19 فايدة مذهلة للكمون للبشرة والشعر والصحة
الكمون واحد من التوابل المشهور استخدامها جدا في المطبخ الهندي ومن الانواع اللي بتدي للاكل نكهة مختلفة ومميزة, لكن الكمون هو مش مجرد نوع توابل بنستخدمه في الاكل, لكن ليه فوايد تانية كتير للبشرة والشعر والصحة بشكل عام, والنهاردة من خلال السطور الجاية هنتعرف على فوايد الكمون للبشرة والشعر والصحة وازاي تستخدميه.
فوايد الكمون للبشرة:
1- علاج حب الشباب والدمامل:
الدمامل لما بتظهر على البشرة ده معناه تراكم مواد سامة في الجسم, والاستخدام المنتظم للكمون في اكلاتك بشكل يومي هيحافظ على بشرتك ويحميها من الدمامل والطفح الجلدي والبثور وغيرها من المشاكل الجلدية, لان الكمون بيحتوي على مكونات بتساعد على ازالة السموم من الجسم من خلال تنظيم عملية الهضم والاخراج اللي هنتخلص عن طريقها من كل السموم من الجسم.
ولو بتعاني من حب الشباب والدمامل, ممكن تخلطي كمون مطحون مع الخل وتطبقيه على البشرة, مع الانتظام عليه هيخلصك من المشكلة.
2- علاج اضطرابات الجلد:
الكمون بيحتوي على نسبة عالية من فيتامين E اللي بيحافظ على نضارة وصحة البشرة, بالاضافة ان الكمون بيحتوي على خصائص مطهرة ومضادة للفطريات بتحمي البشرة من الالتهابات الفطرية والميكروبية, خلط الكمون المطحون بالمية وتطبيقه على مكان البثور والدمامل والحبوب والاكزيما والصدفية وغيرها من الامراض الجلدية بيساعد على علاجها بشكل سريع, الكمون كمان مصدر غني بالالياف الغذائية اللي بتساعد في عملية تنضيف وازالة السموم.
3- مكافحة التجاعيد:
فيتامين E اللي موجود في الكمون يعتبر مضاد للشيخوخة, وبيمنع ظهور اعراض الشيخوخة المبكرة, ويعتبر مضاد للاكسدة اللي بتمنع الجذور الحره اللي بتهاجم الجلد وبتسبب التجاعيد وبقع العمر وترهل الجلد, ومزيج مضادات الاكسدة والخصائص المضادة للبكتيريا الموجودة في الكمون بتشتغل مع بعض بشكل رائع جدا للحفاظ على بشرة صحية ونضرة لفترة طويلة.
4- علاج الحكة وحرارة الجسم:
لو بتعاني من حرارة الجسم وحكة الجلد, تقدري تضيفي بذور الكمون للمية المغلية تنقعيه شوية اعملي كمية تكفي جسمك, ومجرد ما يبرد, خدي حمام بالمية دي.
5- علاج حرقان او حساسية الجلد:
شرب مية الكمون ممكن تساعد على علاج حرقة او حساسية الجلد اللي بتحصل في الكفين والقدمين.
كل اللي هتعمليه ضيفي معلقة صغيرة من بذور الكمون ل 4 لتر مية وتغليهم, وبعدها ارفعيه من على النار وغطيه, ممكن تشربي من المشروب ده كل ما تحسي بالعطش او بعد الوجبات, والافضل تشربيه وهو دافي عشان يديكي احسن نتيجة.
6- وصفة الكمون لبشرة متوهجة:
اخلطي الكركم المطحون مع الكمون المطحون بنسبة 3:1 يعني يكون كمية الكركم 3 اضعاف كمية الكمون, لو هتحطي 3 معالق صغيرة كركم يبقى ضيفي عليهم 1 معلقة صغيرة كمون.
عشان تحضري الخليط اعجني الكركم والكمون بعسل النحل, افردي الخليط على البشرة وسيبيه لحد ما ينشف وبعدين اغسليه بالمية.
