وصفات لعمل صوص السلطة Salad Dressing بنفسك في البيت

بقلمريهام محمود فيسلطات visibility174

السلطة برغم من انها طبق مهم جدا وصحي ضروري يكون موجود على السفرة وجزء من وجبتنا, لكن في كتير مننا مش بيحب اكل السلطة بشكل كبير, وعشان نغير من الطعم التقليدي للسلطة ونخلي الطبق مختلف ممكن نحط له شوية اضافات تغير في طعمه وتخليه احلى وتشجعك انك تاكليه, وهنلاقي موجود في كل الهايبر ماركت انواع صوصات كتير للسلطة اللي ممكن تضيفيها وتديها طعم حلو لكن احنا النهاردة من خلال موضوعنا هنقولك مجموعة وصفات لعمل صوص السلطة بنفسك في البيت هتضيف للطبق نكهة وطعم مميز ومختلف.

وصفات لعمل صوص السلطة:

1- صوص الرانش:

المكونات:

– ¾ كوباية زبادي.

– 1 فص ثوم مفروم.

– 1 معلقة صغيرة ثوم بودر.

– ¼ كوباية بقدونس طازة مفروم, او 1 معلقة صغيرة بقدونس مجفف.

– ½ بصلة متوسطة متقطعة مكعبات “حوالي 2 معلقة كبيرة”, او 2 معلقة كبيرة بصل بودر.

– 2 معلقة كبيرة كرات طازة مفروم, او 1 معلقة كبيرة كرات مجفف.

– 1 معلقة صغيرة ملح.

– ¼ معلقة صغيرة فلفل اسود.

– 2 معلقة صغيرة مسطردة “خردل”.

– عصير ½ ليمونة “حوالي 2 معلقة كبيرة”.

– من ¼ – ½ كوباية لبن رايب.

الطريقة:

اخلطي المكونات كلها مع بعض في برطمان محكم الغلق, واقفليه ورجيه كويس عشان تمزجي كل المكونات مع بعض, او ممكن تحطي المكونات كلها في البلندر وتضربيهم مع بعض.

وكده يكون الصوص جاهز احفظيه في التلاجة وسيبيه 30 دقيقة على الاقل, والافضل يكون ساعتين قبل ما تستخدميه على السلطة, بعدها حطي منه على طبق السلطة بتاعك, واحفظي الباقي في التلاجة.

ولو انتي عايزة الصوص يكون سميك يبقى اكتفي ب ¼ كوباية بس من اللبن الرايب, ولو عايزاه خفيف زودي كمية اللبن الرايب حسب السمك او القوام اللي انتي عايزاه.

ضروري حفظ الصوص في ازازة او برطمان محكم الغلق, والكمية دي هتقعد معاكي تقريبا لحد اسبوع في التلاجة.

وصفات لعمل صوص السلطة
وصفات لعمل صوص السلطة

2- صوص الليمون الحار:

المكونات:

– بشر وعصير ليمونتين “حوالي 4 معالق كبيرة عصير ليمون و 3 معالق صغيرة بشر القشر”.

– ¼ كوباية خل بلسميك او خل عادي.

– 1 معلقة كبيرة صويا صوص.

– 1 معلقة كبيرة عسل نحل.

– 1/3 كوباية زيت زيتون “ممكن تستبدليه باي نوع زيت تفضليه”.

– 1 فص ثوم مفروم ناعم او 1 معلقة صغيرة ثوم بودر.

– ½ معلقة صغيرة شطة.

– 1 معلقة صغيرة كمون مطحون.

– ½ معلقة صغيرة ملح.

الطريقة:

اخلطي المكونات كلها مع بعض كويس في برطمان محكم الغلق.

حطيه في التلاجة وسيبي النكهات تمتزج مع بعض لمدة 30 دقيقة على الاقل, والافضل ساعتين قبل الاستخدام.

