دايت ال 1000 كالوري لتخسيس الوزن

بقلمريهام محمود فيتخسيس الوزن visibility665

دايت ال 1000 كالوري لتخسيس الوزن مناسب جدا للاشخاص اللي مش بيتحركوا كتير, لان في الحالة دي هيكونوا محتاجين دايت منخفض السعرات الحرارية, وفي الدايت ده هيخليكي تستهلكي 1000 سعر حراري بس خلال اليوم كله عشان يساعدك على تخسيس الوزن بسرعة وفي وقت قصير.

دايت ال 1000 كالوري بيعتمد بشكل اساسي على الانخفاض الشديد في السعرات الحرارية وبالتالي ده هيأدي لتخسيس الوزن, مع نشاط بدني قليل او معدوم, لان دايت ال 1000 كالوري هتعمل نقص في الطاقة هيوصل من 500 ل 1000 سعر حراري هتساعد على حرق الدهون بنسبة حوالي 8% من دهون الجسم.

– نصايح قبل الدايت:

– زي ما دايما بننصح ان قبل اي دايت ممكن تستشيري دكتور متخصص عشان تتأكدي ان الدايت مناسب ليكي, خصوصا لو في تاريخ طبي ليكي بتعاني من حاجة معينة, او عندك مشكلة اضطرابات في الاكل.

– لو وزنك اكتر من 75 كيلو وبتعملي نشاط بدني كتير بشكل يومي او بتتحركي كتير, في الحالة دي هتبقي محتاجة 1200 سعر حراري على الاقل يوميا, ولو انتي عايزة تخسري وزن على المدى الطويل يبقى دايت ال 1000 سعر حراري مش مناسب ليكي.

– وفي عوامل كتير بيتحدد على اساسها اي نظام غذائي مناسب ليكي, زي العمر والوزن الحالي وصحة العضم وصحة العضلات والتاريخ الطبي والصحة العقلية والوراثة, وغيرها من الاسباب اللي بيتحدد على اساسها النظام الغذائي المناسب لكل شخص.

دايت ال 1000 كالوري لتخسيس الوزن
دايت ال 1000 كالوري لتخسيس الوزن

– دايت ال 1000 كالوري لتخسيس الوزن:

هنشوف مع بعض دلوقتي مجموعة قوايم هتساعدك على تنظيم وجباتك كل يوم خلال فترة دايت ال 1000 سعر حراري, ونسبة السعرات الحرارية في اليوم لكل وجبة, وتقدري طبعا تاكلي اي وجبات تانية غير اللي هنقولها بس اهم حاجة متزدش عن ال 1000 سعر, يعني ضروري تعرفي سعرات كل حاجة بتاكليها وتحسبيها عشان يبقى في النهاية اليوم كله مستهلكتيش فيه اكتر من 1000 سعر.

1- القايمة 1:

– الصبح بدري قبل الفطار: كوباية مية دافية مضاف لها معلقتين خل تفاح – 6 سعر حراري.

– الفطار: بياض بيضتين مسلوقين وطبق فاكهة متقطعة – 86 سعر حراري.

– قبل الغدا: 100 جرام زبادي خالي من الدسم – 145 سعر حراري.

– الغدا: طبق خس مع صوص الزبادي – 351 سعر حراري.

– بعد الغدا: طبق بطيخ – 46 سعر حراري.

– وجبة مسائية خفيفة: كوباية شاي اخضر وقطعتين بسكويت دايجستيف او اي نوع بسكويت بالقمح الكامل – 142 سعر حراري.

– العشا: طبق سلطة مع صوص سلطة خالي من الدهون – 221 سعر حراري.

السعرات الحرارية من النظام ده خلال اليوم كله 1008 سعر حراري, وممكن الصبح بدل المية الدافية وخل التفاح تشربي شاي اخضر, الشاي الاخضر تقريبا بيحتوي على 0 سعر حراري وغني بمضادات الاكسدة, ومفيد جدا للبشرة والجهاز الهضمي.

دايت ال 1000 كالوري لتخسيس الوزن
دايت ال 1000 كالوري لتخسيس الوزن

2- القايمة 2:

– الصبح بدري قبل الفطار: مية دافية مضاف ليها عصير ليمون وعسل نحل – 70 سعر حراري.

– الفطار: طبق شوفان مع التوت – 101 سعر حراري.

– قبل الغدا: كوباية شاي اخضر – 0 سعر حراري.

– الغدا: شوربة كرنب و 100 جرام زبادي خالية من الدسم – 227 سعر حراري.

– بعد الغدا: ثمرة خوخ وثمرة برتقان – 98 سعر حراري.

– سناكس مسائي:  كوباية شاي اخضر وقطعتين بسكويت دايجستيف – 142 سعر حراري.

