اضرار وفوايد الكافيين وازاي تستفيدي منه

الكافيين مادة من المواد المنشطة والمنبهة للجهاز العصبي، المادة دي موجودة في بعض المشروبات زي الشاي والقهوة والكولا ومشروبات الطاقة واحيانا الادوية، ومحدش يقدر ينكر اهميه كل المشروبات دي في تعديل المزاج وتنشيط الجسم لكن لازم تعرفي الاول ايه هي اضرار وفوايد الكافيين وايه هي الجرعة المناسبة من الكافيين وازاي نظبط الحصة اليومية منه عشان نستفاد من فوايده ونتجنب اضراره، تعالي اعرفي بالتفصيل ايه هي اضرار وفوايد الكافيين

فوايد الكافيين

رفع النشاط البدني
التخلص من الصداع
التخلص من التعب والارهاق
رفع التركيز والنشاط الذهني

الحصة اليومية المسموح بيها من الكافيين

تعتبر الجرعة المناسبة من الكافيين حوالي 400 مجم يوميا والجرعة دي موجودة في
اربع معالق صغيره من القهوة العربية يعني تقريبا فنجانين من القهوة
او 4 اكواب من الشاي الاحمر
او 3 اكواب من الشاي الاخضر
او عبوتين من مشروب الطاقة
او 3 كبسولات من المسكنات المخلوطة بالكافيين وغالبا بيبقى المسكن معاه كلمه اكسترا او بلس وده الكبسولة منه فيها حوالي 130 مجم من الكافيين
اما الكولا فبيكون فيها اقل نسبة كافيين يعني ال10 اكواب فيهم 400 مجم

اعرفي هنا ازاي تعملي مشروبات القهوة زي الكافية بالظبط

اضرار الافراط الكافيين

في الحقيقة الكافيين مالهوش اضرار غير في حالة الافراط يعني لما نتعدى الجرعة او الحصة المسموح بها يوميا وبيكون له اثار جانبية كتيرة ومضرة للجهاز العصبي زي
الصداع النصفي
الارق
العصبية
عدم القدرة على الاسترخاء
ادرار البول
اضطرابات المعدة
تسارع ضربات القلب
التشنجات العضلية
احيان في بعض الناس اجسامهم حساسة من الكافيين اكتر من غيرهم يعني ممكن الحصة اليومية ال 400 مجم دي تكون كتيرة عليهم لأن اجسامهم حساسة من ناحيته وفي الحالة دي مجرد كوباية شاي بيكون لها تأثير سلبي كبير عليهم زي انهم مش بيعرفوا يناموا او بيتعصبوا وترتفع ضربات قلبهم او غيرها من الاعراض السلبية للكافيين

ازاي اتحكم في حصة الكافيين اليومية

اولا لازم تعرفي طبيعة جسمك ونومك وروتينك اليومي وبناءا عليه بتظبطي الحصة اليومية اللي جسمك محتاجها يعني مش شرط تلتزمي بجرعة ال 400 مجم اليومية ممكن يكون جسمك بيتعامل مع جرعة اقل من كده، لكن ف الاكتر من كده مضر ولازم تبدأي تظبطي النسبة اللي داخلة جسمك يوميا عن طريقالخطوات دي

اظبطي حصة نومك في اليوم على اد ما تقدري حاولي تنامي من 6 الى 8 ساعات بليل عشان تظبطي جهازك العصبي
متابعة الاكل والشرب اليومي بتاعك واحسبي ايه الحاجات اللي فيا كافيين عشان ماتكتريش منها اقري المكونات بتاعة المشروبات اللي بتشربيها يوميا عشان تعرفي فيها كافيين ولا لأ واتحكمي في النسبة اللي بتاخديها يوميا
اتجنبي شرب الكافيين بعد الساعة 3 العصر عشان ما يسببلكيش ارق
قللي بالتدريج من ناحية الكمية او الحجم بتاع المشروب اللي بتاخديه يوميا يعني بدل كوباية كبيرة من المشروب خليها كوباية متوسطة وبعدين صغيره
شوفي بدايل خالية من الكافيين للمشروبات اللي بتحبيها زي مثلا القهوة الخالية من الكافيين او الشاي الخفيف او غيرها من البدايل القليلة او الخالية من الكافيين
بدلي الشاي والقهوة بالمشروبات العشبية خاصة في النص التاني من اليوم زي الينسون والنعناع والشمر والتليو وغيرها من المشروبات العشبية

وشوفي الموضوع ده عشان تعرفي ازاي تحسني من الدورة الدموية بطرق آمنة

محاذير استخدام الكافيين

خلي بالك من الادوية في بعض الادوية بتتأثر من الكافيين وبتفقد فعاليتها زي بعض انواع المضاد الحيوي وبعض انواع ادوية البرد اقرأي النشرة الداخلية للدواء عشان تعرفي تفاعله مع الكافيين
في حالة الحمل والرضاعة اسألي دكتورك وناقشيه في النسبة المسموح بيها من الكافيين يوميا عشان متأثرش بالسلب على الطفل او الجنين
في بعض الحالات المرضية ممنوع الكافيين او لازم الدكتور يحدد النسبة المسموح بيها زي امراض القلب وضغط الدم وامراض الكبد والكلى

وزي ما اتفقنا ان كلنا تقريبا بنبدأ يومنا بكوباية القهوة او الشاي لكن بعدما عرفنا ايه اضرار وفوايد الكافيين يا ريت نحاول نستفيد منه ونتجنب الافراط فيهوالاضرار بتاعته، يعني ما فيش مانع من ادخال الكافيين في روتينك اليومي لكن حاولي تلتزميبالحصة المسموح بيها منه يوميا.