ليه لازم تعملي ديتوكس لمنطقة تحت الابطين..وازاي تعمليه
مزيلات العرق تقريبا جزء من المستحضرات اللي بنستخدمها بشكل يومي, ومع ذلك في كلام كتير حوالين صحة استخدام مزيلات الروايح ومضادات العرق وربطوا بينها وبين كتير من المشاكل الجلدية بما فيهم التهاب الجلد الابطي, وبما ان مزيلات الروايح بتستخدم عشان تخفي روايح الجسم, ومضادات العرق بتقفل اصلا القنوات اللي بيخرج منها العرق, فمن هنا كان في كلام ان اللي يستخدم المنتجات دي يكونوا بس الاشخاص اللي فعلا بيعانوا من الريحة والعرق بشكل ملحوظ, واتعملت ابحاث كتير عن علاقة مضادات ومزيلات العرق وحدوث سرطان الثدي, واكتشفوا ان الاستروجين اللي موجود في المستحضرات دي ممكن يكون سبب في الاصابة بسرطان الثدي, عشان كده النهاردة من خلال موضوعنا هنقولك طريقة ازالة السموم من تحت الابطين عشان تتخلصي من اي اثار ضارة ممكن تكون ناتجة من استخدام مستحضرات العرق.
وعلى الرغم من وجود دراسات اكيدة بتثبت ان في علاقة بين استخدام مستحضرات العرق والاصابة بسرطان الثدي, لكن الابحاث دلوقتي بتشير ان في اعراض معينة لو ظهرت من استخدام مستحضرات العرق ممكن تخليكي تقلقي.
ودي بعض الاعراض اللي ممكن تسبب قلق لو انتي بتستخدمي مزيلات ومضادات العرق:
– طفح جلدي.
– ريحة الجسم المستمرة برغم استخدام المنتج.
– التهاب الجلد.
– حساسية.
عشان كده لو انتي بتستخدمي مزيلات ومضادات العرق, هيكون من الافضل انك تقللي من استخدامها على قد ما تقدري, وتعملي ازالة للسموم “ديتوكس” من تحت الابطين عشان تتأكدي انك بتتخلصي من التأثيرات الضارة للمنتجات لو اتوجدت.
الديتوكس هيساعد على التخلص من تراكم المواد الكيميائية الضارة والسموم من تحت الابطين اللي ممكن تنتج عن استخدام مستحضرات العرق.
كمان الديتوكس او عملية ازالة السموم بتفيد القنوات العرقية المسدودة وبتساعد على التخلص من اي روايح كريهة ممكن تظهر بسبب تراكم البكتيريا تحت الابطين لما تكوني مش بتستخدمي مزيلات العرق.
– تعالوا نعرف طريقة ازالة السموم من تحت الابطين:
المكونات:
1 معلقة كبيرة طين البنتونيت “متوفر عند العطار”.
2 معلقة صغيرة خل التفاح.
جل صبار الالوفيرا.
طريقة التحضير والاستخدام:
– اخلطي طين البنتونيت مع خل التفاح في طبق زجاج, واتجنبي استخدام المعدن في عملية الخلط لان الطين ممكن يتفاعل كيميائيا معاه.
– استمري في خلط المكونات كويس لمدة دقايق لحد ما يبقى عندك على شكل عجينة.
– حطي الخليط على منطقة تحت الابطين لمدة من 10 – 15 دقيقة, وبالنسبة لو انتي اول مرة تعملي ازالة للسموم تحت الابطين, يبقى الافضل تسيبي الخليط 5 دقايق بس, وراقبي الجلد لو في اي حساسية من الخلطة, والمرة اللي بعدها تقدري تزودي المدة حسب الحاجة.
– طول ما انتي حاطه الخلطة خليكي رافعة ايدك لفوق او تنامي على ضهرك وترفعي ايدك, وخلي بالك لو حسيتي باي احساس حرقان قوي او بشرتك اتحسست من الخلطة تشيليها فورا بالمية.
– بمجرد ما يخلص الوقت شيلي الخليط بالمية او امسحية بفوطة مبلولة, ولكن ينصح انك تاخدي شاور بعد العملية دي.
– بعد ما تشيلي الخليط وتنشفي المنطقة كويس, ادهنيها بجل صبار الالوفيرا عشان تهدي المنطقة بعد الديتوكس.
– اتأكدي انك تشربي كمية كبيرة من المية قبل وبعد عملية التخلص من السموم بحيث يتمسح كل المواد الكيميائية الضارة والسموم بشكل صحيح.
– عملية الديتوكس المفروض تتكرر 3 مرات في الاسبوع على الاقل لحد ما ينخفض تراكم البكتيريا من تحت الابطين وميبقاش فيه اي روايح كريهة في المنطقة تاني, ومافيش اي ضرر من عمل الديتوكس بشكل يومي, لكن ده بيختلف من حد للتاني حسب احتياج كل شخص.
– فوايد خليط الديتوكس:
– بتقلل من تراكم البكتيريا من منطقة تحت الابطين.
– بتمنع اي رد فعل تحسسي للجلد ممكن يكون عندك من استخدام مستحضرات العرق.
– بتعالج اي مشاكل جلدية تحت الابطين ممكن تحصل بسبب استخدام مستحضرات العرق.
في النهاية بنقولك ان مش كل شخص بيكون محتاج مزيلات الروايح او مضادات العرق, لان غالبا معظم الناس معندهمش الريحة الكريهة او النفاذة اوي اللي ممكن تعدي المستوى المقبول, يعني مستحضرات العرق الافضل تستخدم بس في حالات العرق المفرط او الريحة المزعجة اوي.
ولو انتي مش هتقدري تستغني عن مستحضرات العرق, يبقى تستخدميها بشكل معتدل, وتستمري في عمل ديتوكس والتخلص من ازالة السموم من تحت الابطين بشكل متكرر ومنتظم.
طريقة ازالة الشعر من تحت الابطين بالشمع بطريقة سهلة وبشكل صحيح