– العشا: طبق عدس مسلوق مع فاصوليا خضرا وفلفل حلو وبسلة وثوم مفروم, وممكن شوربة خضار او خضار سوتيه – 386 سعر حراري.

السعرات الحرارية للنظام ده في اليوم كله 1024 سعر حراري.

دايت ال 1000 كالوري لتخسيس الوزن

3- القايمة 3:

– الصبح بدري قبل الفطار: كوباية سموزي خضروات متكون من 1 ثمرة جزر, 1 ثمرة طماطم, 1 ثمرة خيار, وملو الكف سبانخ – 98 سعر حراري.

– الفطار: كوباية حليب صويا, شريحة خبز اسمر بالقمح الكامل, بياض بيضتين مسلوقين او كوباية حليب الصويا مع ثمرة موز – من 157 ل 159 سعر حراري.

– قبل الغدا: كوباية لبن رايب او كوباية عصير بطيخ وكيوي – من 40 ل 91 سعر حراري.

– الغدا: شوربة فراخ مع الخضروات او خضار مشوي مع 100 جرام زبادي – من 152 ل 187 سعر حراري.

– بعد الغدا: 1 ثمرة كمثرى و 1 ثمرة برتقان – 143 سعر حراري.

– سناكس مسائي: كوباية شاي اخضر وقطعتين بسكويت دايجستيف – 142 سعر حراري.

– العشا: سمك مشوي و 100 جرام زبادي, او شوربة خضار “كرنب وبصل وثوم وجزر” مع 2 شريحة خبز بالقمح الكامل – من 265 ل 296 سعر حراري.

السعرات الحرارية للنظام في اليوم كله 1050 سعر حراري.

دايت ال 1000 كالوري لتخسيس الوزن

– ايه الاكلات اللي المفروض تاكليها في نظام ال 1000 كالوري:

دايت ال 1000 كالوري بيعتمد على الوجبات الصغيرة والمتكررة بالاضافة لخفض كمية الدهون والسكريات والكربوهيدرات, ومسموح بشرب المشروبات زي الصودا الدايت والقهوة ولكن باعتدال, ومينصحش مع النظام ده بتمارين قاسية لانه بيدي كمية طاقة قليلة للجسم بسبب انخفاض السعرات الحرارية في النظام, وضروري تختاري الحاجات اللي هتاكليها بعناية جدا بحيث تحطي قايمة نظام غذائي صحي يوصلك للنتايج المطلوبة.

– الاكلات في نظام ال 1000 سعر حراري ضروري تكون بتحتوي على فيتامين B, والبروتينات, والالياف اللي عادة هتلاقيها في الاطعمة اللي معمولة من القمح والانزيمات.

– نظام ال 1000 سعر بيكون محتاج خفض لانواع الاكل الكاملة زي الكربوهيدرات او الدهون الغير مشبعة.

– الكالسيوم ممكن تاخديه باضافة اللبن قليل الدسم والخضروات الخضرا للنظام, وركزي على تناول الخضار والفاكهة الطازة.

– تقدري تاكلي انواع فاكهة زي البرتقان والكنتالوب والكيوي والكمثرى والفراولة والتوت بانواعه اللي بتدي للجسم الحد الادنى من السعرات الحرارية.

– الخضروات الخضرا زي السبانخ والكرفس والكوسة والبروكلي, كلها خضروات غنية بالفيتامينات والمعادن وفي نفس الوقت منخفضة السعرات الحرارية.

– الكرنب, جزء واحد من الكرنب بيحتوي على 35 سعر حراري بس, وفي نفس الوقت غني جدا بالالياف الغذائية.

– الخضروات زي الخيار والكرفس والفلفل بيحتوا على نسبة عالية من المية.

– الاكلات اللي المفروض تتجنبيها:

الاكلات دي المفروض تتجنبيها تماما خلال نظام ال 1000 سعر حراري.

– الدهون والزيوت: زيت جوز الهند, زيت الجوز, زيت النخيل, زيت الافوكادو, زيوت الدهون الحيوانية, الزبدة, زبدة الفول السوداني, زبدة اللوز, زبدة الكاجو, الجبنة, والجبنة الكريمي, والسمنة.

– البذور والمكسرات: البندق, الكاجو, بذور البطيخ, الجوز, الصنوبر, جوز الهند المجفف, الفول السوداني, البندق, المكسرات البرازيلي, الفستق, بذور الشيا.

– الفواكه المجففة : التمر, البرقوق, الزبيب, المشمش, التين, التوت البري.

– الفواكة, الخضار, البقوليات: الافوكادو, المانجا, كاستر التفاح, البطاطس, الذرة, فول الصويا, الفاصوليا البيضا.

– البروتينات: اللحم البقري, واللحم الضاني, والتوفو.

