ازاي تنسقي الشراب مع اللبس والشوز بطريقة صح
الشراب ظهر لبسه اول مرة في امريكا في فترة الستينات تقريبا, وظهر مع ظهور ستايل الجيبات القصيرة موضة في الفترة دي, ومع الوقت بقت الشرابات الطويلة قطعة اساسية في دولاب اي بنت, لكن لحد دلوقتي ممكن يكون في بنات كتير مش بتعرف تلبس الشراب بطريقة صح, عشان كده النهاردة من خلال السطور الجاية هنقولك طريقة تنسيق الشراب مع اللبس والشوز بطريقة صح.
طريقة تنسيق الشراب مع اللبس والشوز:
لما تيجي تختاري الشراب في شوية حاجات لازم تاخدي بالك منها, لان دلوقتي بقت قواعد الموضة بتتغير بشكل مستمر وبسرعة, عشان كده لازم تحطي في اعتبارك كده كام حاجة عشان يطلع اللوك حلو.
1- اول حاجة حطيها في الاعتبار هي المكان واللبس المناسب ليه سواء شغلك في مكتب, الحفلات الرسمية وغير الرسمية, التمشية العادية, وغيرها من الاماكن اللي يتحدد عن طريقها لبسك وبالتالي هتحددي ستايل الشراب.
2- تاني حاجة عمرك.
3- اتجاهات الموضة وذوقك الخاص.
4- واخر حاجة لازم تحطيها في الاعتبار حالة الجو.
– القواعد المشتركة لتنسيق الشراب مع اللبس:
– في قاعدة مهمة ضروري تلتزمي بيها وهي كثافة الشراب او سمكه, وكثافة الملابس, والشوز, اختاري الشرابات اللي خامتها بتجمع ما بين القطن والمواد الصناعية, وتكون كثافتها تقريبا 40 منكرين “دي وحدة كثافة الاقمشة تقريبا سميكة الى حد ما”, وتعتبر الشرابات اللي كثافتها 20 منكرين اخف في السمك من اللي كثافتها 40 منكرين اللي تعتبر شبه موسمية وهتكون اختيار مناسب جدا عشان تديكي دفء ومناسبة للشتا انك تنسقيها مع الجيبات والفساتين المصنوعة من التريكو والصوف والجينز, لكن حطي في اعتبارك ان الشرابات الكثيفة او السمكية مش مناسبة مع ملابس الشغل الرسمية.
– وبننصحك متحاوليش انك توفري وتشتري خامة شرابات رخيصة لانها بتتقطع وبتتمدد بسهولة, وده هيعمل في الشرابات تنيات هيطلع شكلها مش حلو على الرجل, ده غير ان الشرابات الطويلة اللي خامتها رخيصة او مش حلوة وسمكها خفيف اللون بيكون متوزع عليها بشكل مش متساوي.
– متلبسيش ابدا الشرابات اللي بيكون لونها غامق او لون التان, ولا الشرابات Shimmery اللي فيها لمعة.
– متنسيش حالة الجو, لو الجو حر مافيش داعي انك تلبسي اصلا شراب, لكن لو انتي مش بتبقي مرتاحة لو لبستي جيبة ميني او ميدي من غير شراب, يبقى الافضل تختاري لبس البنطلونات او الجيبات الطويلة.
– الشرابات الخفيفة اوي مش مناسبة لموسم الشتا لانها مش بتدفي, الا لو مثلا مشوار قريب مش هيزيد عن دقايق ممكن تلبسي الشراب الخفيف بسمك 20 منكرين, ولو الجو شمس وحلو زي بداية الخريف او نهاية الربيع متلبسيش الشرابات السودا الكثيفة.
– متلبسيش ابدا الشراب الطويل وفوقيه شراب قصير زي اللي بيتلبس على السنيكرز, الحالة الوحيدة اللي ممكن تلبسي فيها الشراب القصير فوق الشراب الطويل عشان تدفي في الايام البرد انك تكوني لابسة بوت مداري الشراب القصير.
– هنلاحظ ان في كتير من عروض الازياء بيلبسوا الشرابات البيضا, لكن في الحياة اليومية صعب انك تنسقي الشراب الابيض مع اللبس, ده غير ان كتير بيربطوا الشراب الابيض بشرابات الاطفال او لبس المدرسة.
– تنسيق الشراب مع الشوز:
– غالبا الشراب على الشوز المفتوح بيطلع شكله غريب, وعشان تنسقي الشراب مع الشوز المفتوح في شوية قواعد:
لازم يكون الشوز بكعب عالي.
الشراب ميكونش بلون نيود.
متكونش الخياطة بتاعة الشراب من قدام باينة.
ميكونش الشراب شفاف اوي, لكن الشراب الشتوي التقيل ممكن يبقى مناسب على الشوز المفتوح.
