ايه اللي بتقوله عادات الاكل بتاعتك عن شخصيتك!
ممكن يكون معظم الناس ميعرفوش ان عاداتنا الغذائية هي نافذة لشخصياتنا, وخبيرة الطعام السلوكي “جولييت بوجوسيان” اكتشفت ان في علاقة قوية جدا بين طريقة الاكل والطريقة اللي بنتصرف بيها, وبتقول ان عاداتنا الغذائية هي عادات غريزية جدا, يعني مهما حاولنا اننا نخبيها هتظهر في النهاية, يعني كل اللي هتعمليه انك تبصي كويس لطريقة اكل شخص معين هتكشفلك شوية من صفاته الشخصية, والنهاردة من خلال المقال بتاعنا هنقولك عادات الاكل ممكن تقول ايه عن شخصيتك من خلال اشهر انماط الاكل المنتشرة.
عادات الاكل ممكن تقول ايه عن شخصيتك:
1- الشخص اللي بياكل ببطء:
ممكن يكون الاكل ببطء من اكتر الحاجات المزعجة خصوصا لو انتي خلصتي ومنتظرة شخص تاني يخلص اكله, ومع ذلك الاشخاص اللي بياكلوه ببطء ومش بيخلصوا بسرعة, من نوعية الاشخاص اللي بيحبوا يستمتعوا بكل لحظة في حياتهم من غير استعجال, وهتلاقيهم ماشيين على الاسلوب ده في الشغل وفي حياتهم الشخصية, وفي بعض الاحيان البطء ده ممكن يخليهم يفقدوا الاحساس بالوقت, والصفة دي ممكن تزعج الاشخاص اللي بيشتغلوا معاهم بسبب انهم بياخدوا وقت طويل في انهاء مهمة واحدة وللانتقال لمهمة تانية.
2- الشخص اللي بياكل بسرعة:
الاشخاص اللي بياكلوا بسرعة وممكن يخلصوا الطبق بتاعهم في 5 دقايق, دول اللي ممكن انهم يعملوا اكتر من مهمة في وقت قياسي او يعملوا كذا مهمة في نفس الوقت, والاشخاص اللي بياكلوا بسرعة مش ممكن يفوتوا الميعاد النهائي لتسليم او انهاء مهمة معينة, وعادة كمان هتلاقيهم بيخلصوا المهمة قبل ميعادها بيوم او اتنين, بيكونوا اشخاص حماسيين ومنافسين جدا, لكن احيانا سرعتهم دي ممكن تخليهم يفقدوا بعض اللحظات المهمة في الحياة, كمان بيكونوا اشخاص اوفياء جدا وبيلتزموا بتنفيذ وعودهم لدرجة انهم بيسنوا يهتموا بنفسهم.
3- الشخص اللي صعب ارضاءه في الاكل:
الشخص ال Picky او الانتقائي اللي بيكون صعب انه يرضى باي حاجة, مش ممكن يكون موجود في مطعم من غير ما يسأل عن المكونات ويطلب حذف مكونات معينة او اضافتها, الاشخاص اللي من النوعية دي بيبقوا مبسوطين اوي في منطقى الراحة الخاصة بيهم “Comfort zone”, وبياخوا جدا انهم ياخدوا خطوات جديدة في حياتهم اللي ممكن تكشف حاجات ميعرفوهاش عن نفسهم, هتلاقيهم مش بيقبلوا غير بالوظائف اللي يعرفوها كويس جدا ومش بيتحملوا اي مخاطر خوف منهم انهم ممكن يفشلوا, لكن مع ذلك هما من النوع اللي بيحب يسأل كتير ويتعلموا بعض الحاجات اللي مكنوش يعرفوها قبل كده.
4- الشخص اللي بينظم الاكل في الطبق:
هنلاقي الاشخاص اللي من النوعية دي بيكرهوا جدا ان الاكل المختلف يلمس بعض في الطبق, لانهم من نوعية الاشخاص اللي بيحبوا كل حاجة منظمة ومترتبة جدا وده بيخليهم اشخاص كويسين جدا في شغلهم, وبيقدروا يسيطروا على المهام بتاعتهم بشكل كامل, هتلاقي في الغالب بيتهم نضيف ومترتب لانهم بيكرهوا الفوضى جدا, وممكن انهم يحسوا بتوتر لو لقوا اي حاجة هما مخططين لها مش ماشية زي ما هما عايزين, وهيبقوا محتاجين انهم يوصلوا لحل وسط عشان يحافظوا على صحتهم من التوتر الزايد.
5- الشخص اللي بيخلط كل الاكل في طبق واحد:
الاشخاص اللي بيخلطوا كل الاكل في طبق واحد وبياخدوا كمية صغيرة من كل صنف في نفس الطبق, الاشخاص دول عادة بيكونوا ودودين وصريحين جدا, وبيحبوا يتحملوا مسئولية اكتر من مهمة في شغلهم, وبيحبوا شغلهم جدا, لكن في نفس الوقت بيعرفوا يخصصوا وقت لاصحابهم وللناس اللي بيحبوهم, وعادة بيعرفوا يبنوا علاقات صحية في حياتهم, لكن مع ذلك في بعض الوقت بسبب انهم بيعملوا اكتر من مهمة في نفس الوقت ده يستنزف وقتهم ويخليهم ميخلصوش المهام بتاعتهم في الوقت المحدد ليها, وكمان يستنزف عقلهم وطاقتهم زيادة.
