افضل 10 وصفات طبيعية لتأخير ميعاد الدورة الشهرية
ساعات بيمر علينا اوقات يكون مثلا عندنا مناسبة او سفر او اي ميعاد مهم عندك في نفس ميعاد الدورة الشهرية وهنا بتكون المشكلة لاننا اكيد بنبقى عايزين نكون مرتاحين ومش حاسين بقلق في الوقت ده, واكيد انه مافيش طريقة اننا نمنع الدورة الشهرية بشكل تام لان ده كمان غير صحي, لكن في ايدينا اننا نأجلها او نأخرها كام يوم بمكونات بسيطة موجودة في البيت, وده اللي هنعرفه النهاردة من خلال السطور الجاية هنقول لكل بنات حوا وصفات لتأخير ميعاد الدورة الشهرية, او حتى تقليلها عن طريق استرخاء عضلات الرحم.
وصفات لتأخير ميعاد الدورة الشهرية:
1- وصفة الليمون:
المكونات:
ليمونة.
كوباية مية.
طريقة التحضير:
كل اللي هتعمليه اعصري الليمونة في كوباية المية واشربيها, اعملي المشروب ده كل ما تحتاجي انك تأخري ميعاد الدورة الشهرية.
العصاير الحمضية زي الليمون تعتبر ديتوكس بيساعد على تنضيف الجسم وتقليل تدفق الدم.
2- خل التفاح:
المكونات:
2 معلقة صغيرة خل التفاح.
كوباية مية.
طريقة التحضير:
اخلطي خل التفاح مع المية واشربيه, اشربي منه من 3 – 4 كوبايات في اليوم قبل ميعاد الدورة الشهرية بتاعتك.
وخل التفاح زي الليمون بيساعد على تنضيف الجسم من السموم وتقليل تدفق الدم.
3- الجيلاتين:
المكونات:
1 معلقة صغيرة جيلاتين.
كوباية مية.
طريقة التحضير:
ضيفي الجيلاتين لكوباية المية واشربيها بسرعة, غالبا مرة واحدة من المشروب ده بتكون كافية لمعظم البنات, لكن ممكن تكرريها مرة تانية خلال اليوم.
وصفة الجيلاتين من الوصفات القديمة في الطب الصيني لعلاج النزيف المفرط عشان كده تعتبر مفيدة لتأخير الدورة الشهرية.
4- الزيوت الاساسية:
المكونات:
6 نقط من زيت المرمرية.
6 نقط من زيت اللافندر.
من 2 – 3 معالق صغيرة من زيت اللوز.
طريقة التحضير:
اخلطي كل الزيوت مع بعض, ودلكي بيهم منطقة البطن والحوض لحد ما الجلد يمتص الخليط كويس, دلكي بخليط الزيوت ده مرتين في اليوم.
زيت المرمرية بيساعد على استرخاء عضلات الرحم, وزيت اللافندر بيقلل من التوتر وبيريح الاعصاب.
لكن لو حد بيعاني من نوبات او صرع يتجنب الطريقة دي.
5- الجنزبيل:
المكونات:
من ½ – 1 بوصة قطعة جنزبيل طازة.
1 معلقة صغيرة عسل نحل.
كوباية مية سخنة.
طريقة التحضير:
اطحني الجنزبيل وضيفيه لكوباية المية السخنة وسيبيه منقوع كام دقيقة, لما يبرد شوية قلبيه وضيفي له العسل, بعدها اشربي الجنزبيل وهو دافي, اشربي منه من 2 – 3 مرات في اليوم.
بس لو بتعاني من اضطرابات النزيف او بتاخدي ادوية بتوقف او بتمنع تخثر الدم, يبقى اتجنبي الوصفة دي لان الجنزبيل يعتبر مخفف للدم.
6- الفاصوليا الخضرا:
النظام الغذائي المتوازن ممكن يأثر بشكل كبير على الدورة الدموية, وكتير من الابحاث اثبتت فايدة الفاصوليا الخضرا وقدرتها على تقليل تدفق الدم وحتى وقفها او تأجيلها عند بعض النساء, عشان كده بننصحك انك تدخليها في نظامك الغذائي, كمان الفاصوليا الخضرا غنية بالكالسيوم, وممكن تساعد كمان على تقليل آلام الدورة الشهرية.
7- شاي التوت:
المكونات:
حفنة من اوراق التوت المجفف او الطازة.
2 كوب مية.
طريقة التحضير:
اغلي اوراق التوت في المية على نار هادية لمدة دقايق, ارفعيه من على النار وسيبيه يبرد وبعدين اشربيه, اشربي منه من 2 – 3 كوبايات في اليوم.
شاي التوت بيحتوي على كتير من الفيتامينات والمعادن المفيدة للجسم, تقدري تشربي منه بانتظام حتى اثناء فترة الحمل, بيحتوي على خصائص قابضة ومرخية للرحم, والخصائص دي بتساعد على تقليل تدفق الدم.