وصفات لعمل صوص السلطة
وصفات لعمل صوص السلطة

3- صوص المسطردة بالعسل:

المكونات:

– ¼ كوباية مسطردة.

– ¼ كوباية عسل نحل.

– ¼ كوباية خل التفاح.

– ¼ كوباية زيت زيتون “ممكن تستبدليه باي نوع زيت تفضليه”.

– 1 معلقة صغيرة ملح.

– ¼ معلقة صغيرة فلفل اسود.

الطريقة:

نفس الطرق اللي فاتت اخلطي المكونات مع بعض وسيبيها من 30 دقيقة لساعتين في التلاجة قبل الاستخدام.

وصفات لعمل صوص السلطة
وصفات لعمل صوص السلطة

4- الصوص الايطالي:

المكونات:

– 2/3 كوباية زيت زيتون “ممكن تستبدليه باي نوع زيت”.

– ¼ كوباية خل البلسميك او خل عادي.

– 3 معالق كبيرة جبنة بارميزان مبشورة.

– 1 معلقة كبيرة بقدونس طازة مفروم او 2 معلقة صغيرة بقدونس مجفف.

– ¼ بصلة متوسطة متقطعة مكعبات “حوالي 2 معلقة كبيرة” او 2 معلقة صغيرة بصل بودر.

– عصير ½ ليمونة “حوالي 2 معلقة كبيرة”.

– 1 معلقة كبيرة ريحان طازة مفروم او 2 معلقة صغيرة ريحان مجفف.

– 1 معلقة كبيرة زعتر طازة مفروم او 2 معلقة صغيرة زعتر مجفف.

– 1 فص ثوم مفروم او 1 معلقة صغيرة ثوم بودر.

– 1 معلقة صغيرة عسل نحل.

– 1 معلقة صغيرة ملح.

– ¼ معلقة صغيرة فلفل اسود.

الطريقة:

نفس الطرق اللي فاتت.

وصفات لعمل صوص السلطة
وصفات لعمل صوص السلطة

5- صوص الزبادي مع البلو تشيز:

المكونات:

– ½ كوباية زبادي.

– 2 معلقة كبيرة لبن رايب.

– عصير ½ ليمون “حوالي 2 معلقة كبيرة”.

– 1 معلقة صغيرة صويا صوص.

– ½ كوباية جبنة ريكفورد مفتتة او مهروسة بالشوكة.

– ½ معلقة صغيرة ملح.

– ¼ معلقة صغيرة فلفل اسود.

– 1 فص ثوم مفروم او 1 معلقة صغيرة ثوم بودر.

الطريقة:

نفس الطرق اللي فاتت.

وصفات لعمل صوص السلطة
وصفات لعمل صوص السلطة

6- صوص الليمون:

المكونات:

– ¼ كوباية خل بلسميك او عادي.

– 2 معلقة كبيرة مسطردة.

– ½ كوباية زيت زيتون “ممكن تستبدليه باي نوع زيت”.

– بشر وعصير ليمونة “حوالي 4 معالق كبيرة عصير ليمون و 3 معالق صغيرة بشر قشر الليمون”.

– 1 فص ثوم مفروم او 1 معلقة صغيرة ثوم بودر.

– 1 معلقة كبيرة عسل نحل.

– 1 معلقة صغيرة ملح.

– ¼ معلقة صغيرة فلفل اسود.

– 1 معلقة كبيرة زعتر طازة مفروم او 2 معلقة كبيرة زعتر مجفف.

الطريقة:

نفس الطرق اللي فاتت.

وصفات لعمل صوص السلطة
وصفات لعمل صوص السلطة

7- صوص السمسم والجنزبيل:

المكونات:

– 1/3 كوباية زيت زيتون “ممكن تستبدليه باي نوع زيت”.

– 2 معلقة كبيرة زيت سمسم.

– ¼ كوباية خل ارز او خل بلسميك او خل عادي.

