5 قواعد بسيطة للعناية بالبشرة في فترة المراهقة متستغنيش عنهم

بقلمريهام محمود فيبشرة visibility841

العناية بالبشرة ساعات كتير بتكون محيرة, لان منتجات العناية بالبشرة كتيرة جدا ومش بنقدر بنعرف ايه بالظبط اللي ممكن يناسب بشرتنا, لان كل بشرة بتختلف عن التانية, لكن البشرة في فترة المراهقة بشكل خاص بتعاني من مشاكل كتير لان تغير الهرمونات في الفترة دي بيأثر على البشرة بشكل سلبي, عشان كده النهاردة هنقولك 5 قواعد بسيطة المفروض تمشي عليهم في العناية بالبشرة في فترة المراهقة عشان تحافظي على بشرتك صحية على المدى الطويل.

قبل ما نعرف قواعد العناية هنقولك ليه فترة المراهقة بالذات بيكون فيها مشاكل كتير في البشرة, حسب كلام الخبراء والمتخصصين ان في الفترة دي بيرتفع مستويات هرمون التستوستيرون, وده بيسبب زيادة افراز الدهون في البشرة اللي بدورها بتسبب انسداد المسام وظهور البثور والحبوب, وكمان بيكون في زيادة في الكيراتين “وده بروتين بيحمي طبقات الجلد الخارجية” لما بيزيد بيخلي الجلد سميك اكتر وده كمان ممكن يسبب في انسداد المسام وظهور الحبوب.

العناية بالبشرة في فترة المراهقة
العناية بالبشرة في فترة المراهقة

العناية بالبشرة في فترة المراهقة:

1- اعرفي نوع بشرتك:

اول حاجة لازم تعمليها هو انك تعرفي نوع بشرتك عشان تعرفي تتعاملي معاها بشكل صح, وتختاري نظام العناية بالبشرة المناسب, وهتقدري تعرفي المنتجات المناسبة ليكي من غير ما تحتاري.

وزي ما قولنا قبل كده ان البشرة بتتقسم لكذا نوع هي جافة, مختلطة, دهنية, عادية, حساسة, معرضة لحب الشباب..تقدروا تشوفوا من هنا ازاي تعرفي نوع بشرتك, لكن لازم كمان تحطي في اعتبارك ان بشرتك ممكن تكون خليط من كل انواع البشرة وبتتغير خلال السنة في كل موسم يعني بشرتك ممكن تبقى دهنية في الصيف وتتغير في الشتا تبقى جافة او مختلطة, وفي الحالة دي هتغيري المنتجات حسب حالة بشرتك, واهم 3 منتجات اساسية لازم تختاريهم حسب نوع بشرتك هما الغسول, التونر, والمرطب.

العناية بالبشرة في فترة المراهقة
العناية بالبشرة في فترة المراهقة

2- استخدام الغسول الصبح وبالليل:

تعتبر اهم خطوة في العناية بالبشرة هي الغسول اللي بيساعد على ازالة الزيوت الزيادة والشوائب من البشرة, والخبراء والمتخصصين بينصحوا باستخدام انواع الغسول او الصابون المضاد للبكتيريا, والكريمات المضادة . للبكتيريا, والمرطبات الخالية من الزيوت.. تقدري تشوفي من هنا انواع الغسول المناسبة لكل نوع بشرة.

اغسلي البشرة الصبح بالغسول المناسب الجل او الرغوي, وبالليل اغسلي البشرة غسيل مزدوج من خلال غسلها مرتين, ده هيساعد انه يزيل اي اثار مكياج وعامل الحماية من الشمس والاتربة والزيوت والشوائب, ولو الغسول لوحده مش كافي ممكن تعملي تنضيف بالزيت الاول وبعدين تستخدمي الغسول الرغوي او الغسول المائي, ويمكن كتير يفكروا انه مش منطقي انك تستخدمي الزيت على البشرة الدهنية, لكن الحقيقة ان الزيت بيجذب الزيت عشان كده التنضيف بالزيت هينضف بشرتك من الزيوت الزيادة بشكل اكتر فعالية.

