طريقة هتخلصك من البقع السودا في 3 ايام بس..وازاي تمنعي ظهور البقع تاني

بقلمريهام محمود فيبشرة visibility2135

البقع والنمش والندبات من المشاكل اللي في كتير من البنات بيعانوا منها, والبشرة اللي غير موحدة او فيها مشاكل بتسبب لنا ازعاج وبيبقى حلم كل بنت توصل لبشرة صافية خالية من اي عيوب, والنهاردة من خلال موضوعنا هنقولك على وصفة لعلاج البقع السودا في وقت قياسي جدا.

– ايه هي البقع الغامقة وليه بتظهر على الجلد؟

البقع الغامقة معروفة بأسم “فرط التصبغ”, وبتحصل بسبب زيادة تركيز الميلانين في منطقة معينة من الجلد, وهنلاقي ان في اسباب كتير ممكن تأدي للبقع الغامقة ومن ابرزها:

1- البقع الغامقة الاكتر انتشار وبيعاني منها كتير من البنات نتيجة حب الشباب, بتحصل في اماكن البثور او الحبوب.

2- الشمس كمان من الاسباب اللي ممكن تأدي لظهور البقع الغامقة والشوائب, لما نتعرض لها بشكل مستمر ولفترات طويلة, الاشعة فوق البنفسجية ممكن تأدي لفرط تصبغ الجلد.

3- كمان التلوث اللي موجود في الجو, من الاسباب اللي ممكن تأدي لظهور البقع الغامقة.

4- وفي دراسات كمان اظهرت ان الاشعة اللي بتكون خارجة من الاجهزة الالكترونية زي الكمبيوتر, اللاب توب, وشاشة التليفزيون, وشاشة الموبايل, حتى الاضاءة الفلورسنت, ممكن تأدي لظهور البقع على المدى البعيد.

5- الهرمونات اللي موجودة في حبوب منع الحمل ممكن تسبب ظهور البقع الغامقة, لانها بتعمل خلل في مستويات البروجسترون والاستروجين الطبيعي, والتغيرات الهرمونية دي ممكن تأدي لفرط التصبغ.

وحاليا في علاجات طبية كتير للبقع الغامقة زي السيروم, ومنتجات الريتينول, والعلاج بالليزر او التقشير, لكن المشكلة انها بتبقى قاسية على الجلد الى حد ما وممكن تسبب مشاكل خصوصا للبشرة الحساسة.

عشان كده النهاردة جيبنالكم وصفة طبيعية فعالة جدا هتساعدك على التخلص من البقع الغامقة في وقت قصير وهي 3 ايام واكيد المدة دي هي الحد الادنى يعني ممكن تختلف من بشرة للتانية حسب استجابة كل بشرة, لكن عن تجربة بنات كتير لاحظوا ان البقع قلت بشكل ملحوظ جدا في وقت اقل كمان من 3 ايام.

وصفة لعلاج البقع السودا
وصفة لعلاج البقع السودا

– وصفة لعلاج البقع السودا:

وصفتنا بعصير البطاطس المعروف بفعاليته في علاج البقع الغامقة, لان البطاطس بتحتوي على خصائص مبيضة, بتخليها فعالة في علاج البقع الغامقة وكمان ندبات حب الشباب وعيوب البشرة, كمان النشا العالي وانزيم ال Catecholase اللي موجودين في البطاطس بيساعدوا على تعزيز صحة الجلد عن طريق تقليل اي تغير في لون الجلد, والبطاطس كمان غنية بالفيتامينات A, B, C, E, وكلها تعتبر مصادر مضادة للاكسدة اللي ممكن تساعد على مكافحة علامات الشيخوخة, ومنع تصبغ الجلد, واستعادة حيوية وشباب البشرة.

مكونات الوصفة:

ثمرة بطاطس متوسطة الحجم.

1 معلقة صغيرة عصير ليمون.

1 معلقة صغيرة عسل نحل.