الخليط ده هيخلي البشرة ناعمة ومتوهجة جدا, بالاضافة لفوايد الكمون والكركم العسل كمان بيساعد على تهدئة الانسجة الملتهبة, وبيخلي التوابل متبقاش جافة اوي على البشرة.
ولو بتعاني من حروق الشمس او حب الشباب او بقع الجلد, ممكن تعجني خليط الكركم والكمون بالزبادي بدل العسل.
وبعد ما تغسلي وشك من الماسك ادهنيها بزيت الجوجوبا.
فوايد الكمون للشعر:
الشعر بيتكون من مجموعة من العناصر الغذائية زي البروتين والدهون والمية والكربوهيدرات, والعناصر الغذائية دي مطلوبة عشان تساعد الشعر على النمو, والكمون الاسود او المعروف “بحبة البركة” بيحتوي على اكتر من 100 من الفيتامينات والمغذيات اللي بتساعد على تجديد الشعر وبتحافظ عليه صحي.
7- علاج تساقط الشعر:
الكمون الاسود او حبة البركة معروف انه بيساعد على علاج تساقط الشعر والصلع والشعر الخفيف.
اخلطي كميات متساوية من زيت الكمون الاسود “زيت حبة البركة” وزيت الزيتون حسب كثافة وطول شعرك, وبعد ما تغسلي شعرك حطي الخليط على الشعر من الجذور للاطراف مع التدليك وركزي على الاماكن اللي فيها صلع او فراغات, غطي الشعر بكيس بلاستيك وسيبيه لمدة من 30 دقيقة لساعة وبعدين اغسليه, هيساعد على تحفيز نمو الشعر ومنع التساقط.
ممكن كمان تستخدمي كبسولات زيت حبة البركة بشكل منتظم لمدة كام شهر لحد ما تتخلصي من المشكلة.
8- لشعر طويل وبيلمع:
ضيفي 1 ½ معلقة كبيرة من بذور الكمون الاسود “حبة البركة” ل ¾ كوباية مية واغليهم مع بعض لمدة 10 دقايق, ولما الخليط يبرد صفية بالمصفى, ضيفي صفار بيضة لمية الكمون الاسود اللي طلعت عندك واخلطيهم مع بعض كويس وممكن تضيفي للخليط كمان 1 معلقة صغيرة زيت زيتون “اختياري”, دلكي فروة الراس بالخليط, وسيبيه على الشعر لمدة من 30 دقيقة لساعة وبعدها اغسليه بالمية.
كرري الوصفة دي مرة كل اسبوع او مرة كل اسبوعين لافضل النتايج.
9- علاج قشرة الشعر:
تدليك فروة الراس بزيت الكمون الاسود او حبة البركة بيساعد على علاج قشرة الشعر مع الاستخدام المنتظم.
فوايد الكمون الصحية:
10- بيحافظ على مستويات الدم في الجسم:
يساعد على الكمون خفض مستويات السكر في الدم وبالتالي بيحافظ على مستويات محتوى الدم المناسبة في الجسم, وده يعتبر فايدة كبيرة جدا للاشخاص اللي بيعانوا من مرض السكر بشكل خاص.
11- غني بالحديد:
بذور الكمون غنية جدا بالحديد, وده بيخليها عنصر اساسي للحفاظ على الصحة بشكل عام, لان الحديد بيساعد على علاج فقر الدم, وبيخلي الدم غني بمحتوى الهيموجلوبين, كمان بيساعد على العمل كحامل للاكسجين لكل خلايا الجسم.
12- بيحارب الربو:
بذور الكمون بتحتوي على مادة الثيموكينون اللي بتقلل من العمليات الالتهابية اللي بتسبب الربو.
13- تقوية مناعة الجسم:
بسبب الخصائص المضادة للاكسدة اللي موجودة في الكمون بيساعد على تحسين مناعة الجسم بشكل افضل في مكافحة الامراض المختلفة.
