5 افكار صحية لوجبة الفطار يوم فرحك
اكيد بالنسبة لاي بنت يوم فرحها ده بيكون اهم يوم في حياتها, وعشان العروسة بتبقى مضغوطة في اليوم غالبا بتنسى وجبة الفطار, وفي بنات كتير بيتجنبوا وجبة الفطار اصلا خوف منهم انه يحصل انتفاخ وميبقوش مرتاحين, لكن انك تبدأي يومك بوجبة الفطار المناسبة ممكن يساعدك في اليوم ده جدا ويخليكي مستعدة بشكل احسن, ووجبة الفطار الصحية السليمة ضروري انه يكون داخل فيها البروتينات, والفيتامينات, والالياف, والكربوهيدرات, والنهاردة من خلال موضوعنا هنقول لكل عرايس بنات حوا افكار لوجبة فطار صحي يوم الفرح من غير ما تأثر على راحتك او مظهرك.
افكار لوجبة فطار صحي يوم الفرح:
– افطري بشكل صح:
اول حاجة لازم تعرفيها ان وجبة الفطار مهمة جدا اي يوم حتى لو يوم فرحك, لان الوجبة دي هي اللي هتديكي طاقة تعملي كل المهام في اليوم ده, لان اكيد كلنا عارفين اي بنت في يوم فرحها بتكون مضغوطة جدا ووراها مية حاجة تتعمل وعشان تعملي كل اللي وراكي من غير ما تحسي بتعب وتقدري تكملي يبقى لازم متفوتيش وجبة الفطار, ممكن تاكلي وجبة الفطار مع حد من اصحابك او اي شخص مقرب ليكي عشان يشجعك, كلي ببطء وخدي راحة بعد كل كمية اكل عشان ده هيساعد ان عملية الهضم تمشي بشكل صح من غير ما تحسي بأي انتفاخ او تبقى مش مرتاحة.
1- البيض:
دخلي البيض في وجبة الفطار, البيضة الواحد هتزود جسمك بالفيتامينات والبروتينات والسيلينيوم اللي هتكوني محتاجة ليهم جدا, كمان هتوفرلك الطاقة والمغذيات, بالاضافة انها هتملى معدتك وتحسسك بالشبع فترة طويلة, ممكن تاكلي بيضة مسلوقة او مخفوقة مع شريحة خبز اسمر محمص تعتبر وجبة مثالية جدا هتزود جسمك بالالياف وهتسرع عملية الهضم, وممكن تكملي الوجبة دي ب ½ ثمرة افوكادو مهروسة مضاف ليها 1 معلقة صغيرة من خل التفاح هتساعد انها تزود جسمك بالدهون الاساسية اللي هيساعد على تعزيز الايض خلال اليوم.
2- السموزي:
في قايمة المشروبات الخفيفة والمغذية مافيش حاجة هتتفوق على السموزي, ممكن تعملي خليط من الموز والتوت وتضيفي لهم زبادي, هيعتبر مشروب مثالي جدا لوجبة الفطار يوم الفرح, وتقدري تختاري اي انواع فاكهة تضيفيها مع بعض وتعملي بيها سموزي صحي ومغذي, ممكن كمان تضيفي مع الفاكهة زيدة الفول السوداني عشان تدخلي الدهون في الوجبة, ممكن كمان تعملي السموزي من الخضروات بدل الفاكهة, وتشربي العصير الاخضر اللي مكون من الخضروات الخضرا زي البقدونس والكرفس والسبانخ والخيار, والعصاير عموما تعتبر من الحاجات اللي بتساعد على زيادة الطاقة اللي اكيد هتكوني محتاجاها في اليوم ده, عشان كده العصاير تعتبر وجبة فطار مثالية جدا ليوم الفرح.
3- المكسرات:
المكسرات تعتبر بشكل ما فاكهة من غير سكريات ومنخفضة الكربوهيدرات ولكن في نفس الوقت مرتفعة في نسبة الزيوت الاساسية والبروتينات, ويعتبر الفطار هو افضل وقت ممكن تاكلي فيه مكسرات عشان تبدأي عملية التمثيل الغذائي في الجسم بشكل فعال, والمكسرات بتشمل كل الانواع زي اللوز والكاجو والبندق وغيرهم, اللي ممكن تضيفيها للسموزي, او البان كيك, او الشوفان, هتساعد الجسم يحافظ على طاقته طول اليوم.
4- الشوفان:
يعتبر الشوفان وجبة صحية مثالية جدا لوجبة فطار يوم الفرح, ممكن عشان تزودي قيمته الغذائية تضيفي له زبيب وعسل او توت او موز, هيملى المعدة ويخليكي تحسي بالشبع فترة طويلة, او ممكن تضيفي الشوفان للسيريال او الحبوب كوجبة فطار.
5- القرع:
القرع بيحتوي على مستويات عالية من البوتاسيوم, واللي بتساعد على تنظيم السوائل الطبيعية في الجسم, والحفاظ على توازن كهربة الجسم, لان انخفاض مستوى البوتاسيوم ممكن يسبب انكماش في الجهاز الهضمي, وده هيأدي في النهاية للانتفاخ والامساك, بالاضافة لده القرع ممكن يبقى وجبة خفيفة لذيذة او وجبة كاملة, وتقدري تعملي القرع باي طريقة تحبيها كوجبة فطار في يوم الفرح.
في النهاية بنأكد عليكي ان اختيار وجبة الفطار الصح في اليوم ده مهمة جدا عشان هي اللي هتساعدك تكملي يومك من غير ما تتعبي وهتحافظ على طاقة جسمك وهتخليكي حاسة براحة طول اليوم, لان تخطي وجبة الفطار هيجبر جسمك انه يبطء من عملية التمثيل الغذائي عشان يحافظ على طاقته, وبالتالي ده هيخليكي اول ما تفوقي من ضغط اليوم هتاكلي كمية اكل كبيرة, وجنب الاكل متنسيش تحافظي على رطوبة الجسم والجلد والشعر بشرب كمية مية كفاية, خلي دايما المية جنبك طول اليوم.
ازاي تحسني الدورة الدموية بطرق طبيعية
