7 وعود بيقولها الرجالة لكن نادرا انهم ينفذوها

ريهام محمود
ريهام محمود
2904

اي راجل لما بيكون في علاقة ممكن يقدم وعود كتير للي مرتبط بيها بالحاجات اللي هو هيعملها, لكن مع الوقت انتي بتلاقي ان الوعود دي مش بتتنفذ, ومش معنى ده ان هو شخص كداب, لكن الحقيقة ان كتير من الرجالة بيقدموا وعود اللي هو شايف انها ممكن تسعدك لو قالها حتى لو مش هتتحقق في الواقع, ونتيجة لده انتي ممكن تفكري انك تبعدي عنه لانه انتي هتشوفي انه شخص مش اهل للثقة او مش قد كلمته, ولكن ده بردو مش معناه انك تبرري له انه خلف معاكي الوعود الكبيرة او اللي ممكن تأثر على مستقبلكم مع بعض, عشان كده النهاردة هنقولك على 7 وعود نادرا الرجالة بينفذوها, عشان تبقي عارفة لما يقولهالك انها ممكن متتنفذش.

وعود نادرا الرجالة بينفذوها:

1- وعد انه مش هيغير:

غير واقعي بالمرة انه يقولك “مش هغير عليكي”, وانتي لو طلبتي من الراجل انه ميغرش يبقى انتي كده بتطلبي منه انه يمنع نفسه من العواطف الطبيعية اللي المفروض تحصل بين اي اتنين مرتبطين, وغالبا الوعد ده لو قاله مش بيتنفذ.

لان خبراء علم النفس صرحوا ان الغيرة عاطفة طبيعية جدا, لما اي طرف من الاتنين يحس انه ممكن يخسر الطرف التاني, عشان كده شعور الغيرة صعب السيطرة عليه, حتى انه مش بيحصل بس بين الاتنين اللي بيحبوا بعض لكن كمان ممكن يحصل بين الاصحاب لو واحد منهم دخل في حياته صديق جديد وبيتقرب منه هيحس بالغيرة.

وبدل ما تخلي شريكك انه يوعدك انه مش هيغير ومينفذش الوعد, اتكلمي معاه انه بس يسيطر على مشاعر الغيرة وتأكدي له ان مافيش سبب يخليه يغير, وانه المفروض يغير عليكي بنسبة 100%, وخليكي دايما منفتحة معاه وساعديه انه يسيطر على مشاعر الغيرة ويفكر بالعقل وبشكل ايجابي.

لكن مع ذلك الغيرة لو زادت عن حدها ممكن تتحول لسيطرة وحب تملك, عشان كده مهم جدا اننا نحافظ عليها تحت السيطرة, وخصوصا لو الغيرة دي بتخلي شريكك يبقى عنيف ويتكلم معاكي بصوت عالي وبشكل عدواني, في الحالة دي بس ممكن تفكري في استمرار العلاقة.

2- وعد انه مش هيبص على بنات تانية:

الوعد اللي تقريبا كل الرجالة بيقولوه للبنت اللي مرتبط بيها “مش هبص لبنت تانية”, طبعا ده من اول الوعود اللي مش بتتنفذ, ومن الناحية العلمية ان ده فعلا صعب يتنفذ لان ده يعتبر تصرف لا شعوري بيحصل لما نشوف اي حاجة ملفتة.

وانتي لو فكرتي في الموضوع من وجهة نظرك او حطيتي نفسك مكانه وشوفتي شخص جذاب اكيد نظرك هيروح عليه حتى لو نظرة عابرة وسريعة مش نظرة طويلة, هتلاحظي انها استجابة انسانية طبيعية.

وفي الواقع ان 70% من النساء اعترفوا انهم بيلفت نظرهم الراجل الجذاب, وان ده مش بيأثر بشكل مباشر على علاقتهم مع شريكهم بأي شكل من الاشكال, فلو انتي بتحسي بده وان ممكن يلفت نظرك شخص تاني فأكيد كمان الراجل هيحس بنفس الاحساس وممكن تلفت نظره بنت تانية.

لكن طبعا في فرق كبير جدا من انه يعجب بمظهر بنت يكون حلو وجذاب, وانه يدقق النظر او يفضل مركز, في الحالة دي مافيش مانع انك تلفتي نظره انك بتبقي مش مرتاحة او بتكوني متضايقة لما بتلاقيه بيركز بنظره مع واحدة تانية, لكن زي ما قولنا لو النظرة سريعة وبعدها مش بيبص او مش بيفضل مركز مافيش مشكلة فيها, لانك انتي هتلاقي نفسك ساعات بتعملي كده.

