11 حركة لغة جسد غلط كتير مننا بيعملهم في الشغل

بقلمريهام محمود فيمنوعات visibility2145

لو في مكان شغل بقالك فترة وبتعملي شغلك على اكمل وجه وممكن كمان تاخدي ساعات اضافية وتشتغلي زيادة وتعملي كل اللي عليكي, ومع ذلك بعد ده كله تلاقي التقدير او الترقية راحت لزميل تاني ليكي في الشغل, وهتبدأي انتي تحتاري وتفكري انتي قصرتي في ايه, لكن الحقيقة ان الموضوع مش دايما بيكون ليه علاقة بجودة الشغل وساعات العمل, في الحالة دي لغة الجسد في الشغل مسؤولة عن ده, لغة الجسد الصحيحة مهمة جدا في مكان العمل, لان جزء كبير من اتصالاتنا وتعاملاتنا بتكون من خلال السلوك الغير لفظي والتعبيرات الحادة اللي من غير كلام, وفي الواقع ان 55% من رسايلنا في التواصل بتتم عن طريق السلوك الغير لفظي, عشان كده النهاردة من خلال موضوعنا هنقولك اكتر غلطات في لغة الجسد اللي المفروض تتجنبيها عشان تبقي اكتر ثقة وانتاجية في العمل.

غلطات في لغة الجسد:

1- تقعدي كأنك قعدة في البيت:

اكيد كلنا في البيت بنقعد على راحتنا وممكن نبقى قعدين مريحين شوية على الكرسي, لكن القعدة دي متنفعش في الشغل, لانها هتدي انطباع سيء لكل اللي حواليكي سواء زمايلك او مديرك انك كسولة ومعندكيش طاقة للشغل, ده غير ان القعدة بشكل مستقيم بتقوي عضلات الضهر, وهتدي في نفس الوقت انطباع لرئيسك او مديرك انك مركزة ونشيطة في الشغل.

غلطات في لغة الجسد
غلطات في لغة الجسد

2- تحريك العين بعيد عن الشخص Rolling eyes:

اوقات كتير لما بتتوجه لنا حاجة مش عجبانا بنعمل الحركة دي بعنينا اعتراض مننا ان الكلام مش عاجبنا, الحركة دي ممكن تعمليها بين اصحابك مثلا, لكن دي مينفعش تتعمل في الشغل لو اتوجهلك انتقاد من رئيسك او من زميل, لان هيدي انطباع عنك انك شخصية مش بتحترمي حد, وهتعتبر اساءة لزملائك ورؤسائك.

غلطات في لغة الجسد
غلطات في لغة الجسد

3- القرب اوي من زمايل العمل:

من اهم جوانب لغة الجسد الجيدة او الصحيحة انك تحافظي على مسافة كافية من زملائك في الشغل, بحيث ان يكون لكل واحد منكم حدود شخصية مينفعش حد يتخطاها.

غلطات في لغة الجسد
غلطات في لغة الجسد

4- التسلل لمكتبك “تدخلي تتسحبي”:

زي ما احنا بنقول كده تدخلي تتسحبي من غير ما حد يحس بيكي ومتسلميش على اي شخص موجود او تقولي صباح الخير, ده المفروض من الحاجات اللي متعمليهاش في الشغل متحاوليش تتجنبي التفاعل مع زمايلك, الافضل انك تحترميهم ويبقى في تفاعل بينكم, لان الاحترام اكيد هيتردلك احترام وهيعاملوكي بنفس المعاملة.

غلطات في لغة الجسد
غلطات في لغة الجسد

5- بتبيني ملامح الملل على وشك:

اكيد من الطبيعي انك ممكن تحسي بالملل في بعض الاوقات, خصوصا لما يكون مودك او حالتك النفسية مش كويسة, لكن احنا بننصحك انه الافضل انك تداري المشاعر دي في الشغل, وخصوصا لما توصلي لحالة الملل, ياللا في الحالة دي رئيسك لما هيلاقي منك الشعور ده هيفضل حد غيرك عليكي او يختاره بدالك في مكان انتي كنتي تستحقيه.

غلطات في لغة الجسد
غلطات في لغة الجسد

6- عزل نفسك في الشغل:

افتكري دايما ان العمل كفريق هو اسهل واكتر فايدة من العمل لوحدك, عشان كده لازم تحاولي تبذلي جهدي انك تتكلمي مع زملائك في العمل وتعملي معاهم علاقات ايجابية, لان تجنبهم ده هيديهم احساس انك مش حابة تشتغلي معاهم او انك مش مهتمة بالشغل.

غلطات في لغة الجسد
غلطات في لغة الجسد

7- بتسندي او بتميلي دايما على حاجة:

زي ما قولنا ان لغة الجسد ممكن تقول حاجات كتير عنك وبتبقى متلاحظة من اللي حواليكي وانتي مش واخدة بالك, عشان كده لازم تخلي بالك من حركات ولغة الجسد كويس, لو لقيتي نفسك دايما بتبقي ساندة على الحيطة او المكتب او كرسي وغيرها, في الحالة دي انتي محتاجة تعدلي وقفتك وتقفي بشكل مستقيم, لان ده ممكن يتفسر انه ضعف, لكن الوقوف او القعدة بشكل مستقيم دليل على القوة والثقة.

غلطات في لغة الجسد
غلطات في لغة الجسد

8- بتحطي ايدك ورا ضهرك:

ايماءات وحركات الايد مهمة خصوصا لو ده متعلق بالعمل, الايد ورا الضهر سواء ايد واحدة او الاتنين والغاء الايماءات والحركات بالايد ده بيدي انطباع انك غير جديرة بالثقة, وكون نك تكوني جديرة بالثقة من اللي حواليكي في الشغل دي حاجة مهمة جدا, واكيد احنا مش بنقولك انك تحركي ايدك زيادة عن اللزوم او طول اليوم, لكن حاولي على قد ما تقدري تحافظي على ايماءات الايد في معظم الاوقات.

غلطات في لغة الجسد
غلطات في لغة الجسد

9- بتبصي لساعتك كتير:

من السلوكيات الغير مهذبة انك تبصي في ساعتك او توقيت التليفون كل شوية وانتي بتتكلمي مع حد من زمايلك, ده هيخلي الشخص اللي قدامك يحس انك حاسه بملل منه او عايزة تمشي.

غلطات في لغة الجسد
غلطات في لغة الجسد

10- عدم الاهتمام بالمحادثة:

مهما كنتي مش مهتمة باجتماع او محادثة مع زميل في العمل, لازم تبيني انك مهتمة بتفاعلك بعينك وتركيزك معاه, والمشاركة في الحديث بالاراء.

غلطات في لغة الجسد
غلطات في لغة الجسد

11- مش بتبتسمي:

الابتسامة بتعمل هالة ايجابية في مكان العمل, طول ما انتي مكشرة في وش اللي حواليكي ده هيخليهم دايما منزعجين ومضايقين منك, لكن لما تبتسمي الابتسامة دي بالتالي هترجعلك واللي حواليكي هيبتسموا في وشك وهيبقى جو الشغل افضل ومريح اكتر.

غلطات في لغة الجسد
غلطات في لغة الجسد

ازاي الوظائف السابقة ممكن تخلي عندك ثقة اكتر بنفسك في حياتك المهنية

ازاي الوظائف السابقة تزود ثقتك بنفسك