دايت ال 1000 كالوري لتخسيس الوزن
دايت ال 1000 كالوري لتخسيس الوزن

– وصفات لنظام ال 1000 سعر حراري:

– تاكو الخس مع صوص الزبادي:

المكونات:

اوراق خس طازة.

½ ثمرة خيار.

½ ثمرة فلفل اصفر واحمر.

1 ثمرة طماطم.

½ صدر فرخة من غير جلد.

½ معلقة عصير ليمون.

½ ثمرة فلفل حار.

100 جرام زبادي.

ملو الكف كزبرة خضرا.

1 معلقة صغيرة شطة.

ملح حسب الرغبة.

رشة فلفل اسود.

الطريقة:

قطعي صدور الفراخ وتبليها بالملح والفلفل واسلقيها في المية, بعد ما تتسلق قطعيها, ابشري الخيار او اقطعية رفيع, وقطعي الفلفل الحلو والطماطم شرايح عريضة, وقطعي والفلفل الحار شرايح رفيعة, هاتي الزبادي حطيه في طبق وضيفي له الخيار المبشور والملح والشطة وعصير الليمون وقلبيهم مع بعض كويس, اغسلي ورق الخس, وحطي عليها شريحة طماطم وقطعة فراخ ورشة ملح وفلفل, وشوية فلفل حلو وفلفل حار, وبعدها حطي من فوق صوص الزبادي والكزبرة.

ولو انتي نباتية ممكن تستبدلي الفراخ بالجزر, وبروكلي مقلي, ومشروم.

دايت ال 1000 كالوري لتخسيس الوزن
دايت ال 1000 كالوري لتخسيس الوزن

– سلطة خضروات:

المكونات:

1 ثمرة كوسة.

1 ثمرة جزر.

1 ثمرة طماطم.

ملو الكف سبانخ.

1 معلقة كبيرة زيت سمسم.

عصير ½ ليمونة.

كزبرة خضرا.

ملح – فلفل.

الطريقة:

قطعي الجزر والكوسة شرايح رفيعة, قطعي الطماطم شرايح عريضة, قطعي السبانخ.

اعملي صوص السلطة اخلطي زيت السمسم وعصير الليمون والملح والفلفل الاسود وقلبيهم مع بعض كويس, ضيفي الخليط للخضروات اللي قطعتيها, قلبيهم واخلطيهم مع بعض كويس, وفي الاخر رشي على الوش شوية كزبرة خضرا متقطعين.

وتقدري تضيفي للسلطة شرايح رفيعة من الفراخ المسلوقة او الديك الرومي.

دايت ال 1000 كالوري لتخسيس الوزن
دايت ال 1000 كالوري لتخسيس الوزن

– دور التمارين في دايت ال 1000 سعر حراري:

اكيد ممارسة التمارين عادة صحية ومفيدة لاي حد عايز يقلل وزنه, لكن مع ذلك نظام ال 1000 سعر حراري يعتبر نظام منخفض السعرات الحرارية لانقاص الوزن بسرعة, وبالتالي مننصحش بممارسة رياضة بشكل قوي اثناء النظام, ممكن تمارسي المشي بسرعة متوسطة, ممكن تعملي بعض تمارين التمدد عشان تحافظي نشاط العضلات وتحافظي على دوران الدم, واثناء فترى الدايت ممكن تحسي بضعف شوية لانك بتستهلكي سعرات حرارية اقل بكتير من العادي, ولو مارستي تمارين قوية ممكن تزود الحالة دي, عشان كده الافضل انك تبدأي تمارسي تمارين رياضية بعد ما توقفي نظام ال 1000 سعر حراري.

دايت ال 1000 كالوري لتخسيس الوزن
دايت ال 1000 كالوري لتخسيس الوزن

– فوايد نظام ال 1000 سعر حراري:

– يعتبر نظام ال 1000 سعر حراري مفيد للاشخاص اللي عايزين يحرقوا سعرات حرارية بشكل سريع لانه نظام منخفض السعرات الحرارية, يعني هيكون مناسب جدا لو عايزة تفقدي وزن بسرعة, او بتمهدي الطريق لنظام غذائي لتخسيس الوزن على المدى الطويل.

– نظام الوجبات في دايت ال 1000 سعر حراري بيوفرلك تغذية كويسة وفي نفس الوقت منخفض السعرات الحرارية للحد الادنى.

– النظام ده بيركز في المقام الاول على استهلاك الفواكه والخضروات لانها قليلة السعرات الحرارية وفي نفس الوقت بتحتوي على نسبة عالية من المية والالياف, وده بيخليكي تحسي بالشبع وبيمنعك من الافراط في الاكل.

– والميزة المهمة ان النظام سهل وبسيط, وبيشجع على الاكل الصحي, وبيساعدك تتخلصي من وزنك الزايد, وبيزود ثقتك بنفسك.

