اتعرفوا بالصور على ريم رأفت ملكة جمال مصر 2018

بقلمريهام محمود فيمنوعات visibility839

لجنة التحكيم في مسابقة ملكة جمال مصر 2018 اعلنت يوم الخميس عن فوز ريم رأفت بفوزها بلقب “ميس ايجيبت 2018” بعد المنافسة مع 21 متسابقة قدرت ريم تخطف اللقب بعد ما مرت بكل اختبارات المسابقة منها الثقافة والاناقة واللباقة, مين هي ريم رأفت اللي قدرت تاخد اللقب تعالوا نتعرف عليها بالصور.

ملكة جمال مصر 2018:

ريم رأفت هي طالبة في كلية الاسنان في جامعة مصر الدولية, وشاركت في كتير من المنظمات الخيرية في اكتر من بلد, بالاضافة لنشاطها في منظمات حقوق الانسان, ومن هوايات ريم المفضلة الرقص ولعب البولينج.

خلال المسابقة اختارت ريم ان مشروعها بعد فوزها باللقب هيكون عبارة عن مستشفيات متنقلة, من خلال عربيات مجهزة بالاجهزة الطبية الكاملة وعليها دكاترة متطوعين من جوه وبره مصر ويكون هدفها هو المناطق الفقيرة والعلاج يكون فيها مجانا, وتلف على كل محافظات مصر.

بعد حصول ريم على اللقب فازت بعقد الماظ, وفستان من تصميم مصمم الازياء بهيج حسين, وسنة كاملة للعناية بالشعر والاسنان مجانا, بالاضافة لتصوير اعلان مع واحدة من الشركات المشهورة.

لجنة تحكيم المسابقة كانت بتتكون من الفنانة ريم البارودي, ومصمم الازياء بهيج حسين, وملكة جمال مصر 2016 نادين اسامة, والدكتورة آمال رزق رئيسة المسابقة, ودكتور التجميل احمد ابراهيم, ودكتور تجميل الاسنان نور عثمان, وخبير التحكيم محمود مرشد, والمسابقة السنة دي كانت تحت شعار بأسم “بنت مصر”.

واحيا حفلة تتويج ملكة جمال مصر 2018 الفنان رامي جمال, اللي وجه رسالة للمتسابقات ان هما عليهم مسئولية كبيرة خصوصا بالظروف الحالية للبلد وخروجها من ازمات كتير بعد ثورة يناير, ووجه كلمة للي هتفوز بلقب ميس ايجيبت بشكل خاص ان لازم تعرف انها هتمثل مصر كدولة عظمى وان ليها دور مهم جدا في تمثيل مصر قدام العالم كله.