ليه الازواج اللي بيتخانقوا مع بعض سعدا اكتر وعلاقتهم بتستمر
حسب كلام المتخصصين واستطلاعات الرأي بين المتزوجين, 44% من المتزوجين صرحوا ان الخناق اكتر من مرة في الاسبوع بيساعدهم انهم يحافظوا على علاقات صحية ومثمرة لفترة طويلة, فالواقع ان الازواج اللي بيتخانقوا ولكن بطريقة سليمة هما فعلا من اكتر الازواج المتوقع انهم يستمروا مع بعض لانهم على رغم كل خناقة من وقت للتاني او سوء تفاهم صغير بينهم بيعرفوا انهم بيحبوا بعض حب صادق وحقيقي, والنهاردة من خلال موضوعنا هنعرف مع بعض ليه الخناقات مفيدة لعلاقتك.
ليه الخناقات مفيدة لعلاقتك:
1- الخناق علامة على ان العلاقة ناضجة:
تجنب الخلاف بشكل مستمر هو مش افضل طريقة لعلاقة طويلة, لكن على العكس لو انتي قادرة تعبري عن رأيك بشكل واضح اثناء الجدال, ده معناه انك عندك قدرة لنقل محبتك لمستوى تاني.
والاشخاص الناضجين دايما في اوقات الخلاف مش بيلجأوا انهم يصرخوا او يعلوا صوتهم ويهاجموا الطرف التاني بشكل عنيف, لكن بدل كده بيحاولوا انهم يوصلوا لحل وسط بحجج منطقية وعقلانية وبيحاولوا تحسين علاقتهم.
2- الخناق معناه انك مهتمة:
اكيد هيكون من الاسهل ان تتغاضي او تفوتي بعض الحاجات اللي انتي مش حباها في شريكك وبتضايقك منه, لكن الحقيقة لو انتي مستعدة تتحملي عدم الراحة والجدال والخناق عشان توصلي لنتيجة افضل معاه في المستقبل ده علامة ان حبك حقيقي لشريكك.
بمعنى تاني الخناق معناه انك اكتر التزام في العلاقة, لكن دايما خليكي فاكرة كده كام مرة مثلا ممكن تتخانقي مع اخوكي او اختك؟ هينطبق نفس الشيء مع شريكك. ولو دايما بتدخلي في جدال كبير مع شريكك وبيعدي او بيتحل في النهاية فده معناه انك بتحبيه حب صادق.
3- الخناق بيخلي التواصل اسهل:
عشان تخلقي الثقة في علاقتك يبقى لازم تتجنبي الصمت, لانه على العكس, ضروري يكون في تواصل مع شريكك بعق مفتوح ومتقبل لكل الاراء, مع تحمل مسئولية افعالك, وكل واحد يسمع التاني كويس.
وبما ان الخناق هو واحد من اشكال التواصل الرئيسية, فهو بيساعد فعلا على تسريع مشاعر الحميمية والثقة والتواصل بين الطرفين, وتعليم شريكك طريقة التواصل معاكي بطريقة مثمرة وايجابية اكتر.
4- الخناق علامة على وجود علاقة صحية:
يعتقد علماء النفس ان في 7 نقط رئيسية لعلاقة صحية وسعيدة, والخناق او الجدل واحد منهم, والحقيقة ان الزوجين مش بيتخانقوا خالص دي علامة على ان في حاجة مش مظبوطة في علاقتهم.
والجدال بيساعد الطرفين انهم يعيدوا النظر في قيمهم ومشاعرهم من خلال مناقشة الحاجات المهمة بالنسبة لهم, ومع ذلك لازم تكون حجتك او اسبابك صحية ومتزودش الخناق او تكبره, حاولي دايما تحددي نقط معينة تتناقشي فيها من غير ما تصرخي او تعلي صوتك.
5- الخناق بيخلي التواصل اقوى:
لما بتدخلي في جدل مع شريكك, مش مهم مين كسب ومين خسر فيه, لكن المهم اكتر هو انكوا هتتعلموا اكتر عن بعض وتفهموا بعض اكتر, والاهم من ده انك هتتعلمي اكتر عن نفسك.
لان الخلافات الصغيرة بتساعد على كشف طبيعة وحقيقة شخصية الطرف التاني وازاي تقدري تتعاملي معاها, ولو قدرتوا انكم تتغلبوا على كل التحديات والخلافات مع بعض, ده هيعلم الوصول لحل وسط وتقوية الروابط بينكم.
