هل الموز بيساعد على فقدان الوزن ولا زيادة الوزن؟

ريهام محمود
ريهام محمود
5074

ساعات كتير لما يكون شخص عايز يزود وزنه بيلاقي النصيحة اللي دايما بتقابله اشرب موز باللبن, وفي نفس الوقت زي ما في ناس شايفة ان الموز بيزود الوزن, في ناس تانية بتشوف انه بيساعد على انقاص الوزن, وهنا بيبقى في حيرة هل الموز بيزود الوزن ولا بيخسس, هو ده اللي هنعرفه النهاردة من خلال السطور الجاية, هنتعرف على فوايد الموز لزيادة وانقاص الوزن.

الموز لزيادة وانقاص الوزن:

فقدان الوزن او زيادته بتعتمد على كمية الموز اللي بتاكليها, يعني لو هتاكلي الموز بس مع نظام غذائي للتخسيس, يبقى تلقائيا كده هتخسري وزن, لكن لو بتاكلي وجباتك العادية جدا مع من 5 – 6 موزات في اليوم, فده هيزود وزنك.

كلنا عارفين المقولة المشهورة “ان تفاحة في اليوم ممكن تبعدك عن الطبيب”, لكن النهاردة بنقولك ان اكل الموز كمان بشكل يومي هيبعدك عن جميع الامراض, لانه بيحتوي على فيتامينات وعناصر بتحافظ على صحة الجسم بشكل عام, والموز من الميزات اللي فيه انه ممكن يساعد على فقدان الوزن وفي نفس الوقت بيساعد على بناء عضلات الجسم, والخبراء بينصحوا الاشخاص اللي بيعانوا من فقر الدم او الانيميا انهم ياكلوا موز, لانه بيساعد على زيادة الهيموجلوبين في الدم.

الموز لتخسيس الوزن:

الموزة الواحدة بتحتوي على 108 سعر حراري, ما يعادل تقريبا 18 جرام من الكربوهيدرات, والكربوهيدرات تعتبر مهمة لانها بتساعد اعضاء الجسم انها تشتغل بشكل صح وسلس, لكن مع ذلك زيادة نسبة الكربوهيدرات ممكن تأدي لزيادة الوزن.

الموز كمان غني جدا بالفيتامينات والمعادن والالياف اللي بتساعد على تحسين معدل التمثيل الغذائي, كمان بيحتوي على عنصر البكتين اللي بيساعد على الشعور بالشبع لفترة اطول.

الموز بيحتوي على مؤشر منخفض لنسبة السكر في الدم, وده بيساعد على انقاص الوزن, وفي حين ان معظم انواع الفاكهة بتكون مش غنية بفيتامين B6, الموز بيوفر كمية كافية من فيتامين B6, اللي بيساعد في الحفاظ على صحة الجسم حتى بعد التمارين المكثفة, واظهرت الابحاث ان نقص فيتامين B5 وحمض الفوليك ممكن يأدي لامراض القلب, عشان كده اكل الموز بانتظام بيساعد على الوقاية من امراض القلب, كمان بيساعد على السيطرة على مستويات السكر في الدم.

الموز بيحتوي على انزيمات بتسرع عملية الهضم عن طريق تقليل كمية الوقت اللي بتحتاجها الامعاء لهضم الاكل, وده في عملية التمثيل الغذائي بيأدي لفقدان الوزن.

كل الخصائص دي بتثبت ان الموز يعتبر غذاء مثالي لاي نظام غذائي لفقدان الوزن.

الموز لزيادة وانقاص الوزن 1
الموز لزيادة وانقاص الوزن 1

انواع الموز اللي بتساعد على انقاص الوزن:

الموز ليه كذا نوع, ومن اكتر الانواع اللي بتساعد على فقدان الموز, هو ال Baby banana اللي بيكون صغير وقصير او اللي احنا بنقول عليه هنا الموز البلدي, ولكن بيكون غني جدا بفيتامين B6 وبالالياف.

وفي انواع موز تانية بتساعد على انقاص الوزن زي موز الكافنديش وده اللي بتكون قشرته كلها صفرا ومافيهاش اي نقط او خطوط سودا, والموز الاحمر وده ممكن ميكونش متوفر اوي في مصر, وال Plantain banana اللي معروف باسم موز الجنة وبتكون قشرته سميكة شوية عن الموز العادي.

