ازاي تخلي بشرتك متوهجة ونضرة في 7 ايام بس

ريهام محمود
ريهام محمود
في
بشرة
9184

الجلد المثالي حلم اي بنت, لكن اكيد دايما بتقابلنا مشاكل في بشرتنا من وقت للتاني زي الدهون الزيادة, والهالات السودا, وبقع الجلد, والرؤوس السودا, والحبوب, وغيرها من المشاكل اللي بنعاني منها دايما وبنتمنى انها تختفي, ده غير لو انتي اصلا مش بتهتمي ببشرتك بشكل كافي اتأكدي ان واحدة على الاقل من المشاكل دي هتقابلك, عشان كده النهاردة هنقولك خطة او روتين هيخلي بشرتك نضرة ومتوهجة في خلال اسبوع واحد بس.

روتين هيخلي بشرتك نضرة ومتوهجة:

1- اليوم 1:

روتين التنضيف والتونر والترطيب برغم ان معظم البنات عارفين انه مهم جدا عشان يحافظوا على بشرتهم لكن مع ذلك بيهملوه.

– الوش طول اليوم بيتراكم عليه التلوث والتراب والجلد الميت والدهون الزيادة, عشان كده ضروري جدا استخدام غسول خفيف على البشرة عشان تنضفي المسام وتمنعي مشاكل زي حب الشباب, وضروري انك تختاري غسول مناسب لنوع بشرتك, بعد الغسول استخدمي التونر لانه هيضمن لك تنضيف البشرة من اي زيوت او تراب على سطح البشرة, ممكن كمان تستخدمي التونر الطبيعي زي مية الورد والشاي الاخضر والخل الابيض كلهم بيساعدوا على استعادة توازن درجة حموضة البشرة وبيشدوا المسام وبيصغروا حجمها, انهي الروتين ده بالمرطب المناسب, وده يعتبر اساس اي روتين للعناية بالبشرة.

– اعملي ماسك تفتيح للبشرة ممكن تستخدمي مكونات زي البابايا, العسل, الليمون, اللبن, والطماطم, اللي هتكون متوفرة تقريبا في اي مطبخ.

– قبل ما تنامي لازم تشيلي اي مكياج, لان بشرتك محتاجة تتنفس بالليل, وده مش هيحصل لو في مكياج على البشرة, في طريقة بسيطة جدا ممكن تشيلي بيها المكياج لو مش متوفر عندك مزيل مكياج, حطي كام نقطة من زيت الاطفال على البشرة ودلكيها بالراحة لمدة دقايق, وبعدين امسحي البشرة بقطعة قطن او فوطة ناعمة او منديل.

– انهي يومك بنفس الروتين اللي بدأتي بيه اليوم الغسول والتونر وفي الاخر بالكريم المرطب, ولو بتعاني من بشرة جافة حاولي تبدلي اكياس المخدات بالساتان او الحرير لانها بتقلل من فقدان الرطوبة, وحاولي دايما انك تنامي على ضهرك.

روتين هيخلي بشرتك نضرة ومتوهجة 1
روتين هيخلي بشرتك نضرة ومتوهجة 1

شوفي من هنا 24 وصفة طبيعية لبشرة خالية من العيوب.

2- اليوم 2:

اليوم التاني لازم تركزي على تحسين صحة بشرتك من خلال التحكم في كل اللي بتاكليه وتشربيه خلال اليوم, لانه زي ما الاهتمام الخارجي مهم للبشرة كمان التغذية والاهتمام الداخلي مهم جدا, والاكل يعتبر طريقة سهلة لتحسين صحة البشرة.

– اعملي الروتين الصباحي اليومي اللي هو الغسول والتونر والكريم المرطب, واعملي بعده ماسك فواكة, واختاري نوع الفاكهة المناسبة لبشرتك زي الموز للبشرة الجافة, والفراولة للبشرة الدهنية, وقناع الفاكهة يعتبر طريقة ممتازة جدا عشان تحافظي على لمعان البشرة من غير ما تستخدمي اي مواد كيميائية عليها.