نصايح للتنضيف: استخدمي دايما مية دافية لغسل البشرة, وبعدها مية باردة عشان تقفلي المسام, وبعده الغسول وتجفيف البشرة استخدمي المرطب مباشرة,  والترطيب مهم جدا خلال فترة الليل بشكل خاص حتى لو بشرتك دهنية او معرضة لحب الشباب, لان البشرة بتفقد كمية اكبر من الرطوبة خلال فترة الليل اكتر من اي وقت تاني.

المكونات اللي المفروض تدوري عليها: لما تيجي تشتري اي منتج من الصيدلية بصي على المكونات بتاعته, اختاري المنتجات اللي بيكون فيها طين عشان تساعد على ازالة زيوت البشرة, وبنزويل البروكسيد, وحمض الساليسيليك و AHAs اللي بتساعد على تنضيف المسام بعمق, وزيت شجرة الشاي وعشبة بندق الساحرة “Witch hazel”, اللي يعتبروا مضادات للجراثيم بشكل طبيعي.

الحاجات اللي المفروض تتجنبيها: الاكلات الغنية بالدهون, اتجنبي اللبن البقري, الكريمات الغنية والتقيلة “منتجات الالبان”.

العناية بالبشرة في فترة المراهقة
العناية بالبشرة في فترة المراهقة

3- التقشير بانتظام:

نتيجة لارتفاعات الهرمونية اللي بتحصل في الفترة دي وبتأدي لانسداد المسام فمهم جدا انك تحافظي على تقشير البشرة بانتظام, والمتخصصين بينصحوا تستخدمي منتجات تقشير يكون داخل فيها طين, والمنتجات اللي بتحتوب على خصائص مطهرة وقابضة, او المقشرات اللي بتحتوي على حمض الساليسيليك و AHAs لانها بتساعد على تنضيف المسام بعمق.

اتجنبي التقشير اكتر من مرتين لتلات مرات في الاسبوع, لان التقشير الزيادة ممكن يتلف البشرة, وخليكي حذرة من استخدام المقشرات اللي بتحتوي على حبيبات لو قشرتي بيها اكتر من اللازم ده ممكن يخلي حب الشباب اسوأ, عشان كده لازم تتعاملي مع بشرتك بالراحة من غير فرك قوي, دايما اعملي تقشير بالراحة في حركات دائرية خفيفة هيكون كافي لازالة الجلد الميت وتنضيف المسام.

طريقة مقشر طبيعي: اخلطي1/2 كوباية مية سخنة مع 1/3 كوباية شوفان وحطيه على النار يستوي, وبعدين ارفعيه من على النار وسيبيه يبرد وضيفي له 1 معلقة كبيرة زبادي, و 1 معلقة كبيرة عسل, و 1 معلقة صغيرة كركم, وبياض بيضة, قلبي المكونات كلها مع بعض كويس, حطي طبقى رقيقة من الخليط على البشرة وسيبيه لمدة من 10 – 15 دقيقة وبعدين اغسليه بمية دافية.. ممكن تشوفي من هنا وصفات طبيعية لتقشير الجلد.

العناية بالبشرة في فترة المراهقة
العناية بالبشرة في فترة المراهقة

4- متضغطيش على البثور:

زي ما قولنا ان الزيوت الزيادة لما بتتكون بتسد المسام وده بيسبب ظهور الحبوب والبثور, واكبر غلطة ممكن تعمليها مع البثور انك تضغطي عليها وتتخيلي انها كده هتخف اسرع لكن بالعكس انتي هتخلي الزيوت والبكتيريا تنتشر اكتر في البشرة في اماكن تانية, وهتسبب التهاب, ده غير ان مكانها هيسيب بقعة او ندبة, واللي هتبقى مشكلة اصعب في التخلص منها, حاولي انك تتجنبي تماما الضغط على الحبوب لانها هتزود المشكلة, ده غير ان البكتيريا ممكن تتنقل لايدك وتنقليها لاماكن تانية في بشرتك.

