5 عادات بيعملها الاشخاص اكتشف الباحثين انها ممكن تضر بصحتهم العقلية

احنا دلوقتي بقينا نعيش في عالم كل حاجة بنقدر نخلصها واحنا قاعدين في مكاننا من غير ما نتحرك بضغطة زرار واحدة, والتكنولوجيا سهلت علينا الحياة في نواحي كتير اوي, لكن الحياة الحديثة دي بتأثر بشكل سلبي على الصحة العقلية, وهنلاقي ان الامراض العقلية زادت في وقتنا ده عن زمان بكتير, لكن مش معنى ان الحياة بقت اسهل يعني افضل, لاننا محتاجين حاجات كتير في حياتنا غير التكنولوجيا, محتاجة انك تشمي هوا نقي, تستمعي بالشمس, تاكلي اكل صحي, تمارسي رياضة, تتواصلي مع الناس ويبقى ليكي حياة اجتماعية, والحياة الحديثة او التكنولوجيا مش بتوفر الحاجات دي, وبالتالي هتظهر مشاكل الصحة العقلية, والنهاردة من خلال السطور الجايه هنقولك عادات بتضر الصحة العقلية, عشان تتجنبيها.

عادات بتضر الصحة العقلية:

1- مش بتحركي الجسم كفاية:

ممكن تكون الرعاية الصحية دلوقتي افضل من زمان, لكن الصحة هي اللي بقت اقل, اكيد بنسمع عن الاشخاص اللي بيعانوا من مشاكل في القلب والسكر وغيرها من الامراض في سن صغير, وده بسبب قلة الحركة لان الحياة الحديثة خلت حركتنا اقل بكتير عن زمان, وكل حاجة بقت متوفرة بسهولة, والابحاث اثبتت كمان ان عدم الحركة مش بس بيسبب تدهور الصحة البدنية والعقلية, لكن كمان بيزود القلق والاكتئاب, عشان كده ممارسة الرياضة مهمة جدا لانها بتساعد على زيادة انتاج الاندروفين اللي بيساعد على تحسين المزاج, واللي بدوره هيحارب مشاكل الصحة العقلية زي القلق والاكتئاب.

2- بتشتري حاجات كتير مش محتاجاها:

في العادة احنا بنتأثر بسهولة بعادات اللي حوالينا, وللاسف كتير من الناس ممكن يشتروا حاجات مش محتاجينها فعلا لمجرد انها عادة او عشان يملوا فراغ في حياتهم باي حاجة, لكن الدراسات اثبتت اكتر من مره ان الشراء اكتر مش بيشتري السعادة, لكن بالعكس تراكم حاجات احنا مش محتاجينها فوق بعض ده ممكن يسبب لنا قلق وتوتر زيادة, لكن اللي بيحقق السعادة الفعلية او شراء او اكتساب الخبرات مش شراء الحاجات اللي مالهاش لازمة, لان الاشخاص بيتواصلوا مع الحاجات اللي بيعملوها بنفسهم اكتر من الحاجات اللي بيستخدموها.

3- مش بتنامي وقت كفاية:

قلة النوم والقلق مرتبطين بالاكتئاب ارتباط مباشر, لاننا محتاجين النوم بشكل كويس عشان تقدري تشتغلي كويس ويبقى عندك طاقة خلال اليوم, لكن الحياة العصرية والتكنولوجيا مش بتخلينا ننام كويس, والتكنولوجيا مع الاجهاد وعدم ممارسة الرياضة وسوء التغذية كلها عوامل بتأدي لعدم كفاية النوم, وده بدوره هيأدي لمشاكل الصحة العقلية, ده بالاضافة كمان للقهوة اللي ممكن نكون بنشربها على مدار اليوم عشان نبقى فايقين ومصحصحين, ده كله هيأدي في النهاية انك مش هتعرفي تنامي كويس بالليل.

4- استخدام السمارت فون والتكنولوجيا بشكل عام زيادة عن اللزوم:

مش غريب ابدا ان التكنولوجيا النقالة المتمثله في الموبايل او التابلت او غيره لما بدأت, بقى في زيادة في مشاكل الصحة العقلية, والدراسات اثبتت ان الاشخاص اللي بيقضوا فترات طويلة على وسائل التواصل الاجتماعي معرضين اكتر للاصابة بالاكتئاب.

لان قبل السمارت فون والتكنولوجيا دي كانوا الناس بيتقابلوا اكتر وبيتكلموا وبيبقى بينهم محادثات مباشرة مش عن طريق شاشة, لكن دلوقتي الوضع اتغير كتير وبقى العالم الافتراضي هو اللي مسيطر على حياتنا اكتر من العالم الحقيقي, وبسبب ده احنا بقينا اقل تواصل مع نفسنا ومع اللي حوالينا, والانفصال عن الواقع ده ادى في النهاية لمشاكل القلق والاكتئاب.

5- مش بتقضي وقت كفاية في الهواء الطلق:

اكيد كلنا محتاجين للطبيعة عشان حياتنا تستمر, لكن دلوقتي مع التكنولوجيا بقى قليل اننا ممكن قضي وقت برا البيت ونستمتع بالطبيعية, وقلة ضوء الشمس معناه نقص فيتامين D في الجسم, وهو يعتبر عنصر غذائي اساسي بيساعد على تنظيم مزاجك وجهاز المناعة, بالاضافة لده الدراسات اثبتت ان الاشخاص اللي بيتمشوا في الجناين بدل الشوارع العادية بيكونوا اكتر هدوء واقل احباط, عشان كده بنقولك اخرجي واستمتعي بالطبيعة وضوء الشمس.

في النهاية الحياة الحديثة مش هتهيء لنا حياة صحية مثالية, عشان كده لازم تتأكدي انك تستنشقي الهوا النقي, بتتعرضي لضوء الشمس, بتاكلي اكل صحي, بتنامي كويس, بتمارسي رياضة, بتحاولي تخلي البيشة حواليكي خالية من الاجهاد قدر الامكان, عمل الحاجات دي بالاضافة للتقليل من استخدام التكنولوجيا, وانك متشتريش حاجة انتي مش محتاجاها, هيخلي حياتك افضل, وبالتالي صحة عقلية افضل.

5 طرق لزيادة هرمون السيروتونين “هرمون السعادة” في المخ