14 استخدام غير تقليدي للعسل مكنتيش تعرفيهم قبل كده
العسل من الحاجات اللي كتير من الناس بيحبوا يستخدموه للحلويات او لتحلية المشروبات كبديل صحي للسكر, لكن العسل هو اكتر من انه مجرد مكون للتحلية او بيدي طعم حلو, لكن العسل يعتبر مكون علاجي لانه بيحتوي على خصائص علاجية ومضادات حيوية وكانوا الفراعنة بيستخدموه كدواء اكتر من اي حاجة تانية, والنهاردة من خلال السطور الجاية هنتعرف مع بعض على فوايد واستخدامات العسل اللي اكيد هتجربي منهم في البيت.
فوايد واستخدامات العسل:
1- لعلاج الكحة:
العسل ممكن يستخدم لعمل قطرات لعلاج الكحة والتهاب الحلق, اللي هنعرف طريقتها مع بعض.
المكونات:
– 1 ½ كوباية مية.
– ½ كوباية عصير كريز اسود من غير سكر.
– اي نوع شاي اعشاب للبرد من اختيارك.
– قطعة جنزبيل متقشرة.
– ½ كوباية عسل.
– سكر بودرة.
الطريقة:
في حله كبيرة اخلطي المية وعصير الكريز والاعشاب والجنزبيل, وسيبي الخليط يغلي لحد ما المية تقل وتبقى ¼ كوباية, صفي الخليط لحلة او طبق تاني, دلوقتي ضيفي العسل للخليط اللي انتي صفتيه وحطيه على نار هادية مع التقليب المستمر, لكن متخليهوش يغلي بس اول ما تظهر فقاعات ورغوة على الوش ويسخن اوي ارفعيه من على النار, صبيه بسرعة في قوالب, او على ورقة خبز مرشوشة بالسكر البودرة, وبعد ما يبرد خالص خدي كل واحدة اغمسيها في السكر البودرة عشان ميلزقش في بعض والخطوة دي اختياري يعني ممكن متستخدميش السكر, خزنيها ياما ملفوفة في ورق خبز او ورق زبدة كل واحدة لوحدها, ولو هترشيه سكر حطيهم مع بعض في برطمان, واحفظيه في التلاجة, هيقعد معاكي لحد شهر او اكتر لو حفظتيه في الفريزر.
2- سكراب وماسك للبشرة:
العسل ممكن يستخدم كسكراب منظف او ماسك مرطب للبشرة, العسل من المكونات الطبيعية اللي بتحتوي على خصائص مطهرة ومضادة للبكتيريا, اللي بتساعد على ازالة خلايا الجلد الميت وتنضيف البشرة من الشوائب والبكتيريا.
عشان تستخدميه كسكراب في طبق صغير اخلطي 2 معلقة كبيرة شوفان مع معلقة كبيرة عسل, ولو مش متوفر عندك شوفان ممكن تستخدمي بداله قهوة مع العسل, وضيفي لهم 1 معلقة صغيرة مية دافية وقلبي المكونات مع بعض, وخدي من الخليط دلكي البشرة في حركات دائرية بالراحة لمدة 4 دقايق, وبعدين اغسليه بمية دافية.
لو عايزة تستخدميه كماسك ممكن تخلطي كميات متساوية من العسل وزيت جوز الهند وتقلبيهم مع بعض كويس, وتدهني بشرتك بالخليط وتسيبيه لمدة 15 دقيقة, وبعدين اغسليه بمية فاترة.
3- استخدام العسل كمضاد حيوي:
لو عندك اي جرح ممكن تحطي عليه عسل لتسريع الشفاء ولمنع البكتيريا وتلوث الجرح, والاختبارات اثبتت ان العسل ممكن انه يمنع انتشار البكتيريا او حتى قتلها تماما, والعسل كمان ممكن يستخدم كمضاد حيوي لو طبقتيه بشكل مباشر على اي جرح او قطع, وحطي في بالك دايما لما تيجي تشتري العسل كل ما كان لونه اغمق كل ما كانت خصائصة المضادة للبكتيريا اقوى.
4- تسريع عملية التمثيل الغذائي:
من الاستخدامات فعلا الغير متوقعة للعسل هي انه بيساعد في عملية التمثيل الغذائي, عشان كده هيكون مفيد جدا لاي شخص ماشي على نظام غذائي للتخسيس, كمان الشاي الاخضر من الحاجات اللي بتسرع عملية التمثيل الغذائي, عشان كده لو شربتي الشاي الاخضر متحلي بالعسل ده هيعمل دعم مزدوج لجسمك.
