, والنهاردة هنخليكي تدوقيه من غير ما تسافري اسبانيا, وهنقول لكل بنات حوا طريقة عمل حلوى تشوروز الاسبانية في البيت بنفسك.

طريقة عمل حلوى تشوروز الاسبانية:

الكمية دي هتعمل تقريبا من 8 – 12 واحدة تشوروز.

وقت التحضير الكلي تقريبا 40 دقيقة.

مكونات عجينة التشوروز:

1 كوباية مية.

½ كوباية زبدة او سمنة.

¼ معلقة صغير ملح.

1 كوباية دقيق.

3 بيضات مخفوقين.

زيت نباتي للقلي.

¼ كوباية سكر.

¼ معلقة صغيرة قرفة “اختياري”.

طريقة عمل حلوى تشوروز
طريقة عمل حلوى تشوروز

مكونات صوص الشوكولاتة:

1 معلقة كبيرة نشا.

2 كوباية لبن.

113 جرام شوكولاتة غامقة متقطعة “تقريبا 8 معالق كبيرة”.

¼ كوباية سكر.

طريقة عمل حلوى تشوروز
طريقة عمل حلوى تشوروز

طريقة التحضير:

 1- لعمل عجينة التشوروز اخلطي كوباية المية مع الزبدة او السمنة والملح في طاسة او حلة وحطيهم على نار عالية لحد ما يغلوا, وباستخدام معلقة خشب ابدأي حطي الدقيق بالتدريج وخفضي حرارة النار, وقلبي بقوة لحد ما العجينة تبقى على شكل كورة, تقريبا لمدة دقيقة, ارفعي العجينة من على النار, ومع التقليب المستمر ضيفي البيض بالتدريج للعجينة.

2- لعمل صوص الشوكولاتة, في طبق صغير دوبي النشا في كوباية لبن, وكوباية اللبن اللي باقية عندنا ضيفي عليها الشوكولاتة وحطيها على نار متوسطة وافضلي قلبي فيها لحد ما الشوكولاتة تدوب, ضيفي لها النشا اللي دوبتيه والسكر, قللي حرارة النار لاقل حاجة وقلبيها باستمرار لحد ما الشوكولاتة تبقى سميكة, هتاخد حوالي 5 دقايق, ولو حسيتي بعد 5 دقايق ان الشوكولاتة مش سميكة كفاية ممكن تضيفي لها شوية كمان من النشا لحد ما توصلي للسمك المناسب, ارفعي صوص الشوكولاتة من على النار واضربيه بمضرب يدوي سلك لحد ما يبقى ناعم معاكي, واحفظيه في مكان دافي.

3- حطي طاسه فيها الزيت للقلي على نار متوسطة, وسيبيه لحد ما يسخن, وحضري طبق صغير اخلطي فيه سكر مع قرفة.

4- اثناء ما الزيت بيسخن, حطي عجينة التشوروز في كيس حلويات, اضغطي على الكيس ونزلي حوالي 10 سم من العجينة في الزيت السخن, كرري الضغط على العجينة واقلي من 3 – 4 شرايح كل مرة, وقلبيهم باستمرار في الزيت, ولما يبقى لونها دهبي اقلبيها على الجنب التاني, ولما تاخد كلها اللون الدهبي حوالي دقيقتين لكل جنب طلعيها من الزيت على ورق مطبخ عشان يمتص الزيت الزيادة.

5- لما التشوروز يبرد شوية وتقدري تتعاملي معاه, غمسيه في خليط السكر والقرفة “في اسبانيا بيغمسوه في السكر بس”, حسب اختيارك لو بتحبي نكهة القرفة, ممكن تضيفيها للسكر, لو مش بتفضليها استخدمي السكر لوحده.

6- صبي الشوكولاتة في طبق صغير او فنجان, وقدمي التشوروز وهو دافي مع صوص الشوكولاتة.

طريقة عمل حلوى تشوروز
طريقة عمل حلوى تشوروز

الطريقة بالفيديو:

طريقة عمل الكرواسون بالخطوات والفيديو

طريقة عمل الكرواسون