14 علاج سبا فعال للشعر تقدري تعمليهم بنفسك في البيت

بقلمريهام محمود فيشعر visibility491

اكيد مش كل كلنا بيبقى عندنا الوقت او الميزانية اننا نروح سبا “Spa” عشان نهتم بنفسنا, لكن الخبر الحلو انك تقدري تجيبي السبا في البيت بكل سهولة من خلال الوصفات الطبيعية, والنهاردة من خلال موضوعنا هنقولك مجموعة علاجات سبا للشعر تقدري تعمليها بنفسك في البيت, وهنتعرف على فوايدها للشعر.

– ايه هو علاج السبا للشعر؟

علاج السبا للشعر بيوصفوه انه “اعادة احياء الشعر” بحيث ان الشعر يتغذى ويترطب كويس بمكونات تساعد على عكس التلف وتعزز صحة الشعر, وبتخلي شعرك كأنه متعرضش لاي تلف او ضرر.

– هل علاج السبا مفيد للشعر؟

اكيد علاجات السبا للشعر مفيدة جدا, وفي انواع مختلفة من العلاجات, وكل واحد بيستخدم فيه مكونات نختلفة, في منها بيستخدم مواد كيميائية, ومنها بيعتمد بشكل كلي على المكونات الطبيعية, لكن العلاجات اللي بتستخدم مواد كيميائية ممكن تتفاعل عكسيا مع فروة الراس او الشعر, بعكس العلاجات الطبيعية اللي بتكون خالية تماما من الآثار الجانبية, والنهاردة هنشوف 14 علاج سبا طبيعي للشعر, هترجع لشعرك صحته وتعالج التلف.

علاجات سبا للشعر
علاجات سبا للشعر

– علاجات سبا للشعر:

1- علاج سبا زيت الزيتون:

المكونات:

من 2 – 3 معالق كبيرة زيت زيتون.

فوطة.

طبق فيه مية مغلية.

الطريقة:

هاتي زيت الزيتون وممكن تزودي الكمية حسب طول وكثافة الشعر, دلكي فروة الراس والشعر بالزيت, اعملي بخار للشعر لمدة 10 دقايق بانك تجيبي طبق كبير مليان مية سخنة وانحني وغطي راسك بفوطة وخلي البخار يطلع على الشعر, بعدها شيلي الفوطة من على راسك وسيبي البخار يتغلل في الفروة لمدة 10 دقايق كمان, بعدها بلي الفوطة في المية السخنة واعصريها كويس اتخلصي من المية الزيادة ولفي بيها شعرك, وسيبيه ملفوف 15 دقيقة, وبعدها اغسلي الشعر بشامبو خالي من السلفات, كرري العلاج مرتين في الاسبوع.

زيت الزيتون يعتبر مرطب ممتاز للشعر, كمان هو مصدر غني لمضادات الاكسدة اللي بتساعد على منع واصلاح تلف الشعر, وبيعمل حاجز واقي للشعر, والعلاج ده مناسب لكل انواع الشعر.

علاجات سبا للشعر
علاجات سبا للشعر

2- علاج الافوكادو:

المكونات:

1 ثمرة افوكادو ناضجة.

1 معلقة كبيرة عسل نحل.

طبق فيه مية مغلية.

الطريقة:

اهرسي ثمرة الافوكادو كويس لحد ما تبقى ناعمة مافيهاش اي كتل, ضيفي عليها العسل, وبعدين حطي الخليط على الشعر كله من الجذور للاطراف, اعملي بخار للشعر بنفس الطريقة اللي فاتت لمدة 10 دقايق, وبعدين شيلي الفوطة وسيبي البخار يتغلل في الشعر لمدة 10 دقايق كمان, وبعدين سيبي الماسك على الشعر لمدة 20 دقيقة, وبعدها اغسلي الشعر بشامبو خالي من السلفات ومية فاترة, كرريه مرة في الاسبوع.

