7 اوقات لو حسيتي فيهم بالغيرة هيكون كويس لعلاقتك

بقلمريهام محمود فيعلاقات visibility4511

الغيرة هو احساس اكيد مر علينا كلنا في وقت من الاوقات, والغيرة مش بس في العلاقات لكن ممكن تكون على افراد عيلتك او اصحابك المقربين, لكن هي اكيد بتكون اكتر في علاقات الحب, والشعور بالغيرة هو يعتبر سلاح ذو حدين لو زيادة عن اللزوم ممكن يدمر العلاقة ويأدي للانفصال, لكن لو بشكل معتدل او في المواقف الصح هيكون حاجة كويسة لعلاقتك ومش هيضرها, والنهاردة من خلال المقال بتاعنا هنقول لبنات حوا امتى الغيرة تكون كويسة لعلاقتك ومش هتضرها ولا هتتسبب في تدميرها.

امتى الغيرة تكون كويسة لعلاقتك:

الغيرة عادة بتظهر في معظم الاوقات لما تحسي بتهديد طرف تالت في العلاقة, وان في حد بيحاول يتقرب من شريكك, في الحالة دي انتي بتبدأي تحسي بعدم امان وبيتولد عنك احساس الغيرة, لكن امتى فعلا تكون الغيرة في مكانها او في وقتها الصح ده اللي هنعرفه من خلال السطور الجاية.

1- لما حد يتجاوز حدود العلاقة:

كل علاقة بيكون ليها مجموعة من الحدود بتحكمها, واحيانا بتكون الحدود دي واضحة للطرف التاني, واحيان تانية بيكون ضروري انك تناقشي الحدود دي وتوضحيها, والالتزام بالحدود دي في العلاقة تعتبر علامة على احترام شريك حياتك ليكي, واكيد هيكون من الطبيعي والصحي جدا انك تحسي بالقلق لما حد يتجاوز الحدود دي, وفي بعض الاحيان ممكن تخطي الحدود دي يأذيكي عاطفيا او جسديا, وبمجرد ما تحسي بالشعور ده يبقى ده معناه ان الشخص ده مش بيحترمك بشكل كافي.

امتى الغيرة تكون كويسة لعلاقتك
امتى الغيرة تكون كويسة لعلاقتك

2- لما حد يغازل شريكك قدامك:

غالبا السلوكيات دي ممكن تحصل في الحفلات او الافراح او المناسبات الاجتماعية المختلفة, ممكن تقابلي في المناسبات دي اشخاص ميعرفوكيش بشكل شخصي, وعادة كمان في الاماكن او المناسبات دي بنلاقي بنات كتير بتدور على الارتباط, ولو شريكك بقى شكله حلو وشيك اكيد هتلاقي العيون عليه كتير, وممكن حد يقول كلمة اعجاب او يتصرف تصرف يبين انه مهتم بيه, فاكيد في الحالة دي مقبول جدا انك تحسي بالغيرة, لما تلاقي اشخاص تانيين معجبين بيه وبيبينوا ده, في الوقت ده متخبيش شعورك واعترفي بيه ووصلي لشريكك كمان شعورك ده.

امتى الغيرة تكون كويسة لعلاقتك
امتى الغيرة تكون كويسة لعلاقتك

3- لما شريكك يهتم باصدقائه اكتر منك:

اكيد في اي علاقة كويسة الطرفين بيدوا اهتمام لبعض اكتر من اهتمامهم باي شخص تاني, لكن مع ذلك, مع مرور الوقت ممكن التركيز يتحرك او يقل شوية, ويوصل ان الزوجين ممكن يقضوا اوقات اكتر مع اصحابهم وخصوصا لما يكونوا الاصدقاء بينكم مش مشتركين, والدافع الاكتر للغيرة لما يكون للزوج اصدقاء من الجنس الاخر مثلا زمايله في الشغل وبينهم صداقة, في الحالة دي الغيرة بتكون اكيد مفهومة ومقبولة جدا.

امتى الغيرة تكون كويسة لعلاقتك
امتى الغيرة تكون كويسة لعلاقتك

4- لما تتغير الاولويات في العلاقة:

اكيد اي واحدة بتحب تكون ليها الاولوية في حياة شريكها, لكن مع التكنولوجي والعالم اللي احنا عايشين فيه الاولويات ممكن تتغير شوية او تضيع في وسط كل اللي احنا عايشين فيه, وتلاقي شريكك ممكن يدي اولوية لشغله او اصحابه او غيرهم من الاشخاص اكتر منك, فأكيد في الحالة دي تلقائيا لازم تحسي بالغيرة.

امتى الغيرة تكون كويسة لعلاقتك
امتى الغيرة تكون كويسة لعلاقتك

5- لما تحسي بعدم التقدير:

واحدة من اكتر المشاكل اللي ممكن تدمر العلاقة هي الاحساس بعدم التقدير من الشريك, في بعض الاحيان بنتعود على تصرفات وحاجات معينة من شركائنا وبننسى اننا نشكرهم عليها لانها بتتعمل بشكل مستمر من غير ما نطلبها وبنوصل اننا نحس انها حق مكتسب مش محتاج شكر, عشان كده شكر الشريك وتقدير كل حاجة بيعملها مهمة جدا, فلو لقيتي شريكك بيقدر او بيشكر اشخاص تانيين على حاجات بسيطة او اقل من اللي بتقديمها اكيد في الحالة دي هتحسي بالغيرة لانها شايفة انه بيقدرهم على حاجات اقل كتير من اللي انتي بتعمليها عشانه.

امتى الغيرة تكون كويسة لعلاقتك
امتى الغيرة تكون كويسة لعلاقتك

6- لما ميقدرش قيمة وقته معاكي:

لما تخرجي مع زوجك في اي مكان وتحسي بلا مبالاه منه او مافيش عاطفة ومش مهتم بيكي, ومشغول مثلا بتليفونه بيكلم صديق او زميل في الشغل, او يهزر مثلا مع حد في المكان اللي انتوا موجودين فيه بطريقة تضايق, اكيد التصرفات دي هتجبرك انك تحسي بالغيرة.

امتى الغيرة تكون كويسة لعلاقتك
امتى الغيرة تكون كويسة لعلاقتك

7- لما يحكي مشاكله لاصدقائه بدل ما يثق فيكي ويحكي لك:

اكيد احساس يضايق جدا انه بدل ما شريكك يتصل بيكي يشاركك او يحكي لك مشكلة, يحكي لاصحابه ويثق فيهم اكتر انهم يفكروا معاه في حلول لمشكلته, في الحالة دي هيجيلك احساس كأنك غريبة عنه, واكيد شعور صحي جدا انك تحسي بالغيرة في الحالة دي.

امتى الغيرة تكون كويسة لعلاقتك
امتى الغيرة تكون كويسة لعلاقتك

في النهاية الغيرة مش احساس غير صحي في المطلق, لكن كل اللي عليكي انك تفهمي ليه بتغيري او ايه الاوقات اللي فعلا المفروض تحسي فيها بالغيرة وتكون كويسة وصحية لعلاقتك, واكيد لما تفهمي ده كويس هتقدري توجهي المشاعر بشكل ايجابي مش بشكل سلبي اللي يوصل انه ممكن يدمر العلاقة.

10 حاجات اي راجل بيحب يسمعهم

حاجات اي راجل بيحب يسمعهم