طريقة التحضير:

ابشري ثمرة البطاطس ناعم في طبق.

حطي بشر البطاطس في شاشة او على مصفى واضغطي عليها عشان تنزل العصير بتاعها.

تقدري تستخدمي عصير البطاطس لوحده بشكل مباشر على البقع الغامقة, او تزودي فاعليته بعصير الليمون والعسل, وقلبي المكونات كويس مع بعض.

طريقة الاستخدام:

هاتي قطعة قطن اغمسيها في الخليط, وادهني بيه الاماكن اللي فيها بقع.

سيبيه على البشرة لمدة 20 دقيقة.

اشطفي البشرة بمية باردة.

كرري الوصفة مرة في الاسبوع لحد ما توصلي للنتيجة المطلوبة.

وصفة لعلاج البقع السودا
وصفة لعلاج البقع السودا

– هل تقدري تمنعي البقع الغامقة؟

بالفعل احنا نقدر نمنع ظهور البقع الغامقة, ممكن تغيير بسيط في اسلوب حياتك ونظامك الغذائي يساعد على منع فرط تصبغ الجلد, ويحافظ على بشرتك ناعمة وصحية.

1- تجنب التعرض الزيادة للشمس من افضل الطرق اللي ممكن تساعدك على منه ظهور البقع الغامقة, جربي انك تقللي من التعرض للشمس على قد ما تقدري من الساعة 10 الصبح لحد الساعة 3 العصر, لان الشمس في الوقت ده بتكون اقوى فترة في اليوم كله.

2- استخدمي واقي الشمس اللي بيحتوي على حماية واسعة النطاق او UVA, وضروري جدا انك تستخدمي الواقي قبل الخروج للشمس, واتأكدي انك تجدديه كل 3 – 4 ساعات, لان عدم تجديد الواقي غلطة بيقع فيها كتير من البنات, لكن لازم نعرف ان الواقي مفعوله بيروح بعد كام ساعة, عشان كده لو هتقضي وقت طويل في الشمس لازم تجدديه.

3- متتردديش انك تستخدمي حماية اضافية من الشمس مع الواقي زي شمسية, او قبعة, او سكارف.

4- اتجنبي استخدام ال Tanning bed اللي بيعمل تان او تسمير صناعي للبشرة لانه ممكن يأدي لظهور البقع الغامقة.

5- لو انتي بشرتك معرضة لحب الشباب باستمرار, اتأكدي انك تاخدي علاج للحبوب بانتظام لحد ما تخف, واتجنبي تماما الضغط على الحبوب بالايد لان ده ممكن يسبب ندبات على البشرة واللي هتتطور مع الوقت لبقع غامقة.

6- قللي الضرر اللي بيسببه تلوث الجو, انك تغسلي بشرتك مرتين في اليوم, واعملي تقشير للبشرة من مرة لمرتين في الاسبوع.

7- تجنب التدخين والمية المعالجة بالكلور زي اللي موجودة في حمامات السباحة, ممكن تساعد على التقليل من تكون البقع الغامقة.

8- دايما حافظي على رطوبة بشرتك, واتأكدي انك بتاخدي احتياجاتك اليومية من فيتامين E, C, لانها مصادر رائعة جدا لمضادات الاكسدة الضرورية لحماية البشرة من التلف.

9- التقلبات الهرمونية كمان زي ما قولنا ممكن تأدي لظهور البقع الغامقة, عشان كده حاولي تحافظي على مستويات هرموناتك تحت السيطرة, عن طريق تقليل الاجهاد, وتقليل استهلاك الاطعمة المصنعة الغنية بالملح والسكر.

وصفة لعلاج البقع السودا
وصفة لعلاج البقع السودا

نصايح من بنت قدرت تعالج حب الشباب في 30 يوم بطرق طبيعية

علاج حب الشباب بطرق طبيعية
علاج حب الشباب بطرق طبيعية