وبدل ما تعملي مشكلة معاه او تعملي خناقة, ممكن بس توصلي له انه مش حابه ده وبتتضايقي منه, بالطريقة دي تقدروا تتناقشوا على الخطوط اللي المفروض كل طرف ميتعدهاش, وده كمان ممكن يساعد على تقوية الثقة بينكم.

3- بيوعدك انه مش هيسيطراو ينتقد تصرفاتك:

مهما كان مقدار حب الشخص ليكي فهو اكيد ليه اراء عكسية ليكي وطريقة تفكير مختلفة, وممكن يشوف تصرفات ليكي انها غلط من وجهة نظره, وده مش معناه انه مش بيحبك او مش هيدعمك وقت ما تحتاجيه, لكن احيانا بيكون متمسك باراء معينة ومقتنع بيها.

في النهاية بنقولك مافيش مشكلة انك تديه زمام الامور شوية وتحسسيه انه اراءه ممكن تكون صح في بعض الاحيان,لكن المهم انه يعرف ان انتي كمان ليكي افكار واراء صح زيه بالظبط, وان الموافقة على الاختلاف دي مش حاجة وحشة وان الاختلاف حاجة طبيعية.

وعود نادرا الرجالة بينفذوها 1
وعود نادرا الرجالة بينفذوها 1

4- وعد انه مش هيفكر في اي علاقة سابقة:

اكيد اي راجل بيوعد اللي مرتبط بيها انه مش هيفكر في اي علاقة سابقة ليه, لكن ده وعد ممكن يكون صعب التنفيذ, لان لو فكرنا فيها كده بشكل منطقي او انتي كمان مريتي بعلاقة سابقة هتلاقي ان كل فترة ممكن غصب عنك تيجي في بالك افكار وذكريات لعلاقة سابقة, وده طبيعي لان احنا غالبا بنفتكر العلاقات السابقة عشان نتعلم منها ومنكررش اخطاءنا دلوقتي او في المستقبل.

لكن لازم اكيد يبقى في حدود للموضوع, يعني ميبقاش في تواصل مباشر او بالتليفون مع الاكس او العلاقة السابقة, وتوضحي له ان لو حصل تواصل انتي لازم تعرفي, لان لو اتواصل معاها بغض النظر عن النيه من غير ما انتي تعرفي وتحسي انه مخبي حاجة عليكي ده هيهدم الثقة بينكم.

5- بيوعد ان هيغير تصرفاته بعد كل خناقة:

بعد الخلاف غالبا الراجل ممكن يقدم وعد انه هيغير تصرفاته وردود افعالة وان ده مش هيحصل تاني وانه هيفتح صفحة جديدة, لكن خليكي مستعدة ان الوعد ده ممكن ميتنفذش في الواقع.

الموضوع مش ان الراجل ميقدرش يتغير, لكن التغيير هو عملية محتاجة وقت, مافيش حد يقدر يغير تصرفاته وردود افعالة بين يوم وليلة, فلو انتي اتوقعتي انه هيتغير بشكل جذري في ساعتها فانتي في الحالة دي بتتوقعي حاجة غير واقعية.

عشان كده متضايقيش انه بياخد وقت طويل على ما يتغير, لكن بدل كده اعرفي ان كل حاجة بتبدأ بخطوة صغيرة زي الطفل الصغير اللي لسه بيتعلم, لو انتي قدرتي تشجعيه وتوصلي له انك مقدرة جهوده انه بيحاول يتغير هتلاقي ان هو بيحاول يتغير اكتر وبشكل اسرع.

لكن مع ذلك لو انتي شوفتي ان شريكك مش بيعمل اي مجهود عشان يتغير لازم يكون في موقف منك, لازم تكوني انتي شايفة خطوات صغيرة بتتاخد منه في الاتجاه الصحيح, لكن لو هو مش بيحاول اصلا يبقى هنا العلاقة محتاجة وقفة.

6- بيوعد انه مش هيخبي عليكي حاجة:

دايما الرجالة بيوعدوا انهم مش هيخبوا حاجة عنك, لكن في الغالب مش بيتنفذ, لكن عشان نكون واضحين في فرق كبير بين انه يكون كداب او مش امين وبين الحدود الشخصية الصحية.