– لما تيجي تجمعي ما بين شوز صيفي مفتوح وشراب, ممكن تبتكري لوك غير رسمي, ولو لوك لحفلة مثلا مش شرط يكون لون الشراب متطابق مع الشوز.
– مش بننصح بلبس الشرابات السمكية اوي مع الشوز الخفيف اللي من غير كعب زي الشوز الفلات, والصنادل او اللوفر وغيرها من الشوزات اللي من غير كعب, لكن مع ذلك كتير من المهتمين بالموضة بيقولوا مافيش مشكلة ان الشراب يتلبس على السنيكرز او الاحذية الرياضية للوك عصري غير رسمي.
– في النهاية للوك عصري وكاجوال الشرابات السمكية هتكون مناسبة جدا لو نسقتيها مع الشوز المقفول زي الانكل بوت, والبوت الخريفي والبوت الشتوي.
– القاعدة اللي متبعة من زمان هي ان المفروض يكون الشوز اغمق من الشراب, لكن المصممين الايام دي بياخدوا خطوات مختلفة وجريئة في الموضوع ده وبيتجاهلوا القاعدة دي, لكن مع ذلك بردو لازم تحطي في الاعتبار تركيبة الالوان لان الشرابات والشوز في بعض الالوان ممكن يطلع شكلها غريب لو مخترناش اللون المناسب, في استثناء واحد بس ان الشراب الاسود مع الشوز الاسود بيبقوا تركيبة متناسقة مع بعض وبتدي طول للساقين.
– الالوان الاساسية للشرابات:
– البلوجرز المتخصصين في الفاشون والموضة اختلفوا كتير على لبس الشراب باللون النيود اللي بيكون زي لون البشرة, وكتير من البنات بيشوفوا ان اللون ده مناسب جدا للشغل, والميزة في الشراب باللون النيود انه مش بيبان انك لابسة شراب, بعكس اي لون تاني ممكن يبان على الرجل, عشان كده الافضل انك تبعدي عن نوع الشرابات اللي بيلمع واختاري المات المطابق للون بشرتك عشان يبان طبيعي اكتر على الرجل, في النهاية الافضل ان الشراب باللون النيود ميتلبس في اي مكان باستثناء الشغل او اجتماعات العمل.
– الشراب الاسود فيه اختلاف عليه, من ناحية انه تقريبا بيمشي مع كل اللبس, ومن ناحية تانية انه لو اتلبس مع الوان فاتحة ممكن يطلع اللوك عدواني اوي, الشرابات السميكة السودا مناسبة للخروجات اليومية, والنايلون الاسود الخفيف ممكن يدمر مظهرك لو لبستيه في اجتماع عمل او في حدث احتفالي.
3- بدل الاسود ممكن تختاري للشغل الوان تانية مختلفة ولكن في نفس الوقت مش مبهرجة, زي الجرافيتي, او اللون الرمادي, او الموكا, وتقدري تنسقيهم مع الوان اللبس الغامق والفاتح.
– الشرابات الملونة:
– الشرابات الملونة دايما بتدي لوك غير رسمي لمظهرك, عشان كده لازم تختاري اللون بعناية جدا لانه ممكن يكون صعب اختيار لون الشراب الملون المناسب للبس بشكل صح, فلو انتي شاكه في قرارك في اختيار اللون او مش عارفة تختاري حطي القاعدة البسيطة دي في اعتبارك, متستخدميش اكتر من 3 – 4 الوان في اللوك بتاعك, واجمعي الالوان الباردة مع الالوان الباردة والالوان الدافية مع الالوان الدافية, يعني لو اللبس بلون بارد يبقى الشراب كمان بلون بارد, ولو اللبس بلون دافي يبقى الشراب كمان بلون دافي.
– الافضل انك تبعدي عن الشرابات النيود الطويلة المطبوعة او المرسومة لانها هتدي انطباع على الرجل اكن عليها كدمات او خدوش, ومع ذلك ظهرت في الفترة الاخيرة شرابات برسومات تاتو عليها هتكون حلوة لو عرفتي تختاري رسمة تكون مناسبة.
– الشرابات اللي عليها صور وزخارف المفروض تنسقيها مع لبس سادة بلون واحد, وافضل اختيار للشرابات المرسومة او المطبوعة هي النقط لان شكلها بيبقى لطيف ومش اوفر اوي.
– الشرابات الشبك او اللي بخياطة من ورا, متلبسيهاش مع الجيبات القصيرة او الفساتين المفتوحة, او الشوزات المفتوحة او الضخمة.
– الشراب وطول الجيبة:
لبس الشراب الخفيف مع الجيبة القصيرة في الجو البارد هيكون مش مناسب, ممكن تنسقي الشراب مع الجيبة القصيرة وتلبسي عليهم بالطو طويل, او كارديجان طويل في الجو البرد.
ايه الحاجات اللي المفروض تعمليها والحاجات اللي تتجنبيها لما تلبسي البنطلون الجينز الهاي ويست