الافوكادو بيساعد على تعزيز نمو الشعر وبيديه لمعان وبيخليه صحي, كمان الافوكادو يعتبر مصدر ممتاز جدا للمواد الغذائية اللي بتساعد على تغذية الشعر ومنع الضرر, والزيوت الدهنية اللي موجودة في الافوكادو بتساعد على ترطيب الشعر, عشان كده العلاج ده يعتبر مناسب جدا للشعر الجاف.

علاجات سبا للشعر
علاجات سبا للشعر

3- علاج البيض:

المكونات:

1 بيضة كاملة.

2 معلقة كبيرة زيت جوز الهند.

طبق فيه مية مغلية.

فوطة.

الطريقة:

في طبق اخلطي البيض مع زيت جوز الهند كويس, عرضي شعرك للبخار لمدة 10 دقايق, وبعدين شيلي الفوطة وسيبي الشعر 10 دقايق, وبعدها حطي الماسك على الشعر كله, وسيبيه لمدة 20 دقيقة, وبعدها اغسلي الشعر بشامبو خالي من السلفات ومية باردة, كرريه مرة واحدة في الاسبوع.

البيض يعتبر مصدر غني جدا بالبروتينات اللي بتساعد على نمو الشعر, وبتقويه وبتمنع التلف, ونصيحة بسيطة لازم نفتكرها لما نيجي نغسل البيض من الشعر يكون بمية باردة مش سخنة, عشان ريحة البيض تروح من الشعر, والعلاج ده مناسب جدا للشعر العادي.

علاجات سبا للشعر
علاجات سبا للشعر

4- علاج الموز:

المكونات:

1 ثمرة موز ناضجة.

2 معلقة كبيرة زيت زيتون.

طبق فيه مية مغلية.

فوطة.

الطريقة:

اهرسي الموزة ناعم جدا لحد ما تتخلصي من اي كتل فيها, وبعدها ضيفي لها زيت الزيتون, عرضي شعرك للبخار لمدة 10 دقايق, وبعدين شيلي الفوطة وسيبيه 10 دقايق كمان, بعدها حطي ماسك الموز على الشعر كله, وسيبيه لمدة 30 دقيقة, وبعدها اغسليه بشامبو خالي من السلفات ومية باردة, كرريه من مرة لمرتين في الاسبوع.

الموز مصدر غني بالبوتاسيوم والزيوت الطبيعية والفيتامينات اللي بتساعد على تحسين نسيج الشعر والحفاظ على صحته, كمان الموز بيمنع الشعر من التكسر والانقسام لانه بيحسن مرونة الشعر, والعلاج ده يعتبر ممتاز جدا للشعر الجاف والتالف.

علاجات سبا للشعر
علاجات سبا للشعر

5- علاج اللبن والعسل:

المكونات:

1 كوب لبن.

1 معلقة كبيرة عسل.

طبق فيه مية مغلية.

فوطة.

الطريقة:

اخلطي اللبن والعسل مع بعض كويس, عرضي شعرك للبخار لمدة 10 دقايق, وبعدين شيلي الفوطة وسيبي الشعر لمدة 10 دقايق كمان, بعدها حطي الخليط على شعرك كله من الجذور للاطراف, وسيبيه لمدة 15 دقيقة, وبعدين اغسليه بشامبو خالي من السلفات ومية فاترة, كرريه مرة في الاسبوع.

العسل يعتبر مرطب طبيعي للشعر, واللبن بيساعد على تغذية الشعر لانه غني بالبروتينات, والاتنين مع بعض بيدوا لمعة للشعر وبيحسنوا ملمسه, والعلاج ده مناسب جدا للشعر العادي.

علاجات سبا للشعر
علاجات سبا للشعر

6- علاج كريم جوز الهند:

المكونات:

½ كوباية كريم جوز الهند وممكن تستخدموا حليب جوز الهند لو مش متوفر كريم.

طبق فيه مية مغلية.

فوطة.

الطريقة:

عرضي شعرك للبخار لمدة 10 دقايق, وبعدين شيلي الفوطة وسيبيه 10 دقايق كمان, بعدها حطي كريم جوز الهند على الشعر, وسيبيه لمدة ساعة, وبعدين اغسلي الشعر بشامبو خالي من السلفات ومية باردة, كرريه مرة في الاسبوع.