14- علاج فقر الدم:
زي ما قولنا ان الكمون غني جدا بالحديد وده ضروري لتشكيل الهيموجلوبين في الدم, وده بدوره مطلوب لنقل الاكسجين في الجسم, عشان كده لو دخلتي الكمون في نظامك الغذائي بانتظام هيحميكي من فقر الدم.
15- تنظيم الدورة الشهرية:
الكمون صحي للنساء بشكل خاص من جميع الفئات العمرية, ومعروف عنه انه بيساعد على تنظيم الدورة الشهرية.
16- علاج السرطان:
الكمون من الحاجات اللي ممكن تساعد في علاج سرطان القولون والثدي, لانه بيحتوي على مجموعة من العناصر اللي تعتبر مضادة للسرطان.
17- للبرد والتنفس:
الكمون غني بفيتامين C وخصائص مضادة للفطريات, وده يساعد في علاج مشاكل البرد وغيرها من مشاكل الجهاز التنفسي, كمان الكمون يعتبر مفيد جدا لصحة الكلى.
18- تحسين عملية التمثيل الغذائي:
عملية الايض او التمثيل الغذائي لما تكون كويسة او ماشية بشكل سليم بتحافظ على جميع عمليات الجسم التانية تحت السيطرة, والحديد الموجود في الكمون بيساعد على الحفاظ على النشاط الايضي او التمثيل الغذائي بشكل صحيح.
19- تحسين عملية الهضم:
الكمون بيحتوي على انزيمات بتساعد على تكسير الاطعمة, وبالتالي ده بيساعد على تسهيل وتحسين عملية الهضم.
ازاي تختاري الكمون وتخزنيه:
الكمون هنلاقيه متوفر في الاسواق والسوبر ماركت وعند العطارين لكن لازم ناخد بالنا من شوية حاجات لما نيجي نشتريه.
– دايما اشتري بذور الكمون السليمة وبلاش المطحون, لان المطحون بيفقد فوايدة ومذاقة بسرعة اكبر, ده غير ان المطحون ممكن يكون مغشوش او مخلوط.
– لو انتي عايزة تستخدمي كمون مطحون, يبقى هاتيه بذور واطحنيه بنفسك في البيت في الكبة او بالهون.
– زي اي نوع بهارات مجففة اختاري النوع الاورجانيك او العضوي, لانها بتكون صحية اكتر ومش متعرضة لاي مواد كيمائية او اشعاع.
– لما تيجي تشتريه اعملي اختبار جودة بسيط كده حطي حبه كمون بين صوابعك الابهام والسبابة واضغطي عليها اوي, لو لقيتي انها طلعت ريحة قوية وحلوة ده معناه انها بذور جودتها عالية.
– المفروض ان البذور متكونش متكسرة تكون سليمة, ومعبئة بشكل كويس.
– حمصي بذور الكمون قبل اضافتها لاي اكلة عشان تديكي نكهة احلى واقوى في الاكل.
– الافضل انك تشتري التوابل من المحلات الشعبية والاسواق او العطارين في منطقتك افضل من السوبر ماركت لانها بتكون طازة اكتر وجودتها اعلى بالمقارنة باللي معبئة بقالها فترة في السوبر ماركت.
التخزين:
– خزني بذور الكمون او الكمون المطحون في برطمان نضيف محكم الغلق في مكان بارد وضلمة وجاف.
– تقدري تخزنيه لكذا شهر, وتطحني من البذور كل مرة على قد احتياجك.
– ممكن تخزني بذور الكمون والكمون المطحون في التلاجة في برطمان محكم الغلق.
– لو عندك كمون مطحون الافضل تخلصيه في اقرب وقت لانه بيفقد نكهته بسرعة.
– بذور الكمون ممكن تفضل طازة وتقعد معاكي لحد سنة كاملة, لكن الكمون المطحون فترة صلاحيته اقصى حاجة 6 شهور.
16 استخدام جمالي لزيت الخروع للبشرة والشعر والضوافر
