10 حاجات اي راجل بيحب يسمعهم

زي ما البنت بيبقى في كلام بتحب تسمعه من شريك حياتها, الراجل كمان بيكون فيه كلام بيحب يسمعه من شريكته وبيخليه يقدرها ويحبها اكتر, والنهاردة من خلال السطور الجاية هنقولك على اكتر 10 حاجات اي راجل بيحب يسمعهم.

حاجات اي راجل بيحب يسمعهم:

1- كلمة “بحبك”:

مهما كان الراجل طبعه صعب هيدوب قصاد كلمة “بحبك” وتعلني حبك ليه بكل صراحة, والرجالة زي البنات بالظبط بيحبوا يسمعوا كلمة بحبك عكس ما احنا متوقعين ان ده مش مهم عند الراجل, لا هو الحقيقة انه مهم وبيحبوا يسمعوا الكلمة دي, والكلام الحلو حتى لو برسالة على التليفون.

2- مقدرة اللي انت بتعمله:

الراجل بيحب يحس دايما انك مقدرة كل اللي بيعمله حتى لو حاجة بسيطة, عشان كده لازم تعبري عن ده وتقوليله انك مقدرة كل حاجة بيعملها عشانك وتشكريه دايما, التصرف ده بيبقى كبير جدا عنده وهتلاقيه تقديره ليكي بيزيد.

3- انت الافضل او “مافيش زيك”:

والجملة دي مش للشريك بس لكن كمان للاب والاخ اي راجل بيحب يسمع كلمة انت احسن واحد او مافيش زيك, لانها بتعبر عن احترامك وتقديرك ليه, وبيعتبرها شهادة منك على جهوده معاكي.

4- انت راجل بمعنى الكلمة:

الراجل دايما بيحب يحس انه جامع كل صفات الرجولة وانك بتحبي شخصيتة وشايفة كل ده ومقدراه, يعني انك تقولي لك بحب شهامتك, نزاهتك, صدقك, وغيرها من صفات الرجولة.

5- انا بحترمك:

الراجل دايما بيحب يحس بالاحترام والاعجاب من شريكته, وخصوصا مع التقدم في السن بيزيد رغبة الراجل جدا انه يحس الاحساس ده.

6- تعالى نعمل اللي انت عايزة/ او روح اعمل اللي انت عايزة:

بيحب يحس انك بتشاركيه في اهتماماته وانك حابه تعمليها معاه وتقوليله ياللا نعملها سوا, او انك تسيبي له مساحة حرية انه يعمل هو الحاجة اللي بيحبها لوحده وتقوليله اعملها وتبقي مرحبة ومش متضايقة.

7- شكلك حلو:

زي ما البنات بيحبوا يسمعوا كلام المدح على لبسهم وشكلهم, الراجل كمان بيحب من وقت للتاني يسمع كلمة حلوة منك انه وسيم او شيك وبيبقى عايز يحس انك لسه شيفاه جذاب, وخصوصا كمان لو بيلعب رياضة عشان يحافظ على شكله هيحب انه يسمع منك كلمة مجاملة ليه ده هيشجعة اكتر انه يستمر وهيهون عليه تعب التمارين.

8- انا مستعدة اسمعك اي وقت:

الستات والرجالة مختلفين شوية في طريقة التواصل, يعني وقت الخلاف الست بتكون مستعدة تقعد تتكلم وتواجه وتتناقش على طول, عكس الراجل هنلاقيه بيميل للعزله شوية وعايز يقعد ويفكر في الامور مع نفسه, عشان كده اي راجل بيحب يسمع كلمة “انا سمعاك” او “انا مستعدة اسمعك في اي وقت انت مستعد تتكلم فيه”, لانه مش بيحب الضغط دايما سيبيه براحته وقت ما يتكلم وفي نفس الوقت تعرفيه انك هتسمعيه في اي وقت يكون مستعد يتكلم.

9- شكرا:

زي الست بالظبط الراجل بيحب التقدير حتى للمجهود او التصرفات البسيطة, كلمة “شكرا” هي كلمة بسيطة لكن واضحة وقوية ومعبرة وبتوضح تقديرك ليه ولمجهوده, لو قولتي له شكرا على كل حاجة هو بيعملهالك هتلاقيه بيكررها تاني من غير ما حتى تطلبي منه عشان يسمع منك كلمة الشكر.

10- انا بثق فيك:

بيحب يحس منك انك دايما بتثقي فيه, وخبراء العلاقات بينصحوا ان افضل وقت عشان تشاركي مشاعرك هو قبل او اثناء العلاقة الحميمية لان في الوقت ده بترتفع مستويات الاوكسيتوسين, وهو هرمون بيعزز مشاعر الثقة والحب والالفة, عشان كده هو يعتبر افضل وقت انك تتكلمي او تشاركي مشاعرك مع شريكك.

5 علامات تقولك ان في شخص بيحبك وانتي متعرفيش