للحصول على مانيكير مثالي يوم فرحك..ايه اللي تعمليه واللي تتجنبيه في العناية بضوافرك

بقلمريهام محمود فيأظافر visibility393

يوم الفرح اليوم اللي هتنقلي فيه الدبلة من ايدك اليمين لايدك الشمال, وده معناه ان التركيز هيكون على ايدك وهتتصور صور خاصة عشان تحفظي ذكرى اللحظة دي, عشان كده لازم تكون ايدك وضوافرك شكلهم حلو عشان تكوني حابه الصور وانتي بتتفرجي عليها في المستقبل وتبقى ذكرى حلوة ليكي, وعشان ده يحصل لازم يكون في عناية بالايد والضوافر قبل الفرح باسابيع, والنهاردة من خلال موضوعنا هنقول لكل عرايس بنات حوا طريقة الحصول على مانيكير فرح مثالي وايد مثالية, وهنعرف مع بعض ايه اللي تعمليه واللي تتجنبيه في العناية بايدك وضوافرك.

مانيكير فرح مثالي وايد مثالية:

اللي المفروض تتجنبيه:

– متعمليش باديكير للضوافر وبعدين تستخدمي تان سبراي او تان لوشن, لان كتير من العرايس بيحبوا ياخدوا لون تان مختلف قبل يوم الفرح, والمفروض انه يتعمل في اقرب وقت من ميعاد الفرح بقدر الامكان, لكن مع ذلك لو عملتي استخدمي التان سبراي بعد ما تعملي ضوافرك باديكير ده ممكن يأثر على لون الجلد اللي حوالين الضوافر ويخلي لونها غامق.

– مترسميش الضوافر لو انتي مجربتيش ترسميهم قبل كده, دايما حطي في بالك ان يوم الفرح ميبقاش يوم التجارب يعني متعمليش حاجة مجربتيهاش في وقت قبل كده عشان متتفاجأيش بالنتيجة ويطلع الشكل مش حلو وتبقي متضايقة, حاولي بس تختاري لون حلو وتعملي فينش بسيط وسيمبل مش لازم تعملي حاجة اوفر اوي وتديكي نتيجة مش حلوة في الاخر.

– متعمليش المانيكير بدري اوي, لو هتعملي مانيكير جل متعملييهوش بدري اوي قبل الفرح هو صحيح ان المانيكير الجل بيدوم فترة طويلة, لكن قبل الفرح بيكون عندك حاجات كتير تتعمل وهتستخدمي ايدك كتير ممكن يبوظ منك بالكتير هيبقى حلو اول اسبوع بس, عشان كده لازم تعملي جدولة للعناية بالضوافر زي البشرة والشعر, وكل ما كانت الحاجة فريش اكتر واقرب ليوم الفرح هتبقى افضل.

– حافظي على الضوافر والايد بقدر الامكان قبل الفرح بفترة من المواد الكيميائية او اي مواد تنضيف والمية السخنة عشان كل الحاجات دي هتأثر بشكل سلبي على شكلها.

مانيكير فرح مثالي
مانيكير فرح مثالي

ايه اللي المفروض تعمليه:

– دلعي ايدك, خليكي حريصة انك تختاري انواع كريمات جودتها كويسة لترطيب الايد بشكل يومي, واعملي مساج للايد يوميا, وشوفي لو في اي بقع في الايد اتخلصي منها باستخدام كريم تفتيح.

– قبل الفرح جربي مجموعة الوان مانيكير على ايدك عشان تعرفي ايه انسب لون او اللي شكله احلى على ايدك.

– بعد ما تختاري اللون اللي هتحطي منه يوم الفرح هاتي منه اكتر من ازازة, تحسبا لاي ظرف يكون عندك ازازة للطواريء لازم في اليوم ده تكوني عاملة حساب لاي حاجة ممكن تحصل, وكمان عشان اللون اللي انتي اختارتيه يبقى عندك لانك اكيد هتستخدميه تاني بعد كده.

– جربي مجموعة الوان المانيكير على نفسك وعلى الوصيفات بتوعك في يوم الفرح, لان اكيد لون المانيكير هيبان مختلف حسب لون كل بشرة, في الحالة دي الاختيار هيكون للدرجة الاغمق او الافتح من اللون حسب كل واحدة هيناسبها ايه اكتر.

– خدي اللون بتاعك لمتخصصة المانيكير, لانك انتي خلاص اختارتي اللون وعارفة انتي عايزة ايه, وهي ممكن ميكونش عندها نفس اللون, او حتى يكون المانيكير عندها قديم او جودته مش حلوة وبالتالي النتيجة هتطلع سيئة في الاخر, عشان كده خليكي عاملة حسابك وخدي حاجتك معاكي ولما تخلصي خديها معاكي تاني.

مانيكير فرح مثالي
مانيكير فرح مثالي

دلوقتي بعد العناية المناسبة لضوافرك وعرفتي ايه اللي تعمليه وايه اللي تتجنبيه هتضمني ان صور ايدك هتطلع حلوة في صور الفرح وهتبقى ذكرى جميلة عندك, وفي النهاية ضروري انك تهتمي بكل تفاصيل طلتك يوم الفرح قبلها بفترة, من اول العناية بالبشرة والشعر والضوافر واختيار الفستان عشان تبقي مستعدة وتطلعي بشكل مثالي.

تصميم لرسم ضوافرك يوم فرحك خطوة بخطوة بالصور

تصميم لرسم ضوافرك يوم فرحك