ازاي تختاري العطر المناسب لجسمك

بقلمأنجي سليمان فيجمال ومكياج visibility1138

من اهم الحاجات اللي بنعتمد عليها في اكمال الاطلالة الخاصة بينا العطر او البرفان، بس دايما لما بتروحي تختاري العطر المناسب ليكي بتحتاري ما بين الانواع والروائح المختلفة، النهاردة حنقولك على مجموعة خطوات حتساعدك تعرفي ازاي تختاري العطر المناسب لجسمك، ركزي في المقالة دي ولو نفذتي الخطوات الجاية صح حتبقي شراء البرفانات والعطور بعد كده ممتعة جدا بالنسبة لك لأنك حتبقى عارفة ازاي تختاري العطر المناسب لجسمك وحتتخلصي من الحيرة اللي بتقعي فيها كل مرة

1- عائلات العطور

اول حاجة انتي بتختاري العطر على اساس نوع الروائح المفضلة عندك حطي في اعتبارك ان مصنعين العطور بيقسموا الرويح لأربع عائلات باختصار هي..

روايح الزهور: وهي مجموعة الروايح اللي بتنتمي لكل انواع الزهور زي الورد والياسمين واللافندر

الروايح الخشبية: ودي روايح اتقل شوية زي مثلا العود والصندل والاعشاب

الروايح المنعشة: وغالبا بنلاقيها في عطور النهار وهي روايح خفيفة وبتدي احساس بالانتعاش والنشاط زي الليمون والنعناع والموالح المختلفة

الروايح الدافية: وطبعا هنا مش مقصود بيها الدفء اللي بنحسه باللمس ولكن اللي لما نشمها كده نحس بالهدوء والراحة زي مثلا الفانيليا او القهوة

ومن المقال ده اعرفي ازاي تعملي معطر طبيعي لجسمك في البيت بالعطر اللي بتحتبيه

ازاي تختاري العطر المناسب لجسمك
ازاي تختاري العطر المناسب لجسمك

2- تركيز العطر

وعشان تختاري العطر المناسب لجسمك بشكل دقيق، لازم تعرفي ان مصانع العطور بتنوع الانتاج بأكتر من تركيز وبيكون مكتوب نوع التركيز وكميته على عبوة العطر نفسها، وكل ما كان التركيز اعلى كل ما بيكون السعر اعلى يعني ماء العطر (eau de parfum)، بيبقى اغلى من ماء التواليت (eau de toilette) وده مش معناه خالص ان ماء البرفان افضل من ماء التواليت؛ لكن المفروض ان البرفانات اللي تركيزها اخف بنستخدمها في النهار عشان متبقاش تقيلة ونفاذة اوي يعني مثلا نحط منها واحنا رايحين الشغل او الكلية يوميا، اما ماء العطر اللي تركيزه اتقل فده ممكن نخليه للمناسبات الخاصة والخروجات الليلية مثلا

وممكن تتعرفي معانا على اكتر من طريقة للتخلص من رائحة العرق

3- اختبار العطر

واخر خطوة المفروض تنفذيها وانتي بتختاري العطر المناسب لجسمك هي انك تختبري العطر وده لأن ان مش كل الاجسام بتقبل كل الروائح وانواعها، وده مالهوش اي علاقة غير براحتك النفسية ناحية العطر ده يعني ساعات كتير يعجبك البرفان من العبوة بتاعته لما تشميه لكن لما تحطي منه بتلاقي نفسك منزعجة ومتوترة من ريحته وحاسة انها مش لايقة معاكي، وهو ده المعيار الاخير اللي بتحطيه في اعتبارك ان مش شرط عشان العطر سعره غالي او ريحته عجبتك في العبوة انه كده مناسب لأ لازم كمان تكوني مبسوطة وانتي حطاه وشامة ريحته عليكي حلوة، عشان كده حاولي دايما تشتري عينة الاختبار الخاصة بالبرفان اللي عجبك وتستخدميها قبل ما تشتري العبوة الكبيرة ولو صعب تلاقي العينة اشتري اصغر كمية ممكنة واختبريها على جسمك قبل ما تشتري العبوة الكبيرة.

واخيرا احب اقولك ان لو فعلا التزمتي بالخطوات دي حتعشقي شراء العطور وحتحبي تستخدميها لأنك حتكوني عرفتي ازاي تختاري العطر المناسب لجسمك ويليق عليكي.. واقري الطرق دي عشان تعرفي ازاي تخلي البرفان بتاعك يدوم لوقت اطول