6- الخناق بيقلل من غضبك:
انك تكوني في علاقة ده مش بالسهولة اللي انتي متوقعاها, ولو انتي مهتمة بشريك حياتك, يبقى لازم تقدري مشاعره واحتياجاته الخاصة, ولو هو معملش نفس الشيء معاكي اكيد هتحسي بغضب واستياء.
ولما انتي مش هتدافعي عن حقك او مش هتعبري عن غضبك ان شريكك مش حاطط مشاعرك ولا احتياجاتك الخاصة في اعتباره, ده هيخليه يفكر ان هو ممكن ياخد اي حاجة ويعمل اي حاجة, وبالتالي غضبك في الحالة دي هيزيد, وده يعتبر الطريق لعلاقة غير صحية.
وافضل طريقة للتعامل مع المشكلة دي انك تحطي مشاعرك السلبية ورا ضهرك, وتوضحي لشريكك انكم متساويين في كل حاجة.
7- الخناق معناه انكم هتستمروا مع بعض:
حسب بعض الدراسات, ان اكبر غلطة ممكن يقع فيها الزوجين هي التجنب, لما نحس دايما ان في حاجة غلط ومع ذلك مش بنتكلم ولا نصرح بيها, والتواصل الضعيف ده بين الطرفين يعتبر واحد من اكتر اسباب الانفصال المنتشرة.
وعلى الرغم انك ممكن تفكري ان مناقشة المشاكل الحساسة مش هتفيد علاقتك, لكن ده في الحقيقة مش صح, لكن الخلاف او الخناق هيسمح لك انك تركزي على مشاكلك وتحليها قبل ما تكبر اكتر, وده السبب ان الازواج اللي بيتجادلوا او بيتخانقوا بيستمروا مع بعض لفترة طويلة.
8- الخناق بيظهر شغفك:
بعض الازواج عندهم حس انفعالي قوي او او حاد في الخناق لان ده بيزود من مستويات هرموناتهم, والاشخاص اللي من النوعية دي بيشوفوا ان الخناق او الخلاف هو علامة عن شغفهم في الحياة.
لو عايزة تحافظي على علاقة قوية ومزدهرة, يبقى ضروري انك تطلعي مشاعرك من وقت للتاني بدل ما تكتميها جواكي, ولكن متنسيش في النهاية انك تنهي الخلاف بطريقة ايجابية.
9- الخناق بيحميكي من الملل:
في جملة مشهورة كده دايما بتتقال “الخناق هو ملح العلاقة” وده صح لحد كبير, لان مهما كانت علاقتك بقالها سنين لكن هتلاقي دايما ان في حاجات مش بتوافقي عليها, وده مش حاجة سيئة ابدا, والخناقات ممكن تساعد في اثارة شرارة العلاقة وتخليها مثيرة اكتر.
يعني تخيلي بس الحب والعلاقة هتكون مملة قد ايه لو انتي دايما موافقة على كل حاجة, عشان كده مافيش داعي للقلق لما تحسي انك عايزة تتخانقي مع شريكك, وحاولي تخليه مفيد لعلاقتك وحياتك المستقبلية معاه.
ازاي الخناق يكون صحي مع شريك حياتك:
مهم دايما انك تفتكري في فرق ما بين “الخناق الجيد” و “الخناق السيء”, والجيد بس هو اللي هيكون مفيد لعلاقتك.
هنقولك شوية نصايح تمشي عليها عشان تحولي الخلاف لمناقشة مثمرة:
– احترموا بعض, واعرفوا ان كل واحد ليه نقط الضعف الخاصة بيه, عشان كده المفروض مافيش طرف يضغط على نقط ضعف الطرف التاني ويضغط على الحاجات اللي ممكن تأذي الشريك وتجرحه بشكل مينفعش يتصلح او يتداوى.
– اعتذري لو غلطانة, لو اي طرف حس انه غلطان لازم يعترف بده ويعتذر, وده مش معناه ضعف ابدا بالعكس, ده هيبين لشريكك انك مهتمة بيه.
– التزمي بالنقطة دي جدا انك متبدأيش تعرضي كل اخطاء شريكك اللي عدت خلاص, يعني تجمعي كل حاجة غلط عملها قبل كده, خليكي دقيقة ومركزة على نقطة الخلاف وبس.
– مدخليش اطراف تانية يف الخلاف سواء اصحاب او قرايب, لان ده هيحسس شريكك بعد الاحترام, عشان كده الافضل انك تبذلي اقصى ما عندك عشان تحلي المشكلة بنفسك قبل ما تفكري انك تدخلي شخص تاني.
كام مرة بتتخانقي مع شريك حياتك؟ وهل دايما بتوصلي لحل وسط؟ شاركونا تجاربكم.