6 اسرار المفروض متخبيهمش ابدا عن شريكك
اول حاجة لازم نعرف مع بعض معنى كلمة “سر: في العلاقة بين اي اتنين مرتبطين, السر هو المعلومات اللي تحسي انها ممكن تقلق شريكك لاي سبب, وهنلاقي اننا في كتير من الاوقات ممكن نخبي حاجة بغرض خير لكن مع ذلك في النهاية ده يعتبر سر, والاسرار المفروض متكونش موجودة في العلاقة بشكل كبير, والنهاردة من خلال المقال بتاعنا هنقولك 6 اسرار متخبيهمش ابدا عن شريكك.
ضروري في البداية اننا ندرس العلاقة كويس وحالتها عشان نفهم تعقيد الحفاظ على الاسرار والنتايج اللي ممكن تيجي من وراها بشكل مناسب, والكلام ده ينطبق على العلاقات الناضجة الملتزمة مش على العلاقات السريعة او اللي انتي مش متأكدة منها.
ليه بنخبي حاجة عن الشريك؟
في العادة كده ليه احنا ممكن نخبي حاجة عن شريكنا او يبقى في سر مش عايزين نقوله, كتير من الاشخاص بيفكروا ان ممكن انهم لما يقولوا الحقيقة ده يخلي الموضوع اسوأ او يسبب مشاكل اكبر, او يفكروا ان الطرف التاني مش هيعرف يتعامل مع الحقيقة ببساطة او يتقبلها.
واكيد كل شخص بيحتفظ بالاسرار لاسباب كتير ومختلفة, هنلاقي مثلا كتير من البنات ممكن يخبوا حاجة عن شريكهم لانهم خايفين على العلاقة انها ممكن تنتهي او يحصل فيها مشاكل او انك تأذي شريكك بأي شكل, كتير من المتزوجين ممكن يخبوا اسرار عن ازواجهم لو حسوا انهم لو قالوها هتخلي شريكهم يفقد الثقة فيهم.
عشان كده يعتبر الخوف والخجل هما المفتاحين الرئيسين اللي ممكن يدفعوكي انك تخبي حاجة عن شريكك, وبما ان الصدق والثقة في اي علاقة بيكون ليها قيمة كبيرة ومهمين جدا, هنلاقي هنا ان الشريك اللي بيخبي حاجة او بيحتفظ بسر حاسس دايما بضغط عشان يحافظ على صورته مثالية قدام شريكه والثقة متتهزش, وهيبقى دايما عايش في حالة تأنيب ضمير انه مخبي حاجة عن شريكه مهما كان نوع السر ده ايه, عشان كده النهاردة هنقولك ايه هي انواع الاسرار اللي المفروض متخبيهاش عن شريكك.
اسرار متخبيهمش ابدا عن شريكك:
1- مشاعر سلبيه اتجاه شريكك:
لو جواكي اي مشاعر غضب او استياء من ناحية شريكك, وبغض النظر عن اللي هو عمله ومخليكي مضايقة منه فهو في النهاية يستاهل منك انك تكوني صريحة وتقولي اللي انتي حاسه بيه, اتكلمي معاه بكل صراحة وطلعي كل اللي جواكي.
2- المشاكل المالية:
كلنا عارفين ان الحياة بقت صعبة جدا, وممكن الدخل يكون مش مناسب مع الاسعار, والوظيفة مش بتسد كل الاحتياجات, فلو في اي مشاكل مالية بأي شكل سواء ديون مثلا, او مشاكل في المرتب, ايا كانت المشكلة المالية لازم يكون في مصارحة من الطرفين, واكيد في النهاية العلاقات القوية السليمة والناضجة المفروض كل طرف فيها بيتحمل التاني بكل ظروفة وفي اي وقت.
3- الخيانة:
مينفعش طرف يخون بأي شكل, وميبقاش في مصارحة لان الطرف اللي خان هيعيش في تأنيب ضمير وحالة نفسية ممكن ميعرفش يطلع منها وهيبقى في حالة تدمير للنفس بشكل تدريجي, وهتبقى ظالمة نفسك وظالمة الطرف التاني, وسواء كانت العلاقة دي هتنتهي او لا بسبب المصارحة دي, لكن الطرف التاني من حقه انه يعرف.
4- المشاكل الصحية:
معظم الاشخاص اللي بيخبوا مشكلة صحية سواء كانت جسدية او نفسية اولا بيكونوا حاسين بالحرج انهم يقولوها, وتاني حاجة بيخافوا من رد فعل الشريك, لكن اكيد لما العلاقة بتكون قوية والطرف التاني بيحب جدا لما يعرف هيبقى عايز يساعد ويبقى دعم لحد ما شريكه يبقى احسن.
5- مشاكل في الماضي:
لو في اي مشكلة في الماضي ممكن تأثر على حياتك, في الحالة دي مطلوب انك تصارحي شريكك بيها, وطبيعي جدا انك ممكن تكوني خايفة او حاسه بخجل انك تقوليها, لكن لما تصارحيه انتي كده بتثبتي له انك بتبذلي مجهود عشان تغيري من نفسك للاحسن, واكيد مش بنقولك انك تفضلي عايشة في الماضي وفي حالة ندم مستمرة, لكن متخبيش حاجة ممكن تأثر على حياة شخص تاني, عشان كده اخلصي من الماضي وكملي حياتك.
6- المشاكل العائلية:
والمشاكل العائية هنا مش المقصود بها عيلة الطرف التاني, لكن المقصود بيها المشاكل العائلية الخاصة بيكي انتي, يعني لو في مشكلة بينك وبين اي طرف في عيلتك, فالافضل انك تصارحي شريكك بيها عشان لو عرفها عن طريق حد غيرك ميحسش انك مهمشاه مثلا او مش عايزة تشاركيه, وهنا بنقولك انك تشاركيه المشاكل الكبيرة اللي ممكن يكون ليها تاثير كبير عليكي وعلى حياتك واتجاهلي المشاكل الصغيرة.
في النهاية قبل ما تفكري انك تخبي حاجة عن شريكك خلي النقط دي في بالك وقدام عينيكي دايما:
– الصدق والثقة هما اهم عناصر العلاقة الناجحة.
– الماضي مش هو اللي بيحدد مين انتي او هتكوني مين في المستقبل, لان الانسان في ايده انه يتغير ويغير نفسه للاحسن دايما.
– فكري ان شريكك ممكن يكون شخص متفهم وناضج وعاقل وبيقدر اكتر ما انتي متخيلة.
– ان الاوان عمره ما بيفوت للتغير.
– فكري دايما بشكل ايجابي وان مهما حصل او بيحصل فأكيد بكره هيكون احسن.
7 وعود بيقولها الرجالة لكن نادرا انهم ينفذوها