8- زيت جوز الهند:
المكونات:
من 1 – 2 معلقة كبيرة من زيت جوز الهند.
الطريقة:
كل اللي هتعمليه انك هتبلعي الزيت على مرة واحدة, ولو مش حابه طعمه لوحده ممكن تضيفيه لكوباية شاي سخن وتشربيه, اشربيه مرة واحدة في اليوم.
زيت جوز الهند بيحتوي على الاحماض الدهنية الاساسية ومضادات الاكسدة, اللي بتساعد على تنظيم الدورة الشهرية وتقليل تدفق الدم.
9- عشبة حشيشة الملاك “جذور انجليكا”:
المكونات:
1 معلقة صغيرة عشبة حشيشة الملاك مجففة.
كوباية مية مغلية.
الطريقة:
انقعي الاعشاب في المية المغلية وسيبيها لمدة دقايق, بعدين قلبيه واشربيه, اشربي منه مرتين في اليوم.
العشبة دي معروفة كمان باسم “انثى الجينسنج” لانها بتستخدم لعلاج كتير من مشاكل الدورة الشهرية, وهو علاج عشبي صيني قديم, كانوا بيستخدموه لوقف الدورة الشهرية بشكل مؤقت, وعشبة انثى الجينسنج او حشيشة الملاك بتساعد على الحفاظ على توازن الهرمونات الانثوية وبتوفق تدفق الدم.
لكن لو بترضعي او حامل اتجنبي الطريقة دي.
10- حبوب وقف الدورة الشهرية:
اخر حل هو الحبوب, من الحبوب اللي بتساعد على وقف الدورة الشهرية بشكل مؤقت هي حبوب منع الحمل, لان آلية عملها بتعتمد على منع الاباضة, وده بدوره بيأثر على الرحم, ومكوناتها الاساسية هي الاستروجين والبروجستين, وهما يعتبروا الهرمونات الجنسية الانثوية, اقري التعليمات على العلبة قبل ما تاخدي حبوب منع الحمل, وبمجرد ما توقفي الحبوب هترجع الدورة لطبيعتها تاني.
وغير العلاجات المنزلية اللي احنا قولناها لوقف او تأخير الدورة الشهرية, في حبوب في الصيدلية اسمها “نوريثيستيرون”, الدوا ده بيأخر الدورة الشهرية لمدة 17 يوم كحد اقصى.
ايه افضل الاكلات اللي ممكن تساعد على تأخير الدورة الشهرية:
الاكل اللي بتاكليه ممكن يأثر بشكل كبير على طول او قصر مدة الدورة الشهرية او حتى تأخيرها ومن الاكلات دي.
– العدس الاصفر: اقلي العدس واطحنية لمسحوق ناعم, واعملي منه شوربة سميكة, تاكلي منه كل يوم عشان يساعدك على تأخير الدورة الشهرية.
– الجزر: الجزر كمان من الحاجات اللي ممكن تساعدك على تأخير الدورة الشهرية, من خلال مساعدة جسمك على طرد كل الدم المتراكم في ايام اقل من المعتاد.
– الاكلات الغنية بالكالسيوم: هتساعدك على تأخير الدورة الشهرية, وكمان بتساعد على تنظيم تدفق الدم وبتخلي فترة الدورة اقصر والدم اخف, ومن الاكلات الغنية البوتاسيوم اللي بننصحك تاكليها الموز, البطاطا, الزبادي, السلمون, والزبيب.
– المنتجات الحيوانية: زي زيت السمك وزيت بذور الكتان الغنية بالاحماض الدهنية الاوميجا 3, ممكن تساعدك على تأخير الدورة الشهرية وتقليل تدفق الدم.
– الاكلات الغنية بالحديد: زي العسل الاسود والبطاطس وغيرها من الاكلات اللي بتحتوي على الحديد, مفيدة في تقليل تدفق الدم وتأخير الدورة الشهرية.
اتجنبي الاكلات الحراقة واللي فيها بهارات كتير, وكتري من اكل الخضروات والفواكة الطازة اللي هتساعدك تتحكمي في تدفق الدم.
في النهاية الدورة الشهرية هي جزء من حياتنا, لكن زي ما قولنا ممكن تيجي حالة طارئة تبقي محتاجة انك تأخريها شوية, لكن بغض النظر عن السبب اللي محتاجة عشانه تأخري الدورة اي وصفة من اللي احنا قولناهم هتساعدك على ده.
لو في حد جرب وصفة تانية لتأخير الدورة الشهرية غير اللي احنا قولناهم وجابت معاها نتيجة كويسة ممكن تشاركنا تجربتها.
حيل ونصايح لفترة الدورة الشهرية هتغير حياتك للابد