– حافظي على رطوبة بشرتك من خلال شرب مية كتير ومشروبات مغذية زي عصاير الخضروات او الفواكه من غير سكر خلال اليوم, الطريقة دي بتساعد على التحكم في انتاج الزيوت على البشرة وكمان شد المسام وتقليل حجمها.

– اخر حاجة شيلي المكياج قبل النوم, وانهي يومك بالروتين المعتاد الغسول والتونر والكريم المرطب, وروتين العناية بالبشرة الليلي لو بستخدمي كريم ليلي او كريم عين او اي مستحضرات طبية.

روتين هيخلي بشرتك نضرة ومتوهجة 2
روتين هيخلي بشرتك نضرة ومتوهجة 2

شوفي من هنا 7 طرق لعمل عصير لتفتيح البشرة والحفاظ على نضارتها.

3- اليوم 3:

في اليوم التالت هنعمل تقشير للبشرة عشان نزيل كل الجلد الميت, التقشير هيخلي بشرتك ناعمة وشكلها صحي, وكمان هيخليها مستعدة لاي علاجات تانية.

– قشري البشرة بأي نوع سكراب, او تدليكه بسفنجة ناعمة عشان تشيلي كل خلايا الجلد الميتة وتظهر طبقة الجلد الصحية اللي تحتها.

– بعد تقشير البشرة بالسكراب عشان تحافظي على الطبقة الجديدة محمية من الجفاف, تقدري تستخدمي ماسك مغذي للبشرة لان بشرتك بعد التقشير هتكون اكتر تقبل للتغذية وهتستفاد بالماسك اكتر.

– متنسيش واقي الشمس لو هتخرجي وبشرتك هتتعرض للشمس, لانه هيحمي بشرتك من الاشعة فوق البنفسجية اللي ممكن تضر بشرتك.

– بالليل هنعدل شوية في روتين العناية, بعد تنضيف البشرة بالغسول, حطي اي ماسك تختاريه على البشرة, وبعد ما تغسليه, طبقي التونر والكريم المرطب.

روتين هيخلي بشرتك نضرة ومتوهجة 3
روتين هيخلي بشرتك نضرة ومتوهجة 3

شوفي من هنا وصفات طبيعية لتقشير الجلد.

4- اليوم 4:

مجرد ما توصلي لليوم الرابع هتلاحظي نتايج واحدة في ملمس ونسيج البشرة, وهتلاحظي ان بشرتك بقت صحية بشكل عام, لكن اكيد ده مش معناه انك تقللي الروتين او تهملي فيه لازم تفضلي مستمرة زي ما انتي عشان تحافظي على النتيجة.

– اغسلي وشك بالمنظف المعتاد بتاعك, وبعدها عرضي بشرتك للبخار عشان تفتحي المسام وتعملي تنضيف عميق للبشرة, بمجرد ما تعرضي البشرة للبخار لمدة 10 دقايق, بعدها طبقي ماسك الطين اللي هيخلص البشرة من اي اوساخ, او ممكن تستخدمي ماسك عبارة عن خليط من العسل ودقيق الشوفان, وبعد ما القناع ينشف اغسليه وامسحي البشرة بقطعة قطن بمية ورد, ده هيساعد على قفل المسام, وفي الاخر انهي بالكريم المرطب.

– قبل النوم حافظي على روتين العناية الليلي اليومي, عشان تصحي الصبح تلاقي بشرتك مترطبة ومتغذية.

روتين هيخلي بشرتك نضرة ومتوهجة 4
روتين هيخلي بشرتك نضرة ومتوهجة 4

شوفي من هنا طريقة تقشير البشرة في البيت بمكونات طبيعية كأنك في ال SPA.