في بعض الاحيان ممكن يكون في حياتة الشخصية هو مش مستعد يتكلم عنها في الوقت الحالي ومحتفظ بيها لنفسه ومحتاج وقت عشان يحكيها, زي مثلا حد في عيلته مريض او عنده مشكلة, فحاولي متاخديش ده بشكل شخصي لو مقالش ده على طول, ممكن يكون محتاج وقت للتفكير فيها قبل ما يكون مستعد انه يتكلم عنها.

وحسب علم النفس ان توقع ان شريكك مايكونش عنده حدود ويحكي على كل حاجة في حياتة بشكل فوري عشان بس يحافظ على وعده انه مش هيخبي عليكي حاجة ده يعتبر حاجة غير صحية في العلاقة, لانك لما تجبريه انه يكون منفتح معاكي ويحكي كل حاجة وهو مستعد لده ممكن يكون ليه تأثير سلبي, بدل ما يخليه منفتح اكتر معاكي.

لكن في نفس الوقت مينفعش ان اي طرف يخبي حاجة ممكن تأثر على الطرف التاني, حتى لو كان الاعتراف ده هيغضب الطرف التاني, لازم يكون في شجاعة المواجهة.

ولو انتي عايزة ان شريكك ميخبيش عليكي حاجة خالص من البداية, يبقى لازم توضحي له ده عشان يكون حاطه في الاعتبار من الاول.

7- هنفضل مع بعض للابد, وهفضل دايما احبك:

خلينا واقعيين ممكن يكون الشخص اللي مرتبطة بيه لما وعد الوعد ده كان صادق فعلا جدا وبيقوله من قلبه, وانه شايف مستقبله معاكي, ده جميل جدا.

لكن هنا بقى النقطة ان مافيش حد يقدر يتنبأ بالمستقبل ولا يعرف هيحصل ايه بكره, لان كل يوم بيعدي مليان بالتحديات والتغيرات اللي ممكن تحصل, والناس ممكن تتغير, والمشاعر ممكن تتغير, فمافيش حد ابدا ممكن يتنبأ بكره هيحصل ايه حتى لو مخططين حياتكم بشكل كويس ومثالي جدا.

لكن ده اكيد مش معناه انك تبقي شاكه فيه وفي نواياه بشكل كامل, او انك متصدقيش انه فعلا بيحبك, مافيش حاجة غلط انك تفكري بشكل ايجابي, لكن ده معناه بس انك تكوني عارفة ان الوعد ده ممكن ميتحققش ومش ضمان ان مستقبلكم لازم هيكون مع بعض.

ولازم تعرفي ان اللي بيبني المستقبل الايجابي بينكم, ان انتوا الاتنين تعملوا مجهود بشكل متساوي عشان تخلوا العلاقة تستمر بنجاح, لازم يكون في تفاهم وصدق وتبقوا منفتحين في النقاش بينكم وكل حاجة تبقى واضحة, لكن لو في طرف مش بيعمل اللي عليه او مش بيبذل اقصى مجهود عنده فأكيد الوعد ده مش هيتحقق في النهاية.

وعود نادرا الرجالة بينفذوها 2
وعود نادرا الرجالة بينفذوها 2

في النهاية كسر الوعد او عدم تنفيذه ممكن يسبب اذى للطرف التاني او يحسسه ان شريكه مش محترمه, وفي وعود مينفعش متتنفذش زي الاخلاص في العلاقة, او انه يكون افضل ويحسن من نفسه, انه يكون محترم شريكه, انه يفتكر التواريخ المهمة, انه هيكون موجود في اي وقت عشان شريكه.

اهم حاجة ان يكون في توقعات معقولة وواقعية من الطرفين, لان العلاقة هي شارع باتجاهين يعني لازم المجهود يكون من الطرفين عشان العلاقة تكون واقعية وتنجح, ويكون في تواصل, وصدق, ده هيخلي في احتمالات اقوى لتنفيذ الوعود بينكم.

7 اوقات لو حسيتي فيهم بالغيرة هيكون كويس لعلاقتك

امتى الغيرة تكون كويسة لعلاقتك
امتى الغيرة تكون كويسة لعلاقتك

مقالات متعلقه

تفضلي سينجل افضل من المحاربة في علاقة غلط ، اعرفي السبب

تفضلي سينجل افضل من المحاربة في علاقة غلط ، اعرفي السبب

صفات المرأة المثالية اللي دايما بيقدرها الرجل ويحب وجودها في شريكة حياته

صفات المرأة المثالية اللي دايما بيقدرها الرجل ويحب وجودها في شريكة حياته

جمل لو قولتيهم لشريكك هتخليه يدوب في حبك

جمل لو قولتيهم لشريكك هتخليه يدوب في حبك