بالفيديو والخطوات: طريقة عمل قواقع المكرونة المحشية بالفراخ مع الجبنة البارميزان

النهاردة جايبين لكل بنات حوا وصفة قواقع المكرونة المحشية بالفراخ مع الجبنة البارميزان, الوصفة سهلة وسريعة جدا ومش هتاخد منك اي وقت في التحضير وطعمها لذيذ اوي ياللا نعرف مع بعض المكونات والطريقة.

قواقع المكرونة المحشية بالفراخ:

الكمية تكفي تقريبا 4 افراد.

وقت التحضير: ساعة.

المقادير:

– 283 جرام مكرونة قواقع جامبو اكبر حجم.

– 340 جرام صدور فراخ, وممكن بدل الفراخ تبقى لحمة مفرومة, او حتى تشكيلة خضروات مسلوقة.

– 453 جرام جبنة ريكوتا كاملة الدسم.

– 1 كوباية جبنة بارميزان مبشورة.

– 1 ½ معلقة صغيرة توابل ايطالية.

– 3 كوبايات جنية موتزاريلا مبشورة.

– 2 ½ كوباية مارينارا صوص.

قواقع المكرونة المحشية بالفراخ
قواقع المكرونة المحشية بالفراخ

طريقة التحضير:

1- حطي رف في الفرن يكون في وسط الفرن وسخنيه على 200 درجة.

2- اسلقي المكرونة بالطريقة العادية في مية وملح لمدة 7 دقايق تقريبا, وبعدها ارفيعها من على النار واشطفيها تحت المية الباردة, وبعدين رصي المكرونة على ورق خبز او ورق زبدة جنب بعض.

3- حمري صدور الفراخ في بالبيض والبقسماط زي البانية, وقطعيها لشرايح كل شريحة على قد حجم المكرونة, وخليها في الطبق على جنب.

4- دلوقتي بقى هاتي طبق اخلطي فيها الجبنة الريكوتا, والبارميزان, والتوابل الايطالية, و 1 ½ كوباية من الجبنة الموتزاريلا, و ½ معلقة صغيرة ملح, نقلبهم كويس مع بعض, وبعدين ننقل الخليط في كيس بلاستيك, وقصي جزء صغير منه من جنب واحد.

5- هاتي الصينية اللي هتحطيها في الفرن حطي فيها كوباية من صلصة المارينارا وافرديها على الصينية كلها, وخدي قوقعة حطي فيها الخليط اللي حضرناه في الكيس واملي كل القواقع بالخليط ورصيهم جنب بعض في الصينية, وعلى كل قوقعة حطي شريحة فراخ, وبعدين حطي على الوش ال 1 ½ كوباية الباقية من صلصلة المارينارا, واخر حاجة ال 1 ½ كوباية الباقية من الجبنة الموتزاريلا.

6- حطي الصينية في الفرن من غير ما تغطيها, وسيبيها لحد ما الجبنة تسيح ويبقى لونها دهبي, هتاخد في الفرن حوالي 25 دقيقة.

قواقع المكرونة المحشية بالفراخ
قواقع المكرونة المحشية بالفراخ

الطريقة بالفيديو:

هنقولكم دلوقتي على وصفات لبعض المكونات اللي استخدمناها في الوصفة بدل ما تشتروها او لو مش متوفرة في الهايبر ماركت تقدروا تعملوها بنفسكم في البيت بسهولة, وتحفظوها وتبقى جاهزة عندكم لاي وصفات اكل.

طريقة تحضير صوص المارينارا:

المقادير:

– 400 جرام طماطم مطبوخة.

– 170 جرام صلصة طماطم.

– 4 معالق كبيرة بقدونس مفروم.

– فص ثوم مفروم.

– 1 معلقة صغيرة زعتر.

– 1 معلقة صغيرة ملح.

– ¼ معلقة صغيرة فلفل اسود.

– 6 معالق كبيرة زيت زيتون.

– 1/3 كوباية بصل متقطع مكعبات ناعم.

– ½ كوباية عصير طماطم.

الطريقة:

في الخلاط حطي الطماطم المطبوخة, وصلصة الطماطم, والبقدونس, والثوم, والزعتر, والملح, والفلفل, اضربيهم مع بعض لحد ما يبقى الخليط ناعم, في طاسة كبيرة او حلة حطي زيت الزيتون وشوحي فيه البصل لمدة دقيقتين, وبعدين ضيفي الخليط اللي انتي جهزتيه وعصير الطماطم, وسيبيهم على نار خفيفة لمدة 30 دقيقة, مع التقليب من وقت للتاني, وبعدين ارفعيها من على النار وسيبيها تبرد واحفظيها في برطمان في التلاجة للاستخدام.

طريقة تحضير صوص المارينارا
طريقة تحضير صوص المارينارا

طريقة تحضير الطماطم المطبوخة:

المقادير:

– 4 ثمرات طماطم كبار.

– 2 سيقان كرفس مفرومين ناعم.

– ¼ ثمرة فلفل مفرومة ناعم.

– 1 معلقة صغيرة توابل ايطالية.

– 4 معالق كبيرة سكر.

– ملح – فلفل.

– 2 كوباية مية.

الطريقة:

انقعي الطماطم في مية مغلية لمدة دقيقة واحدة, وطلعيها وقشري قشرتها, حطي الطماطم في حلة كبيرة وضيفي لها باقي المكونات كلها, وسيبيها تغلي على النار لمدة 15 دقيقة لحد ما الطماطم تبقى طرية, وكده تبقى جاهزة عندك حطيها في برطمان واحفظيها في التلاجة للاستخدام.

طريقة تحضير الطماطم المطبوخة
طريقة تحضير الطماطم المطبوخة

طريقة التوابل الايطالية:

عبارة عن خليط من 1 ½ معلقة صغيرة زعتر, 1 معلقة صغيرة بردقوش, ½ معلقة صغيرة ريحان, ½ معلقة صغيرة روزماري او اكليل الجبل, ½ معلقة صغيرة مرمرية, اخلطيهم مع بعض واحتفظي بالخليط في برطمان وخدي منه في اكلاتك على قد ما انتي عايزة.

طريقة التوابل الايطالية
طريقة التوابل الايطالية

طريقة عمل مكرونة بالجمبري بالخطوات

طريقة عمل مكرونة بالجمبري