– الاثار الجانبية لدايت ال 1000 سعر حراري:

– اي نظام غذائي منخفض السعرات الحرارية مش بيوفر للجسم كل العناصر الغذائية الحيوية اللي بتوفر الطاقة للجسم, والسعرات الحرارية اكيد بنحتاجها لمختلف الانشطة خلال اليوم زي المشي والجري والنوم وحتى لعملية الهضم, والانخفاض الشديد في السعرات الحرارية اكيد مش هيكون صحي اوي.

– بسبب نقص بعض العناصر ممكن النظام يسبب نسبة جفاف, وفقدان كتلة العضلات, ونقص في الطاقة, وانخفاض معدل ضربات القلب, وتساقط الشعر, وضعف الضوافر.

– خفض السعرات الحرارية بشكل كبير بيخفض من عملية التمثيل الغذائي, وممكن ينتج عن ده زيادة في الوزن بشكل اسرع في المستقبل لما ترجعي تزودي كمية السعرات الحرارية.

– النظام ده مناسب للنساء, ومش مناسب للرجالة, بالاضافة انه كمان مش مناسب للاشخاص اللي اجسامهم ضخمة اوي او رياضية.

– ممكن يسبب التعب وفقدان التركيز وتقلب المزاج والارق زي اي نوع دايت قاسي او اي نظام غذائي بيخسس بسرعة وفي وقت قصير.

دايت ال 1000 كالوري لتخسيس الوزن
دايت ال 1000 كالوري لتخسيس الوزن

– الحاجات اللي تعمليها:

1- نظام الدايت ده ميزدش عن 10 ايام بس وبعدين توقفيه.

2- زي ما قولنا استشيري دكتور قبل ما تبدأي عشان تعرفي النظام مناسب ليكي ولا لا.

3- ممكن تمارسي المشي بسرعة متوسطة والتمارين الخفيفة.

4- دخلي في النظام فواكه وخضروات طازة كتير.

5- كلي كمية مناسبة من البروتين عشان تساعد في بناء العضلات.

6- اشربي كمية مية كفاية كل يوم.

– الحاجات اللي تتجنبيها:

1- متاكليش كميات اكل زيادة.

2- اتجنبي المشروبات اللي فيها سكريات والمشروبات الكربونية “المشروبات الغازية”.

3- متقعديش في مكان واحد فترة طويلة حاولي تتحركي كل فترة.

4- متتخطيش اي وجبة طعام او تهمليها.

5- متقلقيش لو عديتي ال 1000 سعر حراري شوية في يوم, ممكن تعوضي في اليوم اللي بعده وتلغي مثلا طبق البطيخ وتشربي بداله كوباية شاي اخضر.

دايت ال 1000 كالوري لتخسيس الوزن
دايت ال 1000 كالوري لتخسيس الوزن

– نصايح مع دايت ال 1000 سعر حراري:

1- لو بترضعي رضاعة طبيعية النظام مش هيبقى مناسب ليكي في الفترة دي, والافضل تستشيري دكتور امتى ممكن تمشي عليه.

2- كلي بروتينات خالية من الدهون اثناء النظام زي الفراخ من غير جلد, الديك الرومي, السمك, المشروم, العدس, اتجنبي الفاصوليا الخضرا واللحم البقري والتوفو.

3- تقدري تعملي يوم فري زي اي نظام غذائي, لكن ضروري تاكلي في اليوم الفري كميات محدودة بردو, ده هيساعدك تكملي في اليوم اللي بعده في النظام, ممكن يوم في الاسبوع تزودي السعرات ما بين 1300 – 1400 سعر حراري, وفي اليومين اللي بعد اليوم الفري اشربي شاي اخضر مرتين في اليوم عشان تعوضي اليوم الفري, ومش بننصح انك تزودي عدد السعرات الحرارية ل 2000 سعر حراري في اليوم الفري وبعدين تصومي تاني يوم ومتاكليش حاجة خالص, ابعدي عن الاختيار ده تماما.

دايت ال 1000 كالوري لتخسيس الوزن
دايت ال 1000 كالوري لتخسيس الوزن

في النهاية زي ما قولنا بننصح باستشارة دكتور قبل اي نظام غذائي, ونظام ال 1000 سعر هيساعدك تخسري وزن بسرعة لكن زيه زي كل الانظمة الغذائية القاسية او اللي بتنزل الوزن بسرعة هي وسيلة مننصحش تمشي عليها بشكل مستمر او لفترات طويلة لانه مش صحي الى حد ما, بننصح بيه بس لو عايزة تنزلي كام كيلو بسرعة في مدة قصيرة وبعدها توقفيه متستمريش عليه.

ازاي تستخدمي زيت الخروع لتخسيس وزنك 4 كيلو في اسبوعين

طريقة استخدام زيت الخروع لتخسيس الوزن