كريم جوز الهند يعتبر مصدر غني جدا بالزيوت الدهنية والفيتامينات B1, B3, B5, B6, C, E, وبيحتوي كمان على المعادن زي الكالسيوم والحديد والسيلينيوم والمغنيسيوم والفوسفور, والمواد الغذائية دي كلها بتساعد على تغذية الشعر بعمق وده بيخلي الشعر صحي وقوي, والعلاج ده ممتاز جدا للشعر الجاف.

علاجات سبا للشعر
علاجات سبا للشعر

7- علاج الفراولة:

المكونات:

½ كوباية فراولة متقطعة.

1 صفار بيضة.

2 معلقة كبيرة زيت زيتون.

الطريقة:

اخلطي المكونات مع بعض واضربيهم مع بعض في الخلاط لحد ما الخليط يبقى ناعم, عرضي شعرك للبخار لمدة 10 دقايق, وبعدين شيلي الفوطة وسيبي الشعر 10 دقايق كمان, بعدها حطي الخليط على الشعر, وسيبيه لمدة 15 دقيقة, وبعدين اغسليه بشامبو خالي من السلفات ومية باردة, كرريه مرة في الاسبوع.

الماسك ده مثالي جدا لكل اللي بيعانوا من تساقط الشعر, لان الفراولة بتحتوي على حمض الالاجيك اللي بيساعد على منع تساقط الشعر, كمان الفراولة غنية بحمض الفوليك والفيامينات B5, B6, اللي بتساعد على تغذية وتقوية الشعر, والعلاج ده مناسب جدا للشعر العادي.

علاجات سبا للشعر
علاجات سبا للشعر

8- علاج العسل:

المكونات:

¼ كوباية عسل.

فوطة.

الطريقة:

اغسلي شعرك بمية دافية وشامبو خالي من السلفات, وبعدين بالفوطة اضغطي عليه عشان تتخلصي من اي مية زيادة في الشعر, خدي العسل وزعيه على الشعر كله, وسيبيه لمدة 15 دقيقة, وبعدين اغسليه بشامبو خالي من السلفات ومية باردة, كرريه مرتين في الاسبوع.

العسل يعتبر مرطب طبيعي للشعر, وبيديه لمعة, والعسل كمان فيه خصائص طبيعية لتفتيح الشعر يعني ممكن يفتح الشعر شوية, والعلاج ده مناسب لكل انواع الشعر.

علاجات سبا للشعر
علاجات سبا للشعر

9- علاج خل التفاح:

المكونات:

2 معلقة كبيرة خل التفاح.

1 كوباية مية.

ازازة ببخاخ.

فوطة.

الطريقة:

اغسلي شعرك بمية فاترة وشامبو خالي من السلفات, وبعدين بالفوطة اضغطي عليه عشان تتخلصي من اي مية زيادة, وفي ازازة ببخاخ اخلطي خل التفاح والمية, رشي الشعر كله بالخليط, سيبيه لمدة 5 دقايق, وبعدها اغسلي الشعر بمية باردة, كرريه من مرة لمرتين في الاسبوع.

خل التفاح يعتبر منظف طبيعي للشعر وبيخلصها من كل الزيوت والتراكمات بسبب الجو او المنتجات المختلفة, وبيساعد على توازن المستوى الهيدروجيني لفروة الراس, والتخلص من قشرة الشعر, وده بيخلي الشعر صحي وناعم وبيلمع, ومناسب جدا لكل انواع الشعر.

علاجات سبا للشعر

10- علاج الخيار:

المكونات:

½ ثمرة خيار.

2 معلقة كبيرة زيت زيتون.

طبق فيه مية مغلية.

فوطة.

الطريقة:

قطعي الخيار قطع صغيرة وحطي عليه زيت الزيتون واضربيهم في الخلاط, عرضي شعرك للبخار لمدة 10 دقايق, وبعدين شيلي الفوطة وسيبيه لمدة 10 دقايق كمان, بعدها حطي خليط الخيار على الشعر كله, سيبيه لمدة 15 دقيقة, وبعدين اغسلي الشعر بشامبو خالي من السلفات ومية باردة, كرريه مرة في الاسبوع.