5- اليوم 5:

– بعد ما تعملي الروتين اليومي المنظف والتونر, دلكي البشرة بجل صبار الالوفيرا لحد ما البشرة تتشربه, ده هيساعد على تحسين الدورة الدموية في الوش وهيغذي بشرتك, وهيساعد كمان على طرد السموم, ولو عندك هالات سودا تحت العين ممكن تستخدمي سيروم او كريم للعين او تعتمدي على الوصفات الطبيعية للهالات السودا, مع الوقت هتبدأ الهالات تختفي بالتدريج.

– بعد تدليك البشرة بجل الالوفيرا, حطي الكريم المرطب او كريم النهار مع عامل حماية من الشمس عشان متضطريش تستخدمي واقي من الشمس منفصل.

– بالليل مع الروتين الليلي المعتاد بعد المنظف استخدمي ماسك للبشرة ممكن تستخدمي خشب الصندل مطحون مع الكركم وتخلطيهم بمية الورد ولما ينشف اغسليه وطبقي التونر ورطبي البشرة بالكريم المرطب.

روتين هيخلي بشرتك نضرة ومتوهجة 5
روتين هيخلي بشرتك نضرة ومتوهجة 5

شوفي من هنا 20 وصفة مذهلة للبشرة والشعر باستخدام جل الالوفيرا.

6- اليوم 6:

– في اليوم السادس ده هيكون ميعاد تقشير البشرة مرة تانية, التقشير المفروض يكون كحد اقصى مرتين في الاسبوع عشان تحافظي على البشرة مشرقة وصحية, اعملي نفس خطوات التقشير من اليوم التالت زي ما قولناها, واختميها بالتونر والمرطب.

– شرب كميات منتظمة من المية والسوايل زي العصاير والشوربة, مهم جدا طول الاسبوع, لان الجسم المترطب كويس ده معناه على طول بشرة صحية.

روتين هيخلي بشرتك نضرة ومتوهجة 6
روتين هيخلي بشرتك نضرة ومتوهجة 6

7- اليوم 7:

– في اليوم السابع, هتكرري تاني ماسك الفواكة المناسب لبشرتك, وامشي على الروتين اليومي المنظف والتونر والمرطب بالليل والصبح, ده اساسي زي ما قولنا بشكل يومي.

– حافظي على شرب المية والمشروبات الصحية طول اليوم, عشان تحافظي على رطوبة ومرونة بشرتك.

روتين هيخلي بشرتك نضرة ومتوهجة 7
روتين هيخلي بشرتك نضرة ومتوهجة 7

المشي على النظام ده هيخلي بشرتك نضرة وصحية من اليوم الاول, وفي اليوم السابع هتلاحظي بشرتك قد ايه بقت مشرقة وناعمة ورطبة ونقية, لكن ده اكيد مش معناه انك توقفي روتين العناية اليومي ببشرتك, لازم تفضلي مستمرة على الثلاثي الاساسي التنضيف والتونر والمرطب بشكل يومي, تقشير البشرة مرتين في الاسبوع, علاجه بالماسكات الطبيعية مرتين في الاسبوع, ضروري جدا عشان تحافظي على صحة البشرة, ممكن تحسي ان الروتين فيه حاجات كتير لكن لو مشيتي زي ما احنا قولنا بالظبط هتلاقيه مش كتير وهتتعودي ان ده يبقى روتينك اليومي وهتعمليه بكل سهولة.

طريقة هتخلصك من البقع السودا في 3 ايام بس..وازاي تمنعي ظهور البقع تاني

وصفة لعلاج البقع السودا
وصفة لعلاج البقع السودا

مقالات متعلقه

تحدي اليوم الواحد لتوهج بشرتك قبل الفرح

تحدي اليوم الواحد لتوهج بشرتك قبل الفرح

علاج الايورفيدا للبشرة في البيت في 3 خطوات سهلة

علاج الايورفيدا للبشرة في البيت في 3 خطوات سهلة

5 علاجات طبيعية بتستخدمها كارينا كابور لبشرة نضرة وشباب

5 علاجات طبيعية بتستخدمها كارينا كابور لبشرة نضرة وشباب