لو عندك على الاقل 2 من ال 10 عادات دي مع شريكك..علاقتك هتستمر للأبد
الحياة الزوجية عشان تبقى سعيدة وتستمر بتعتمد على حاجات كتير, ولو انتي بتحاولي تحسني علاقتك او زواجك, النهاردة هنقولك من خلال السطور الجاية 10 عادات للازواج السعداء, لو انتي عندك اتنين منهم على الاقل مع شريكك يبقى علاقتكم هتستمر للابد.
عادات للازواج السعداء:
1- الاهتمامات المشتركة:
عادة والطبيعي لما بتهدا العاطفة والشغف اللي بيكون في اول العلاقة, مع الوقت كل طرف بيلاقي ان عنده اهتمامات مختلفة عن التاني, ايه اللي المفروض تعمليه لو لقيتي ده حصل؟ لازم تكون في اهتمامات مشتركة بينكم تعملوها مع بعض, واتأكدي انكم بتقضوا وقت كبير تعملوا الحاجة اللي انتوا بتحبوها وبتستمتعوا بيها مع بعض.
2- بتناموا تقريبا في نفس الوقت:
زي ما كنتي بتعملي في اول الجواز ان وقت النوم واحد, استمري على العادة دي لو عايزة الحياة الزوجية تستمر سعيدة, وحاولي انك تتجنبي ان كل واحد ينام في ميعاد مختلف عن التاني.
3- امشوا ماسكين ايدين بعض او جنب بعض:
ظاهرة يمكن بنشوفها كتير جدا ان بعد الجواز بفترة بتلاقي اي اتنين متجوزين بيمشوا في الشارع كل واحد في ناحية, حتى احنا في العادة لما بنشوف المنظر ده بنقول دول اتنين متجوزين بقالهم فترة, لكن لو ماسكين ايدين بعض بنقول دول مخطوبين او متجوزين جديد, عشان كده بنقولك لو عايزين تحافظوا على السعادة لازم تحافظوا على العادة دي زي اول الجواز بالظبط امشوا ماسكين ايدين بعض او امشوا جنب بعض, واهم حاجة ان كل طرف يكون شريكه هو اهم حاجة عنده وميهتمش باللي هيفكر فيه او هيقولوا الناس.
4- الثقة في الشريك والاستعداد للتسامح:
في معظم الحالات هنلاقي الازواج السعداء هما اللي في بينهم ثقة وتسامح اكتر من الازواج اللي عندهم عدم ثقة بينهم وبين بعض ومش بيسامحوا بسهولة.
5- التركيز على الحاجات الحلوة وتجاهل الحاجات الغلط:
لو عايزين الحياة تستمر سعيدة بينكم, يبقى لازم كل طرف يركز على الحاجات الحلوة وعلى الجانب الايجابي في شريكه, ويحاول يتجاهل الحاجات الغلط او الجوانب السلبية, لان في النهاية مافيش حد كامل كل انسان فيه عيوب, اهم حاجة ان كل طرف يتقبل عيوب التاني ويقدر يتعامل معاها بشكل صح.
6- احضنوا بعض بعد الشغل:
سواء انتوا الاتنين بتشتغلوا او انتي في البيت ومستنياه يرجع من الشغل, خلوا المقابلة اللي بعد الشغل يكون الاستقبال بحضن دافي جميل, الحضن ده هيفرق كتير جدا وهيغير المود وهينسى كل تعب اليوم.
7- قولوا “بحبك” و “قضي يوم حلو” لبعض:
الكلمات البسيطة دي ليها تأثير ايجابي جدا, وبتزود المودة والحب والتسامح بين الشريكين, الكلمات دي ممكن جدا تحسن العلاقة خصوصا في ظل الحياة الصعبة والضغوطات اللي احنا بنعيشها كل يوم, قولوا لبعض كلمة “بحبك” الصبح او في نص اليوم كده برسالة حتى, وفي اول يوم كل واحد يتمنى للتاني انه يقضي يوم حلو, التفاصيل البسيطة دي بتفرق اوي في الحياة الزوجية.
8- قولوا “تصبح على خير” لبعض:
قبل النوم كل طرف يقول للتاني “تصبح على خير” حتى لو قابلها كنتوا متخانقين او في بينكم خلاف او نقاش حاد, لان الكلمة دي هتفهم الطرف التاني انه بغض النظر عن الخلاف ده مش هيأثر على العلاقة بينكم بأي شكل.
9- كلموا بعض خلال اليوم:
كل طرف يخصص للتاني وقت في نص اليوم يتصل بيه يطمن عليه وعلى يومه سواء لو كان في البيت او في الشغل, الطريقة دي هتحسس الشريك بالاهتمام, وده هيحسن العلاقة والحياة الزوجية.
10- خليكي فخورة بشريك حياتك:
الازواج السعداء دايما بيكونوا فخورين ببعض, ومافيش حد بيخجل من التاني مهما كان, وكل طرف بيحسس التاني بالتقدير والاحترام.
في النهاية اهم حاجة لعلاقة سعيدة وسليمة هي المحادثة, انكم تتكلموا مع بعض دايما في كل حاجة, حلوا مشاكلكم من خلال الكلام مع بعض, خليكي صبورة, اسمعي شريكك, ادعميه في كل حاجة, اعملوا حاجات جديدة في حياتكم, جددوا الشغف والعاطفة بينكم, اتأكدوا انكم بتعملوا كل الحاجات دي مش هيبقى في اي مشاكل في علاقتكم, وهتكونوا اكيد من الازواج السعداء.
ليه الازواج اللي بيتخانقوا مع بعض سعدا اكتر وعلاقتهم بتستمر