الخيار مصدر غني بالفيتامينات A, C, والسيليكا المعدنية, والعناصر دي ضرورية جدا لنمو الشعر, وخليط الخيار وزيت الزيتون مع بعض بيساعد على تغذية الشعر, وبيعزز نمو الشعر وبيحسن صحة الشعر, والعلاج ده يعتبر مناسب لكل انواع الشعر.

علاجات سبا للشعر

11- علاج البيض وزيت الزيتون:

المكونات:

1 بيضة كاملة.

2 معلقة كبيرة زيت زيتون.

1 معلقة صغيرة عسل.

طبق فيه مية مغلية.

فوطة.

الطريقة:

اخلطي المكونات كلها مع بعض, عرضي شعرك للبخار لمدة 10 دقايق, وبعدين شيلي الفوطة وسيبيه 10 دقايق كمان, بعدها حطي الخليط على الشعر كله, سيبيه لمدة 20 دقيقة, وبعدين اغسليه بشامبو خالي من السلفات ومية باردة, كرريه مرة في الاسبوع.

البيض بيغذي الشعر, والعسل وزيت الزيتون مع بعض بيساعدوا على ترطيب الشعر الجاف وعلاج التلف, وكل المكونات دي مع بعض هتساعد على تنعيم الشعر وترطيبه, والعلاج مناسب لكل انواع الشعر.

علاجات سبا للشعر

12- علاج الالوفيرا للشعر الدهني:

المكونات:

¼ كوباية جل الالوفيرا.

1 معلقة صغيرة عصير ليمون.

طبق فيه مية مغلية.

فوطة.

الطريقة:

اخلطي المكونات كلها مع بعض, عرضي شعرك للبخار لمدة 10 دقايق, بوعدين شيلي الفوطة وسيبيه 10 دقايق كمان, بعدها وزعي الخليط على الشعر كله, سيبيه على الشعر لمدة من 15 – 20 دقيقة, وبعدين اغسليه بشامبو خالي من السلفات ومية باردة, كرريه مرة في الاسبوع.

جل صبار الالوفيرا بيساعد على ترطيب الشعر, والليمون بيساعد على ازالة الزيوت الزيادة من فروة الراس, والماسك كله بيساعد على تحسين نسيج الشعر وبيخليه ناعم.

علاجات سبا للشعر

13- علاج الافوكادو واللبن الرايب للشعر التالف:

المكونات:

1 ثمرة افوكادو ناضجة.

2 معلقة كبيرة لبن رايب.

طبق فيه مية مغلية.

فوطة.

الطريقة:

اهرسي الافوكادو لحد ما تبقى ناعمة جدا وضيفي لها اللبن الرايب, عرضي شعرك للبخار لمدة 10 دقايق, وبعدين شيلي الفوطة وسيبي الشعر 10 دقايق كمان, بعدها وزعي الخليط على الشعر كله من الجذور للاطراف, سيبيه لمدة 30 دقيقة, وبعدين اغسليه بشامبو خالي من السلفات ومية باردة, كرريه مرة في الاسبوع.

الافوكادو غنية بالزيوت الدهنية اللي بتساعد على تغذية الشعر وعلاج التلف, واللبن الرايب بيساعد على تطهير الشعر وبيديه لمعان, ومنع مشاكل الشعر زي القشرة.

علاجات سبا للشعر

14- علاج الحلبة:

المكونات:

1 معلقة صغيرة عسل.

1 معلقة كبيرة حلبة.

3 معالق كبيرة لبن رايب.

طبق فيه مية مغلية.

فوطة.

