طرق لمنع تشابك الشعر..وازاي ترطبيه بطريقة صح

ريهام محمود

في

8570

تشابك الشعر من المشاكل اللي كتير من البنات بيعانوا منها, والتعامل مع التشابك بطريقة غلط ممكن يضر الشعر ويقطعه ويتسبب في تقصفه, عشان كده النهاردة من خلال السطور الجاية هنتعرف على طرق لمنع تشابك الشعر وترطيبه بشكل صح.

تعالوا نعرف الاول ايه هي اسباب تشابك الشعر:

1- نقص الترطيب:

لما الشعر بيكون مش مترطب كويس, ده بيأدي لاحتكاك الشعر وبيسبب التشابك, وفي النهاية هيأدي لتلف وخشونة الشعر ولتدهور حالة الشعر بشكل عام.

2- النوم والشعر مفرود:

النوم من غير لم الشعر او تضفيره, ممكن يأدي لتشابك الشعر بشكل كبير, وحاجة تانية مهمة جدا متناميش ابدا والشعر مبلول, لان الشعر بيكون اضعف وهو مبلول وده بيخليه يتجعد ويتكسر بسهولة, والتشابك اللي بيكون ناتج عن النوم بشعر مبلول بيكون صعب جدا فكه.

3- مش بتسرحيه:

عدم تسريح الشعر كل يوم ممكن يأدي للتشابك, خصوصا لو نمتي بيه مش متسرح, كمان ممكن بقايا الزيت تتراكم على الشعر مع مرور الوقت ويضر صحة الشعر.

4- مش بتقصي الاطراف الجافة:

اهمال قص اطراف الشعر فترات طويلة ده بيأدي لانقسام الاطراف وتكسرها بسهولة وتجعد وهيشان الشعر, وبمجرد ما الشعر يتقسم من تحت بيكون صعب انك تصلحيه, وبيبقى جاف وبيتجعد, وكل ده ممكن يأدي في النهاية لتشابك الشعر بسهولة.

5- تلف طبقات الشعر الخارجية:

استخدام الحرارة باستمرار على الشعر ممكن يأدي لتكسر الشعر وتلفه, ولما الشعر هيتلف بتتشال الطبقات الخارجية بتاعته والطبقات الداخلية بتبقى مكشوفة من غير حماية, وده في النهاية هيأدي لتشابك وضرر الشعر بشكل عام.

بعد ما عرفنا اسباب تشابك الشعر هنقولك على الطرق اللي هتمنع التشابك وتحافظ على شعرك صحي.

طرق لمنع تشابك الشعر:

1- استخدام بلسم الشعر:

مجرد غسل الشعر بالشامبو بس ده مش كفاية, دايما لازم تديه لمسة ترطيب, لانه بيساعد على تسريح الشعر بسهولة وبيفك اي تشابك, لان البلسم بيرطب بينعم خصل الشعر بشكل فعال, والافضل انك تخلي البلسم على الشعر لمدة دقيقتين قبل غسله.

2- استخدمي مشط سنانه واسعة:

من الافضل متستخدميش المشط اللي سنانه ضيقة, او الفرشة المدورة على الشعر المتشابك, لان ده ممكن يأدي لتكسر الطبقة الخارجية ويسبب ضرر وتلف الشعر, وبدل ده استخدمي المشط اللي سنانه واسعة لانه بيفك الشعر بسهولة من غير شد للشعر زيادة عن اللزوم, ودايما ابدأي بأطراف الشعر لحد ما توصلي للجذور.

3- استخدمي منتجات فك التشابك:

ممكن تستخدمي منتجات زي السبراي او السيروم اوالبلسم اللي معمولة مخصوص لفك تشابك الشعر بسهولة, حطي المنتج على اماكن التشابك ودلكيه وسرحيه بالفرشة بالراحة من فوق لتحت من خلال العقدة, وممكن كمان تستخدمي صوابعك بدل الفرشة لفك التشابك.

4- تطبيق ماسكات الشعر:

تطبيق ماسك الشعر مرة واحدة في الاسبوع ممكن يساعد بشكل كبير على تحسين نسيج الشعر, لانه بيرطب طبقات الشعر وبيغذيها وبينعمها, ومن اكتر المكونات الفعالة اللي ممكن تحول شعرك هي الزبادي والعسل وزيت اللوز, اخلطي المكونات دي مع بعض وحطيها على الشعر, وسيبيها لمدة 20 دقيقة وبعدين اغسليه بالشامبو والبلسم, مع التكرار هتحسي بالفرق بعد كام اسبوع من الاستخدام, ولو الماسكات بتاخد وقت طويل على ما تجيب نتيجة كويسة معاكي, ممكن تضيفي عصير ليمونة كبيرة لكوبايتين مية ودلكي فروة راسك بالخليط ده, هيحول شعرك خلال ايام.

