ايه اللي محتاجة فعلا تلغيه من حياتك حسب برجك
اكيد كلنا شخصياتنا فيها السلبيات والايجابيات ومميزات وعيوب وده الطبيعي, لكن كل اللي احنا نقدر نعمله اننا نحاول نحقق التوازن الصحي بينهم عشان حياتنا تبقى احسن, وتتأكدي ان مافيش حاجة معينة بقت جزء من وجودك يعني تقدري تغيريها او تستغني عنها, والنهاردة من خلال السطور الجاية هنقولك ايه الصفة اللي تلغيها من حياتك حسب برجك.
الصفة اللي تلغيها من حياتك حسب برجك:
1- برج الدلو (20 يناير – 18 فبراير):
اصحاب برج الدلو بيتميزوا بالاستقلالية, ودايما بيحققوا اهدافهم اللي بيرسموها لحياتهم, وبيفضلوا الوحده اكتر من التواصل مع اللي حواليهم, لكن سلوك الاعتماد على النفس بشكل قوي او زيادة عن اللزوم, ممكن يخلي الناس يفكروا انك مش محتاجة مساعدة من حد في وقت تكوني فعلا محتاجة للمساعدة فيه, عشان كده بننصح اصحاب برج الدلو انهم يخففوا شوية من الصفة دي وميعتبروش ان طلب المساعدة ده نقطة ضعف, لكن يعتبروها علامة على القوة.
2- برج الحوت (19 فبراير – 20 مارس):
برج الحوت دايما بيشوف الخير في اللي حواليه, ودايما رحيم وحنون في كل علاقاته, عشان كده دايما بيحس بجرح كبير اوي لو ما اخدتش التقدير اللي يستحقه, عشان كده بننصح اصحاب برج الحوت انهم يفتحوا الباب للناس اللي مش بتقدرهم يخرجوا من حياتهم وميتمسكوش بيهم.
3- برج الحمل (21 مارس – 19 ابريل):
اصحاب برج الحمل بيتميزوا بالشخصية الحيوية وانهم بيعيشوا الحياة بكل ما فيها بحلوها ومرها, لكن مع ذلك ممكن في حاجات معينة تخفض مستوى الطاقة عندهم وتمنعهم انهم يوصلوا لاقصى امكانيتهم, عشان كده بننصح اصحاب برج الحمل انهم ياما يتخلصوا من الحاجة اللي بتستنفذ طاقتهم نهائي, او يجربوا طريقة جديدة او حل تاني ليها.
4- برج الثور (20 ابريل – 20 مايو):
اصحاب برج الثور عندهم قدرة عالية جدا على مواجهة المصاعب, كمان واقعيين جدا يعني مش بيطيروا لفوق او يسرحوا بخيالهم بحاجات مش واقعية, وبما ان الثبات هو امر حيوي جدا ومهم لوجود برج الثور فلازم تخلصوا من اي حاجة ممكن تكون مزعجة وتهز الثبات ده.
5- برج الجوزاء (21 مايو – 20 يونيو):
برج الجوزاء برج ازدواجي ودايما بيشتت تفكيره بين اكتر من حاجة, عشان كده بننصح اصحاب برج الجوزاء انهم ميشغلوش نفسهم بمية حاجة في نفس الوقت ويركزوا على حاجة واحدة بس.
6- برج السرطان (21 يونيو – 22 يوليو):
السرطان برج عاطفي جدا, وبيستثمروا او بيستخدموا عواطفهم في كل حاجة تقريبا, وده بيخليهم دايما في حالة بحث عن استحسان او قبول من اللي حواليهم, عشان كده بننصح اصحاب برج السرطان انهم يخففوا شوية من العاطفة دي, والافضل انك تعيشي بنفسك ولنفسك.
7- برج الاسد (23 يوليو – 22 اغسطس):
من اكتر الصفات اللي بتميز برج الاسد هي الثقة الزيادة, لكن ده بيخليهم يحسوا بالاهانة بسهولة لو حد اتعامل معاهم بأسلوب مش حلو شوية, وبيتهز فيهم احترامهم لنفسهم, وده بالظبط اللي اصحاب برج الاسد محتاجين انهم يلغوه من حياتهم, انهم يتعلموا ياخدوا النقد بصدر رحب اكتر وميكونوش حساسين زيادة عن اللزوم لو اي شخص قال اي حاجة تضايق.
8- برج العذراء (23 اغسطس – 22 سبتمبر):
لو اي حد هيختار اكتر صفة مميزة لاصحاب برج العذراء هتكون هي الاهتمام بالتفاصيل, بيخططوا بعناية شديدة جدا, وبيراجعوا على كل خطوة عشان يتأكدوا ان كل حاجة ماشية زي ما هما عايزين, وده ممكن ياخدهم من وقتهم ومجهودهم كتير جدا, فهيكون افضل لو في حاجة او مهمة ممكن تخلص باتصال مثلا بدل ما يروحوا يعملوه بنفسهم يعني يكونوا اكتر مرونة شوية.
9- برج الميزان (23 سبتمبر – 22 اكتوبر):
اصحاب برج الميزان بيجتهدوا جدا انهم يحققوا التوازن في حياتهم, والجدل عندهم متعة, وبيحبوا يحللوا كل حاجة, وده ممكن يخليهم يدخلوا بعمق اوي في مشاكل غيرهم على حساب نفسهم, عشان كده اللي الصفة اللي برج الميزان محتاجين انهم يلغوها من حياتهم هو تكريس وقتهم وطاقتهم لمساعدة غيرهم, لازم يدوا الاهتمام والاولوية لنفسهم قبل اللي حواليهم.
10- برج العقرب (23 اكتوبر – 21 نوفمبر):
العند هو اكتر صفة واضحة جدا عند اصحاب برج العقرب, لكن العند ده بيكون نتيجة انه عاطفي جدا, عشان كده نصيحتنا ان هي انهم يحاولوا يخففوا من العند شوية وميستنفذوش كل طاقتهم بالعند.
11- برج القوس (22 نوفمبر – 21 ديسمبر):
اصحاب برج القوس شخصيتهم حالمة جدا وبيعيشوا في عالمهم الخاص, بيعيشوا في اي خيال يخليهم يفقدوا التواصل مع الواقع, وده ممكن يسبب لهم مشاكل كتير في حياتهم, عشان كده بننصحهم انهم يحاولوا يكسروا هالة الاحلام اللي هما عايشين فيها عشان يقدروا يركزوا في واقعهم وحياتهم واهلهم واصحابهم واي حاجة تانية مهمة في حياتهم.
12- برج الجدي (22 ديسمبر – 19 يناير):
اصحاب برج الجدي شخصيتهم قوية جدا, ومن انواع الاشخاص اللي لو حطوا حاجة في دماغهم لازم ينفذوها, لكن في بعض الاحيان ممكن يحصل حاجة او يدخل شخص في طريقك يمنعك من تحقيق اهدافك, بكل بساطة بننصحك تشيلي العائق وتكملي طريقك لهدفك, لان العقبات هتفضل دايما جزء من حياتك لكن المهم انك تتغلبي عليها وتكملي لان مافيش اي حاجة ممكن تمنعك من قيادة حياتك للاحسن.
ياللا كل واحدة تقولنا هل دي فعلا الصفة اللي محتاجة تلغيها من حياتها ولا لا؟
اغرب الصفات الموجودة في شخصيتك حسب برجك
