نصايح موضة مهمة لازم كل بنت في الجامعة تكون عرفاهم

كتير من البنات بيقعوا في حيرة ايه اللبس او الستايلات اللي ممكن تكون مناسبة للجامعة اللي تخليكي تطلعي بلوك حلو وتبقي مميزة وفي نفس الوقت تبقي مرتاحة, النهاردة من خلال موضوعنا هنقولك مجموعة نصايح لستايلك في الجامعة ضروري انك تحطيها في اعتبارك لما تيجي تختاري لبس الجامعة.

نصايح لستايلك في الجامعة:

1- البسي ملابس مريحة:

اختاري دايما ملابس تكون مريحة لانك بتقضي وقت كبير في الجامعة وهتكوني محتاجة تبقي مرتاحة طول اليوم, ابعدي عن اللبس الضيق او الخامات اللي ممكن تسبب احتكاك للبشرة, اختاري الخامات المريحة واللبس ميكونش ضيق عشان بشرتك تقدر تتنفس.

2- كوني نفسك:

المظهر الانيق مش معناه ابدا هو انك تلبسي احدث صيحات الموضة او تقلدي المشاهير, لان لو اختارتي حاجة مش ستايلك هتبقي اكيد مش مرتاحة فيها, عشان كده احنا بننصحك انك تكوني نفسك يعني تختاري اللي يليق عليكي ويكون ليكي ستايل مميز وخاص بيكي وتختاري حتى قطع مش منتشرة او مش كتير بيلبسوها عشان يبقى ليكي لوك خاص ومختلف.

3- اختاري الشنطة ال Backpack:

الشنط ال Backpack من ستايلات الشنط العملية المناسبة جدا للجامعة, لانها كبيرة وتقدري تشيلي فيها كل حاجة من كتب ومذكرات والاساسيات بتاعتك كلها اللي انتي محتاجاها خلال اليوم, كل اللي هتعمليه انك تنسقي بس الشنطة مع الوان لبسك بشكل صح عشان تكلمي اللوك بتاعك.

4- نسقي لبسك بشكل صح:

اختاري قطع تقدري تنسقيها مع بعض وتقدري تعملي منها كذا طقم, وتكون في نفس الوقت ممكن تتلبس على اي شوز او شنطة او سنيكرز عندك, ده هيخليكي تنوعي وتعملي ستايلات كتير من الحاجات اللي موجودة في دولابك وفي نفس الوقت بميزانية معقولة.

5- جهزي حاجتك من بالليل:

متستنيش لحد الصبح عشان تشوفي هتلبسي ايه لان الامر هينتهي للجملة الشهيرة عند كل البنات “معنديش حاجة البسها” ودي اللحظة اللي هتدمر يومك كله, ده غير انك هتضيعي وقتك الصبح انك تقعدي تختاري وتجربي كذا حاجة على ما تستقري على طقم تلبسيه, عشان كده الافضل انك تجهزي كل حاجاتك من بالليل يعني تختاري الطقم مع الشوز مع الشنطة وحتى الميك اب كمان, عشان الصبح تبقي جاهزة ومستعدة وتبدأي يومك بايجابية.

6- اختاري مكياج بسيط:

المكياج اكيد يعتبر جانب اساسي عشان يكمل اللوك بتاعك, لكن لازم تعرفي ان مكياج الجامعة مختلف عن خروجاتك مع اصحابك او خروجاتك بعد الضهر, اعتمدي للجامعة دايما مكياج بسيط بألوان هادية, وابعدي عن الالوان الفاقعة, خليكي بسيطة وطبيعية.

7- اعتمدي على السنيكرز بدل الكعب العالي:

زي ما قولنا في البداية ضروري انك تختاري لبس مريح ده كمان بينطبق على الشوز لازم تختاري الشوز اللي يريحك, وهنا اكيد اللي هتكوني محتاجاه هو السنيكرز او الشوز الفلات, هيخليكي مرتاحة طول اليوم ومش هيتعبلك رجلك, وابعدي تماما عن الكعب العالي في الجامعة.

افكار للبس الجامعة عشان تطلعي بلوك ستايلش وعملي ومريح