الطريقة:

انقعي الحلبة في شوية مية وسيبيها طول الليل, الصبح اطحني الحلبة لحد ما تبقى عجينة ناعمة وضيفي لها اللبن الرايب والعسل وقلبيهم كويس مع بعض, عرضي شعرك للبخار لمدة 10 دقايق, وبعدين شيلي الفوطة وسيبي الشعر 10 دقايق كمان, بعدها وزعي الخليط عى الشعر كله, سيبيه لمدة 30 دقيقة, وبعدين اغسليه بشامبو خالي من السلفات ومية باردة, كرريه مرة في الاسبوع.

الماسك ده بيدي Volume للشعر, وبيمنع قشرة الشعر, وبيقلل من افراز الزيوت الزيادة في فروة الراس, وبيحسن ملمس الشعر وبينعمه وبيديه ملعة, والحلبة كمان بتساعد على عكس تلف الشعر.

علاجات سبا للشعر

– فوايد علاج السبا للشعر:

1- ترطيب الشعر:

علاجات السبا للشعر بتساعد على ترطيب الشعر بعمق, وبتقوي بصيلات الشعر, وبتغذي جذور الشعر بعمق, وده بيضمن نمو الشعر بشكل صحي, كمان بيساعد على ترطيب فروة الراس ومنع الجفاف, وبيساعد كمان على ازالة الاوساخ والتراكمات من الشعر, وده كله في النهاية بيخلي الشعر صحي وناعم وبيلمع.

2- علاج قشرة الشعر:

مكونات من اللي مستخدمة زي الليمون بتساعد على التخلص من قشرة الشعر, وتنضيف مسام فروة الراس, وتغذية فروة الراس والشعر.

3- تكثيف الشعر:

علاجات السبا بتساعد على تجديد الشعر, وعكس الضرر, اللي بيضمن زيادة نمو الشعر بشكل صحي.

4- منع الشيب وتساقط الشعر:

الشيب والتساقط عادة ممكن يحصل مع التقدم في العمر, لكن ممكن يحصل في وقت مبكر بسبب ملوثات الجو والتوتر اللي ممكن تسرع الشيب وتساقط الشعر, وعلاجات السبا بتوفر التغذية اللي محتاجها الشعر عشان يفضل صحي ويأخر الشيب والتساقط.

5- التخلص من القلق والاجهاد:

علاجات السبا مش بس مفيدة للشعر, كمان بتساعد على الاسترخاء الذهني, وبتقلل الاجهاد والتوتر.

6- بتمنع هيشان وتجعد وبهتان الشعر:

علاجات السبا تعتبر واحدة من افضل الطرق للحصول على شعر صحي, لانها بتساعد على علاج بهتان الشعر والتجعد والهيشان.

7- بتحافظ على صحة فروة الراس:

فروة الراس بتحتاج دايما تكون صحية, وعلاجات السبا بتوفر ده لانها بتقدم التغذية اللي بتحتاجها, وده بالتالي بيخلي البصيلات تنتج شعر صحي.

8- التحكم في افراز الزيوت:

التلوث واستخدام المنتجات المختلفة ممكن تأدي لعدم توازن في افراز الزيوت من فروة الراس, وعلاجات السبا بتساعد على تلطيف الغدد الدهنية, وده بيساعد على انتاج كميات مناسبة من الزيوت للحفاظ على الشعر وحمايته.

9- ازالة الشوائب:

زي ما قولنا ان علاجات السبا بتساعد على تجديد الشعر وفروة الراس, وده بيخلي الشعر نضيف وصحي, لان الشعر بيتعرض للتلوث وللمنتجات اللي ممكن تسبب شوائب تستقر في بصيلات الشعر والشعر نفسه, وعلاجات السبا بتساعد على ازالة الشوائب دي بحيث ان الشعر يتقبل اكتر او يستفيد لاقصى درجة من العلاجات المغذية.

10- تغذية الشعر:

علاجات السبا بتساعد على تغذية الشعر لانه بيديه العناصر المغذية اللي محتاجها, اللي بتساعد على ان الشعر يبقى صحي وبيلمع.

علاجات سبا للشعر

8 فوايد مذهلة لعلاج الشعر بالمايونيز..وازاي تستخدميه في الوصفات الطبيعية

وصفات طبيعية بالمايونيز لعلاج الشعر