العناية بالبشرة في فترة المراهقة
العناية بالبشرة في فترة المراهقة

5- غذي بشرتك من جوه:

حاولي تبعدي عن منتجات الالبان لانه ثبت انها بتخلي حب الشباب اسوأ بسبب بروتينات الحليب مش دهون الحليب عشان كده ممكن يكون اختيار اللبن قليل الدسم افضل للبشرة, وبدل اللبن ممكن تعتمدي على بدائل تانية زي حليب اللوز, حليب الشوفان, حاولي تبعدي كمان عن الاكلات السكرية والنشوية, لانها ممكن تزود المشكلة, اعتمدي على الاطعمة الغنية بالدهون الصحية زي الافوكادو, المكسرات, السلمون.. تقدري تشوفي من هنا 4 طرق تعملي بيهم اللبن بمكونات نباتية من البيت.

العناية بالبشرة في فترة المراهقة
العناية بالبشرة في فترة المراهقة

5 وصفات طبيعية للبشرة في فترة المراهقة:

1- ماسك الفراولة:

اخلطي ¼ كوباية فراولة مهروسة مع 1 معلقة كبيرة ارز مطحون و 3 معالق كبيرة زبادي, قلبي المكونات مع بعض كويس, افردي الماسك على البشرة وسيبيه لمدة 20 دقيقة وبعدين اغسليه بمية باردة.

الماسك ده مناسب تقريبا لكل انواع البشرة, بيساعد على تنضيف البشرة والمسام بشكل طبيعي, وبيشد الجلد, بيساعد على تقشير خلايا البشرة الميتة.

2- ماسك الكربوناتو:

اخلطي 2 معلقة كبيرة كربوناتو مع المية لحد ما يتكون عندك عجينة, افرديها على البشرة وسيبيها لمدة 20 دقيقة, وبعدين اغسلي البشرة بالمية.

الكربوناتو بتقلل من ظهور حب الشباب بشكل فعال جدا وفي نفس الوقت مش بتسبب ضرر للبشرة على عكس المنتجات الكيميائية المضادة لحب الشباب, ماسك الكربوناتو هيساعدك على التخلص من حب الشباب.

3- ماسك الافوكادو:

اخلطي 2 معلقة كبيرة عسل مع 2 معلقة كبيرة افوكادو و 2 معلقة كبيرة من زيت الزيتون, قلبيهم مع بعض وافردي الخليط على البشرة وسيبيه من 15 – 20 دقيقة وبعدين اغسليه بالمية.

زيت الزيتون بيساعد على ترطيب وتغذية البشرة, والافوكادو مثالي جدا للبشرة الحساسة لانه بيساعد على تهدئة الالتهاب, والعسل بيحتوي على مضادات البكتيريا والجراثيم اللي بتساعد في تنضيف البشرة ومنع حب الشباب.

4- ماسك الموز:

اخلطي ثمرة موز مهروسة مع كام نقطة من عصير الليمون او البرتقان و 1 معلقة كبيرة عسل, قلبي المكونات, افردي الخليط على البشرة وسيبيه لمدة 15 دقيقة وبعدين اغسليه بمية باردة.

الموز غني بالعناصر اللي هتساعد على تغذية البشرة, والعسل زي ما قولنا فوق انه بيحتوي على مضادات للبكتيريا اللي بتساعد على تقليل مشاكل الجلد بشكل عام.

5- ماسك للرؤوس السودا:

اخلطي 1 معلقة كبيرة سكر مع كام نقطة من عصير الليمون, افردي الخليط على البشرة واعملي بيه مساج خفيف في حركات دائرية لمدة دقايق وركزي على الاماكن اللي فيها رؤوس سودا, وبعدين سيبيه على البشرة لحد ما ينشف وبعدها اغسليه بالمية.

العناية بالبشرة في فترة المراهقة
العناية بالبشرة في فترة المراهقة

10 غلطات في العناية بالبشرة بتزود مشكلة حب الشباب وبتخليه اسوأ .. وازاي تتجنبيها

غلطات في العناية بالبشرة
غلطات في العناية بالبشرة