6- الشخص المغامر:
الاشخاص اللي دايما بيحبوا يجربوا الاطباق والاكلات الغريبة ولما يروحوا مطعم بيطلبوا اغرب طبق, عادة النوعية دي من الاشخاص ممكن يعملوا مخاطرة من غير ما يخافوا انهم يفشلوا, وهتلاقيهم بيحبوا يعملوا افكار مجنونة, وبيحبوا دايما يخرجوا من منطقة ال Comfort zone وتجربة حاجات جديدة, دايما نظرة الناس ليهم انهم اشخاص مش مملين, وبيعجب بيهم اشخاص كتير بسبب روح الشجاعة والمخاطرة اللي فيهم, لكن مع ذلك لازم يكونوا حذرين من الضغط على الاشخاص اللي حواليهم انهم يبقوا مغامرين زيهم, لان اكيد مش الكل مهيء او شخصيتة ممكن تتحمل المخاطرة.
7- الشخص اللي بياكل صنف واحد كل مرة:
في اشخاص كتير بيحبوا ياكلوا صنف او طبق واحد يخلصوه الاول وبعدين يبدأوا ياكلوا صنف تاني, العادة دي في الاكل بتدل ان الشخص ده بيهتم بالتفاصيل, وبيفكروا في كل حاجة بعناية جدا, وده السبب انهم دايما بيكونوا اشخاص ناجحين جدا في اللي بيعملوه, وبيشوفوا التفاصيل الصغيرة اللي ممكن تفوت على اللي حواليهم, لكن مع ذلك لازم يكونوا صبورين مع غيرهم من الاشخاص اللي معندهمش نفس الصفة دي او نفس الاستراتيجية في تنفيذ المهام.
8- الاشخاص اللي بيمضغوا الاكل بصوت عالي:
واحدة من اكتر الحاجات المزعجة جدا اللي ممكن تحصل انك تقعدي جنب شخص على ترابيزة واحدة ويكون بيمضغ الاكل بصوت عالي وبيتكلم والاكل في بوقه, الاشخاص اللي من النوعية دي بيكونوا منفحتين وودودين جدا ومش بيهتموا برأي الناس فيهم, ومش بيحسوا بقلق من اي حاجة, وبيحلوا كل المشاكل الصغيرة اللي بتقابلهم في حياتهم وهما مرتاحين ومن غير اي توتر, لكن هما ممكن جدا يواجهوا صعوبة في انهم يتكيفوا مع اللي حواليهم بسبب سلوكهم المفرط.
9- الشخص اللي بيحضر اكله بعناية:
الاشخاص من النوعية دي بيحبوا يقطعوا اكلهم لقطع صغيرة قبل ما ياكلوا, وده بسبب لانهم بيتميزوا بعقول فكرية ومهارات تنظيمية بتخليهم يتصرفوا بالشكل ده, وبيكونوا اشخاص حالمين جدا وعندهم طموحات كبيرة في حياتهم المهنية, حتى لو اللي حواليهم حسوا انهم عايشين في عالم لوحدهم, بيحبوا كمان يحطوا جدول مع اصحابهم ويخططوا للي هيعملوه, لكن لازم يكونوا حذرين انهم ميفوتوش الحاضر وهما بيفكروا او بيحاولوا يعرفوا المستقبل.
10- الشخص اللي بيطلب من اكل غيره:
الشخص اللي بيطلب دايما من اكل غيره يعتبر اناني شوية, وبيكون مزعج جدا للاشخاص اللي حواليه انهم كل مرة بيشاركوا اكلهم معاه, الاشخاص اللي من النوعية دي معندهمش مشكلة يطلبوا اي حاجة في اي وقت وياخدوا حاجات مش ملكهم في معظم الوقت, هما في الغالب روحهم بتبقى طفولية شوية ومتعودوش انهم يسمعوا كلمة “لا”, لكن مع ذلك هما مهذبين ومحبوبين جدا من اللي حواليهم, وهتلاقيهم بكل بساطة ممكن يختفوا من وقت للتاني.
11- الشخص اللي مستحيل يشارك اكله مع حد:
غالبا لما بناكل مع مجموعة او اشخاص تانيين هيكون من الطبيعي اننا نعزم من الاكل اللي بناكله حتى من باب المجاملة, لكن لو شخص مش بيحب يعمل ده ممكن اللي حواليه يفكروا انه اناني, او ممكن شخص يفكر فيه بطريقة تانية انه شخص استقلالي ومش بيحب يشارك اكله لمجرد بس ان ده اللي المفروض يتعمل عادي, يعني ببساطة تقدري تطلبي طبق الخاص من غير ما تشاركيه مع حد مافيهاش اي مشكلة.
يا ترى ايه هي عادات الاكل عندكم اللي بتوصف شخصيتكم؟ كل واحدة تقولنا كده عادة الاكل بتاعتها.
