6 غلطات بنعملهم بتخلينا نفقد وزن العضلات مش الدهون

ريهام محمود

في

5652

في كتير من الاوقات اثناء اي دايت او نظام غذائي, بيحصل اننا بنخسر كتلة العضلات بدل من وزن الجسم والدهون, فلما تكوين ماشية على دايت او تمارين وتلاقي ان مثلا حجم المؤخرة بقى اصغر لكن منطقة البطن زي ما هي, ده معناه ان في حاجة غلط, عشان كده النهاردة هنقولك على غلطات في الدايت بتخليكي تخسري العضلات مش الدهون عشان تتجنبيها وتخسري وزنك بشكل صح.

اول خطوة لازم تحددي انتي عايزة تخسري وزن ليه, لازم يكون عندك هدف واضح عشان يشجعك انك تستمري على الدايت, يعني تبصي لجسمك كده وتشوفي ايه اللي انتي مش راضيه عنه او مش حباه وعايزة تغيريه, لان معرفة السبب هيساعدك على اختيار افضل نظام غذائي وتمارين رياضية مناسبة ليكي.

غلطات في الدايت:

1- تقليل السعرات الحرارية زيادة عن اللزوم:

كلنا اثناء الدايت وعشان نخسر وزننا بسرعة بنجوع نفسنا, وبنعتمد على الانظمة الغذائية والتمارين القاسية, لكن في النهاية الجسم مينفعش يتغير بشكل سريع فالبتالي بياخد رد فعل, لما تحاولي تقللي السعرات الحرارية زيادة عن اللزوم بشكل سريع ده ممكن يأثر على العضلات ويتسبب في انهيار فوري للعضلات, وده يعتبر غير صحي للجسم, الجسم بيحتاج ما لا يقل عن 1200 سعر حراري يوميا, عشان كده لازم تتأكدي انك ماشية على نظام غذائي متوازن بيغذي جسمك, وقللي من السعرات الحرارية ببطء, عشان جسمك ميدخلش في صدمة فورية لما تقللي السعرات مرة واحدة.

2- كمية البروتين اللي بتاكليها قليلة اوي:

اي تمارين او انظمة غذائية لفقدان الوزن هنلاقي دايما فيه انه لازم ناكل كمية كبيرة من البروتين, لان البروتين بيلعب دور رئيسي في بناء واصلاح العضلات, النظام الغذائي اللي بيكون غني بالبروتين بيسرع عملية التمثيل الغذائي وبيساعد على فقدان دهو الجسم, عشان كده ضروري ان نظامك الغذائي غني بالفراخ, والسمك, والسي فود, والبيض, لان البروتين يعتبر عنصر مهم جدا عشان تستعيدي دهون العضلات, كمان بتزود من فعالية التمارين اثناء الدايت.

3- ممارسة تمارين الكارديو زيادة عن اللزوم:

تمارين الكارديو ومن ضمنهم جهاز الجري او ال Treadmill, المبالغة فيها او ممارستها زيادة عن اللزوم ممكن يأدي في بعض الاحيان لضرر اكتر من انها تبقى مفيدة, عشان كده ضروري جدا متحمليش جسمك فوق طاقته, مارسي التمارين باعتدال وبطريقة صح, لان تمارين الكادريو لو زيادة عن اللزوم ممكن تأدي لفقدان العضلات بدل دهون الجسم, والاسوأ من كده انها ممكن تأدي لتمزق العضلات لو مارستيها زيادة او بشكل غلط, عشان كده الافضل تتابعي مع متخصص في الجيم عشان يحددلك روتين التمارين المناسب لجسمك.

4- مش بتدربي بأوزان:

كتير منن البنات بتخاف تتعامل مع الاوزان, لكن رفع اوزان مهم جدا لانه بيحافظ على العضلات, لكن ضروري انك تستشيري حد متخصص في البداية لان رفع الاوزان فجأة ممكن يسبب ارهاق واجهاد وعضلي, عشان كده رفع الاوزان لازم يكون بالتدريج, ابدأي برفع الاوزان الصغيرة عشان تقوي العضلات بالتدريج مع الوقت مش بشكل مفاجيء ممكن يأذي العضلات.

5- بتفضلي مجوعة نفسك بعد التمرين:

مهم جدا انك تكافئي جسمك بعد التمرين, لان في ذروة ارتفاع مستوى الادرينالين بعد ممارسة الرياضة بننسى اننا نشكر جسمنا على المجهود ده او بنتعامل معاه بشكل غلط, ضروري انك اثناء وبعد التمرين تشربي مية كتير, ومشروبات البروتين, واكل الفاكهة الطازة بعد التمرين من الحاجات المفيدة والصحية جدا اللي بتدي جسمك التغذية اللي محتاجها.

6- قلة النوم:

الارق من الحاجات اللي ممكن تخلي الدايت بتاعك مينجحش, مهم جدا انك تنامي كويس وتحافظي على روتين نوم صحي لمدة 8 ساعات كل يوم, لان النوم بيدي فرصة للجسم انه يشفي نفسه من كل الاضرار اللي اتعرض لها اثناء النهار, من ناحية تانية عدم كفاية النوم ممكن يأدي لزيادة الوزن, والاكتئاب, عشان كده ضروري انك تاخدي ساعات نوم كافية, وتنامي نوم صحي بأنك تبعدي عن كل حاجة ممكن تسبب لك الارق زي الموبايل او اي جهاز الكتروني.