4 افكار بسيطة ومبهجة لتزيين مكتبك
من اهم الحاجات اللي بتساعدنا على الانجاز في الشغل او الدراسة هي الراحة النفسية والجسدية للمكان اللي بنقعد فيه وبنستخدمه لتأدية شغلنا. وعشان كده جبنالك 4 افكار بسيطة ومبهجة لتزيين مكتبك. حتساعدك تخليكي تنظمي مكتبك ويبقى مريح للاعصاب عشان تقدري تشتغلي او تذاكري بشكل افضل. تابعي معانا المقال واعرفي 4 افكار بسيطة ومبهجة لتزيين مكتبك.
منظم الاقلام
الاقلام بانواعها والماركرز والمقصات والدباسة وغيرها من الادوات الكتابية الكتيرة بتعمل فوضى على المكتب وبتزعجنا. وغالبا لما بنحتاجها مش بنلاقيها لانها سهل تتوه في وسط الورق والحاجات التانية الموجودة على المكتب. وعشان تنظمي اقلامك هاتي اي علبة معدن زي علب لبن الاطفال او علب الصلصة او السمنة او غيرها. اغسليها كويس ونشفيها والزقي عليها بالمسدس ورق تجليد او قماش خفيف ملون. وحتبقى شكلها شيك جدا وفي نفس الوقت حتنظمي فيها اقلامك
منظم من البرطمانات
استخدمي اي برطمان بتاع اي حاجة بلاستيك او قزاز، اغسلية ونشفيه والزقي عليه قطعة من الدانتيل او الخيش وعليها شريط ستان او ورد او لولي حسب ما تحبي وحطي فيها الرفايع الصغيرة المزعجدة يعني دبابيس الدباسة، سماعة الموبايل، الشاحن، الكروت، وممكن تحطي فيها بونبوني او لبان كمان، وشوفي كمان الموضوع ده عن استخدامات الحبال في الديكور
الزرع
الزرع الصغير ده من اللمسات المريحة للاعصاب جدا وبتدي شكل جميل. اشتري نوع زرع شكله حلو وفي نفس الوقت يتحمل ظروف انه في مكتب يعني مش حيتعرض للضوء اوي زي الصبار الصغير مثلا، هاتي قزازة بلاستيك بتاعة ماية او حاجة سهلة قصيها بكتر او سكينة بأشكال زي الصور دي، لونيها بألوان جواش وسيبيها تنشف، حطي فيها الزرع بتاعك وحطيها على مكتبك وحتلاقي شكله اتغير وبقى مبهج
تنظيم الورق
عشان تنظمي الورق والكتب الصغيرة الكتير اللي بتعمل فوضى على المكتب استخدمي علب كرتون زي بتاعة الكورن فليكس مثلا واعملي منظم للورق، تابعي الصور وشوفي الطريقتين ونفذي اللي تعجبك وتساعدك اكتر. وشوفي كمان المقال ده بيتكلم عن استيكرات الحوائط ممكن يفيدك
دي كانت 4 افكار بسيطة ومبهجة لتزيين مكتبك تقدري تعمليهم من غير تكلفة مادية او مجهود عشان تقدري تستمري في الدراسة او تعملي شغلك وانتي في حالة نفسية افضل. وممكن تاخدي فكرة من هنا عن مجموعة افكار لتجديد ديكور البيت