5- لعلاج الارق:
لكل الاشخاص اللي بيعانوا من الارق بننصحهم باكل العسل قبل النوم, لان السكر اللي موجود في العسل بيحفز انتاج السيروتونين, وهو الناقل العصبي المسؤول عن مزاجك الجيد اللي الجسم بيحوله لميلاتونين, وهي مادة كيميائية مهمة مسؤولة عن النوم, والمخ بينتج ميلاتونين اكتر لما بيعالج التريبتوفان اللي موجود في العسل ويحوله لسيروتونين.
6- لعلاج ندبات البشرة:
لو بتعاني من ندبات حب الشباب واضحة على البشرة وعايزة تعالجيها بطريقة طبيعية وفعالة, اخلطي كميات متساوية من العسل وزيت جوز الهند او زيت الزيتون, وادهني مكان الندبات بالخليط وسيبيه لمدة 15 دقيقة وبعدين اغسليه, هيساعد على علاج الندبات وتفتيح لونها.
7- تحسين النظر:
الخبراء اثبتوا قدرة العسل على تحسين النظر, لانه بيساعد على تنضيف العين لو غسلتيها بخليط من المية والعسل, او ممكن تخلطي العسل مع عصير الجزر مفيد جدا لتحسين النظر, وبيساعد على علاج التهاب الملتحمة, الجلوكوما, وتعب العين الناتج من التركيز فترات طويلة في شاشة الكمبيوتر او التليفزيون.
8- التخلص من ريحة الفم الكريهة:
الخصائص المضادة للبكتيريا اللي موجودة في العسل مفيدة جدا في التخلص من ريحة الفم الكريهة, ممكن تحضري من العسل غسول للفم, اخلطي معلقة صغيرة عسل مع 1/8 معلقة صغيرة قرفة و ½ كوباية مية دافية, واستخدمي الخليط كغسول للفم, والميزة في الطريقة دي انها كمان هتدي ريحة حلوة للفم بسبب القرفة.
9- لترطيب الكوعين والركبتين وعلاج جفاف الجلد:
كتير من الاشخاص بيعانوا من مشكلة جفاف الجلد وخصوصا عند منطقة الكوعين والركبتين, وعشان تتخلصي من المشكلة استخدمي العسل لوحده او خليط من العسل والزبادي لفرك الكوعين والركبتين واي منطقة جافة في الجسم, وسيبي الخليط على المكان لمدة من 15 – 30 دقيقة وبعدين اغسليه بالمية, هتتفاجئي من الترطيب والنعومة في المناطق دي.
10- العسل “ريد بول” طبيعي:
العسل بيحتوي على الجلوكوز والفركتوز اللي بيتم امتصاصهم بشكل مباشر في مجرى الدم, وبتمد الجسم بالطاقة في فترة قصيرة, وده يعتبر مفيد جدا للاشخاص الرياضيين بشكل خاص او اللي دايما بيشتركوا في مسابقات رياضية, العسل هيزود طاقتهم جدا.
11- العسل بيساعد على حفظ الفواكه:
العسل كمان بيساعد على حفظ الفواكه لفترة طويلة, اخلطي عسل مع المية بنسبة 1:10 يعني المية تكون ضعف كمية العسل 10 مرات, جربي الطريقة دي مع التوت والعنب او الفواكه الصيفية بشكل عام تقدري تخزنيها بالطريقة دي للشتا.
12- استخدام العسل في عمل مرطب للشفايف:
خلال موسم الشتا بشكل خاص كتير بيعانوا من جفاف الشفايف وتشققها, والمشكلة دي نقدر نحلها بعمل مرطب طبيعي للشفايف باستخدام العسل, اخلطي العسل مع شمع العسل وزيت جوز الهند وفيتامين E وزيت الزيتون, وسيحيهم مع بعض على حمام مية سخنة واحفظيه في علبة, واستخدميه كمرطب للشفايف هيساعد على تنعميها وترطيبها بشكل فعال جدا.
13- العسل للتخلص من قشرة الشعر:
العسل من الحاجات اللي ثبت فعاليتها في علاج قشرة الشعر, لو بتعاني من القشرة او فروة الراس الجافة, اعملي مزيج من 90% عسل و 10% مية دافية, وحطي الخليط على الشعر وفروة الراس وسيبيه 3 ساعات وبعدين اشطفيه, هتحسي ان الحكة خفت جدا من اول مرة, والقشرة هتختفي في خلال اسبوع.
14- العسل كبديل لكريم الحلاقة:
لو عايزة حاجة لازالة الشعر تكون طبيعية ومفيدة للبشرة في نفس الوقت العسل هيكون هو الاختيار المناسب, ولعمل كريم حلاقة من العسل اخلطي كمية من العسل مع المية الدافية عشان تعملي كريم طبيعي لازالة الشعر افرديه على اماكن الشعر واحلقيها بالمكنة بالطريقة العادية, مش بس هيخلصك من الشعر الزائد كمان هيساعد على منع التهيج وترطيب البشرة.
ماسكات من العسل لحل كل مشاكل البشرة