5- استخدمي زيت للشعر:

عشان تدي الشعر جرعة رطوبة صحية, هتحتاجي انك تستخدمي الزيت بشكل منتظم, ومن الزيوت الفعالة جدا في ترطيب الشعر وتنعيمه هو زيت جوز الهند, دلكي الشعر بزيت جوز الهند الدافي وهتشوفي الفرق على شعرك, وزيت جوز الهند من الزيوت المناسبة لكل انواع الشعر, وعشان تخلي النتايج تدوم معاكي, ممكن تخلطي مع زيت جوز الهند زيت الجوجوبا وزيت الزيتون, الخليط ده فعال جدا في التخلص من تشابك الشعر.

6- شطف الشعر بمية باردة:

الخطوة دي بسيطة جدا لكن فعالة, بعد ما تغسلي شعرك بالطريقة العادية خلي اخر شطفة للشعر تكون بمية باردة عشان تقفلي مسام الشعر وتمنعي تكسره, وده هيأدي لمنع التشابك وجفاف وهيشان الشعر.

7- اتجنبي استخدام الحرارة:

ادوات تصفيف الشعر زي السيشوار والمكوى والكيرلر تأثر على الشعر بشكل سلبي وتسبب جفافه, وده هيأدي في النهاية للتشابك, وعشان تتجنبي ده استخدمي ادوات تصفيف الشعر على حرارة من منخفضة لمتوسطة, وممكن كمان تتجنبي تلف الشعر باستخدام حامي من الحرارة قبل استخدام السيشوار او المكوى.

8- تجفيف الشعر بالفوطة بطريقة صح:

فرك الشعر بالفوطة بقوة اوي بعد غسله, ممكن يأدي لتكسر وتساقط الشعر, وهيأدي لانقسام الاطراف وتجعد وهيشان الشعر, وبدل ما تعملي كده وتضري شعرك, استخدمي طريقة الضغط على الشعر بدل الفرك عشان تتخلصي من اي مية زيادة, وبعدين سيبيه ينشف على طبيعته في الهوا, والفوط الميكروفايبر او القطن تعتبر احسن اختيار عشان تحافظي على صحة الشعر.

9- حماية شعرك اثناء النوم:

زي ما جسمك بيحتاج للراحة, الشعر كمان بيحتاج انه يكون مرتاح, عشان كده بننصحك تنامي على مخدة حرير او ستان لانها مش بتسبب الاحتكاك وبتمنع الشعر من التشابك, واتجنبي المخدات القطن لان بتكون قاسية على نسيج الشعر وبتأدي لجفاف وتكسر الشعر.

10- اتجنبي المنتجات اللي بتحتوي على كحول:

لما تشتري اي منتج للشعر لازم تشوفي مكوناته كويسة عشان تتأكدي انه خالي من الكحول, لان الكحول بيسبب جفاف الشعر وبيدمر نسيج الطبقات, وده بيأدي لتشابك وتكسر الشعر, اختاري دايما المنتجات الخالية من الكحول والكبريتات.

تعالوا نعرف شوية نصايح وحيل سهلة لفك التشابك:

– استخدمي دايما صوابعك لفك التشابك قبل استخدام المشط, لان ده ممكن يقلل من حجم العقدة بشكل كبير, ويخلي استخدام المشط اسهل واقل الم.

– قسمي الشعر عشان ده هيخلي فك التشابك اسهل وهتقدري تتحكمي في الشعر اكتر.

– قصي اطراف الشعر كل 3 شهور عشان تتخلصي من الاطراف المنقسمة.

– تسريح الشعر بالفرشة وهو مبلول ممكن يضعفه ويخليه يتساقط, بدل كده, استخدمي صوابعك عشان تتخلصي من اي عقد او تشابك بعد ما تغسلي شعرك مباشرة.

– اتجنبي استخدام منتجات الشعر اللي ممكن تسيب بقايا لانها هتتسبب في تعقيد وتشابك الشعر.

– استخدمي Leave-in conditioner بعد غسل الشعر, لان ده مش بس هيخليكي تقدري تتحكمي في شعرك بسهولة اكتر, لكن كمان هيقلل هيشان وتطاير الشعر.

– زي ما قولنا استخدمي ماسكات الشعر زي الزبادي والعسل لترطيب الشعر بعمق كل اسبوع او كل اسبوعين.

– البسي سكارف او قبعة وانتي خارجة عشان تحمي شعرك من الشمس والغبار والاتربة وتلوث الجو.

– اعملي حمام زيت للشعر بنوع زيت طبيعي قبل غسله بساعة, ممكن تستخدمي زيت الزيتون, زيت اللوز, زيت جوز الهند.

فك تشابك الشعر الجاف:

التشابك الجاف او اللي بيكون في شعر ناشف مش مبلول يعتبر من اصعب انواع التشابك, وعشان تسهلي فكه استخدمي موس او سيروم عشان تنعمي طبقات الشعر الجافة قبل ما تبدأي تفكي التشابك بالمشط.

فك التشابك الناتج عن منتجات تصفيف الشعر:

استخدام كميات كبيرة من كريم الشعر او الجل ممكن يسبب تشابك وتعقيد الشعر, وعشان تفكي التشابك استخدمي الزيت دلكي بيه الشعر لترطيبة, وهيساعد كمان على ترطيب وتنعيم اطراف الشعر الجافة, دلكي الزيت بالراحة على الاماكن اللي فيها تشابك وبعدين سرحيه بالفرشة.