– 1 فص ثوم مفروم او 1 معلقة صغيرة ثوم بودر.

– 2 معلقة كبيرة صويا صوص.

– 1 معلقة كبيرة عسل نحل.

– 2 معلقة كبيرة جنزبيل طازة مبشور او 2 معلقة صغيرة جنزبيل بودر.

الطريقة:

نفس الطرق اللي فاتت.

وصفات لعمل صوص السلطة
وصفات لعمل صوص السلطة

8- صوص خل البلسميك:

المكونات:

– ½ كوباية زيت زيتون.

– ½ كوباية خل البلسميك.

– 2 معلقة صغيرة مسطردة.

– 1 فص ثوم مفروم او 1 معلقة صغيرة ثوم بودر.

– 1 معلقة كبيرة عسل نحل.

– 1 معلقة صغيرة ملح.

– ¼ معلقة صغيرة فلفل اسود.

الطريقة:

نفس الطرق اللي فاتت, وممكن ترشي على طبق السلطة في الاخر رشة قرفة لزيادة النكهة.

وصفات لعمل صوص السلطة
وصفات لعمل صوص السلطة

9- الصوص الفرنسي:

المكونات:

– 3 معالق كبيرة زيت زيتون.

– 1 معلقة كبيرة خل.

– 1 معلقة كبيرة كاتشب.

– 1 معلقة صغيرة مسطردة.

– 1 معلقة صغيرة سكر بني او عادي.

– 1 معلقة صغيرة صويا صوص.

– 1 فص ثوم مفروم او 1 معلقة صغيرة ثوم بودر.

– ¼ معلقة صغيرة بابريكا.

– ¼ معلقة صغيرة ملح او حسب الرغبة.

– ¼ معلقة صغيرة فلفل اسود.

الطريقة:

نفس الطرق اللي فاتت.

وصفات لعمل صوص السلطة
وصفات لعمل صوص السلطة

10- صوص الكاري:

المكونات:

– 1 ½ كوباية زبادي.

– 1 معلقة كبيرة كاري بودر.

– 1 معلقة كبيرة عصير ليمون.

– ¼ معلقة صغيرة ملح او حسب الرغبة.

– ¼ معلقة صغيرة فلفل اسود.

الطريقة:

نفس الطرق اللي فاتت.

وصفات لعمل صوص السلطة

11- صوص ثاوزند ايلاند:

المكونات:

– 1 كوباية مايونيز.

– 4 معالق كبيرة كاتشب.

– 2 معلقة كبيرة خل:

– 1 معلقة كبيرة خيار مخلل مفروم.

– 1 معلقة كبيرة سكر.

– ¼ معلقة كبيرة بصل بودر.

– ¼ معلقة صغيرة ملح او حسب الرغبة.

– ¼ معلقة صغيرة فلفل اسود.

الطريقة:

نفس الطرق اللي فاتت.

وصفات لعمل صوص السلطة

12- صوص الافوكادو بالكزبرة:

المكونات:

– 1 ثمرة افوكادو.

– ½ كوباية كزبرة طازة.

– ¼ كوباية عصير برتقان.

– ¼ كوباية زيت زيتون “ممكن تستبدليه باي نوع زيت”.

– 2 معلقة كبيرة خل التفاح.

– 2 معلقة كبيرة عصير ليمون.

– 1 معلقة كبيرة عسل نحل.

– ¼ معلقة صغيرة ملح او حسب الرغبة.

– ¼ معلقة صغيرة فلفل اسود.

الطريقة:

قشري الافوكادو وقطعيه لشرايح, حطيه في الخلاط وضيفي له باقي المكونات واضربيهم مع بعض كويس, وزي الطرق اللي فاتت حطيه في التلاجة من 30 دقيقة لساعتين قبل الاستخدام.

وصفات لعمل صوص السلطة

لكل عشاق البطاطس طرق مختلفة لعمل البطاطس المحمرة

طرق لعمل البطاطس المحمرة