ازاي تحددي اهدافك المادية وتتحكمي في ميزانيتك

بقلمأنجي سليمان فيمنوعات visibility339

من اكتر الامور اللي بنفكر فيها في خلال يومنا هي الامور المادية، مرتبي كام، حينزل امتى، حصرفه في ايه، حيكفي ولا لأ، خطة الادخار، ميزانية البيت….. وكتير جدا جدا من الافكار والاسئلة اللي بتشغل تفكيرك طول اليوم، في الحقيقة الاسئلة دي ممكن تنظميها وترتبيها وتجاوبيها كمان بس لو عرفتي ازاي تحددي اهدافك المادية وتتحكمي في ميزانيتك ، وعلى فكرة دي مش حاجة صعبة بس لازم تتنفذ صح عشان فعلا تعرفي تحققي اهدافك اقري الموضوع ده واعرفي بالتفصيل ازاي تحددي اهدافك المادية وتتحكمي في ميزانيتك

تحديد الاهداف المادية مش بيتم بالساهل بمعني ان عشان تحددي اهدافك المادية صح بتحتاجي انك تتبعي مجموعة خطوات وهي

خلي هدفك محدد

بمعني ان مش تقولي انا عايز ادخر، او انا نفسي يبقى معايا مبلغ كويس، دي كده مش اهداف مادية دي امنيات عامة غير محددة، لكن ممكن تقولي انا عايزة ادخر مبلغ اسافر بيه في الصيف، او انا عايزة اغير الموبايل، او تدخري عشان الولادة او حتي تقرري انك تدخري مبلغ للطواريء الصحية وغيرها كتير جدا من الاهداف المحددة

حددي رقم معين

بعد ما حددتي الهدف بتاعك خلاص وقررتي انك عايزة تحوشي عشان ايه بالظبط، احسبي حتى لو بالتقريب المبلغ اللي حيحدد الموضوع ده مثلا تقولي 5 الاف جنية، ويبقى كده هدفك ان تدخري مبلغ 5 الاف جنية عشان تسافري في الصيف
لو كنتي بتجهزي لفرحك شوفي معانا الدليل الكامل لتحديد ميزانية الفرح

خليكي منطقية

خلي تنفيذك لهدفك المادي يتناسب مع قدراتك بالفعل، يعني مثلا ماينفعش تقولي انا مش حشن الموبايل ولا حشتري اي مستلزمات شخصية او ادوية لغاية ما ادخر ال5 الاف جنية، ده غير منطقي وصعب اوي انك تلتزمي بيه وبالتالي الخطة المادية بتاعتك مش حتبقى مظبوطة، لكن ممكن تقولي انا مش حاكل في استراحة الشغل او مش حشتري اكل من برة وحجيب معايا اكل من البيت، او حركب مواصلات عامة مش لازم كل يوم تاكسي، وغيرها من الاساليب اللي تقدري تنفذيها بالفعل

ازاي تحددي اهدافك المادية وتتحكمي في ميزانيتك
ازاي تحددي اهدافك المادية وتتحكمي في ميزانيتك

رتبي اولوياتك

قرري ايه المهم وايه الاهم في ميزانيتك، وده بيتم عن طريق تدوين وكتابة كل بنود الميزانية بتاعتك من اول يوم في الشهر ولغاية اخر يوم، يعني مثلا الفواتير الشهرية كلها وشحن الموبايل وحساب الكافيتريا في الشغل او اشتراك النت وكل المصاريف الثابتة دي حنكتبها ونحسبها ونعمل حسابها من اول يوم في الشهر، وبعد كده بنشوف ايه البنود اللي ممكن نتحكم فيها زي الهدوم ونشوف لو ممكن نأجلها او لأ، المجاملات بانواعها حنشوف لو نقدر نخفض منها شوية، الخروجات والمواصلات وهكذا كل حاجة بنصرف فيها الفلوس حندرس اهميتها ونشوف لو ممكن نأجلها او نوزعها على شهر تاني او نستغنى عنها خالص

الوقت

طبعا عامل الوقت من اهم العوامل اللي بتتحكم في تظبيط الميزانية، يعني لو بدأتي تدخري من الصيف عشان رحلة في الصيف الجاي يبقى انتي بتظبطي الميزانية في خلال سنة او اقل شوية بسيطة غير طبعا ما تيجي تقرري انك تدخري قبل الهدف بتاعك بشهرين او تلاتة، اكيد الضغط المادي على المدى الاطول حيكون احسن من الزنقة والادخار في اخر لحظة

الوسائل المساعدة

ودي الطرق اللي ممكن تدخري من خلالها بشكل اسرع شوية زي مثلا الجمعيات، او لو انتي بتدخري عشان تشتري حاجة ممكن تشوفي لو في برامج تقسيط، وممكن كمان تتعاملي بكروت الائتمان وتلتزمي بشروط السداد عشان مايبقاش عليكي فوايد كبيرة وغيرها من الطرق اللي ممكن تسهل عليكي الادخار او تحقيق الهدف المادي اللي انتي حددتيه من البداية

افتكري دايما ان المعاملات المادية عامة مش سهل التحكم فيها وطبعا ده لأن في حالات طواريء كتير وظروف ومناسبات بتيجي من غير حساب عشان كده مهم جدا يكون عندك خطة مادية طول الوقت وتحاولي تدخري مبالغ للطواريء وتحتفظي بيه في البنك او دفتر التوفير او غيرهم عشان اللحظات الحرجة دي، ونتمنى نكون افدناكي ولو شوية وعرفتي معانا ازاي تحددي اهدافك المادية وتتحكمي في ميزانيتك وشوفي كده الموضوع ده واعرفي ايه الاخطاء المالية اللي بنقع فيها واتجنبيها