الموز لزيادة وانقاص الوزن 2
الموز لزيادة وانقاص الوزن 2

الموز لزيادة الوزن:

الموز غني بالسعرات الحرارية وده السبب انه يتعبر من الطرق القديمة المستخدمة لزيادة الوزن, تقريبا حجم ال 6 بوصات من الموز بتحتوي على من 90 – 95 سعر حراري, ودي تعتبر كمية سعرات حرارية اقل بكتير من اللي موجودة في قطعة حلويات, وتعتبر افضل طريقة لاستخدام الموز لزيادة الوزن هو اضافته للعصاير او السموزي او الميلك شيك, وبما ان الموز غني بفيتامين B6 فهو بيساعد على تنظيم الدورة الدموية في الجسم, وده بيأدي لانتاج خلايا الدم الحمرا بشكل اكبر, الموز كمان غني بالمنجنيز اللي بيساعد على الهضم, وبينظم حركة الامعاء, وبيمنع امراض العظام, البوتاسيوم كمان من العناصر المهمة جدا اللي موجودة في الموز وغني بيها جدا, يعتبر ضروري جدا للاعصاب والعضلات وبيساعد على انتاج الطاقة في الخلايا, والموزة الواحدة بالحجم الكبير بتوفر تقريبا 10% من احتياج الجسم اليومي للبوتاسيوم, وخبراء التغذية بينصحوا عشان الموز يساعد في زيادة الوزن لازم تاكلي منه كمية كبيرة.

وعملية زيادة الوزن بتعتمد في الاساس على التمثيل الغذائي ومستوى نشاط جسمك, ولما بتاكلي الموز بيتم تقسيم السكر الطبيعي او الكربوهيدرات لجلوكوز بشكل فوري, والجسم بيستخدم الجلوكوز ده لتوفير الطاقة للانشطة البدنية اليومية, وبيتم تخزين الجلوكوز الزيادة كجليكوجين في الكبد والعضلات والجسم بيستخدمه لما يحتاجه, ولما كمية الجليكوجين المتخزنة دي بتزيد عن الحد المسموح, بيتم تخزينها كدهون, ومن هنا بتيجي زيادة الوزن.

ومع ذلك اخصائيين التغذية بينصحوا انك متاكليش في اليوم اكتر من 5 – 6 موزات, لان زيادته ممكن تأدي للامساك, وممكن كمان يبطء حركة الامعاء.

الموز لزيادة وانقاص الوزن 3
الموز لزيادة وانقاص الوزن 3

افضل الطرق لاستخدام الموز لزيادة الوزن:

– ممكن تقطعيه وتخلطيه مع فواكه تانية وتعملي طبق سلطة فواكه.

– ممكن تعملي سموزي الموز بخلطة مع الزبادي.

– ممكن تقطعيه شرايح او تهرسيه وتفرديه في ساندوتش مع زبدة الفول السوداني.

– وممكن تعمليه ميلك شيك.

طريقة ميلك شيك الموز:

المكونات:

– من 1 – 2 ثمرة موز.

– 1 ½ كوباية لبن.

– سكر.

– فانيليا.

– ايس كريم “اختياري”.

– لوز.

طريقة التحضير:

قطعي الموز شرايح وحطيه في الخلاط وضيفي له اللبن وتلج, ومعلقة كبيرة ايس كريم, ومن 4 – 5 لوزات, والسكر, اضربي المكونات كلها مع بعض كويس لحد ما يبقى عصير ناعم وسميك, صبيه في الكوبايات.

ممكن كمان تجربي معاه نكهات ايس كريم مختلفة, وفواكه مجففة زي الزبيب, ومكسرات زي الكاجو والجوز, عشان تزودي من القيمة الغذائية للميلك شيك.

الموز لزيادة وانقاص الوزن 4
الموز لزيادة وانقاص الوزن 4

اعرفي معانا ازاي تخسسي وزنك بالموز بس !

اعرفي معانا ازاي تخسسي وزنك بالموز بس
اعرفي معانا ازاي تخسسي وزنك بالموز بس

مقالات متعلقه

دايت القلب لمدة 3 ايام: هيساعدك تخسي 4 كيلو مع الاطعمة الصحية للقلب

دايت القلب لمدة 3 ايام: هيساعدك تخسي 4 كيلو مع الاطعمة الصحية للقلب

7 اطعمة ابعدي عنهم تماما لو بتحاولي تخسري وزن

7 اطعمة ابعدي عنهم تماما لو بتحاولي تخسري وزن

وصفات لسد الشهية وتخسيس الوزن

وصفات لسد الشهية وتخسيس الوزن