8 مشروبات لانقاص الوزن بشكل سريع
كل البنات اكيد بتبقى في حالة بحث دايما عن اسهل الحاجات والوصفات اللي ممكن تساعد على تخسيس الوزن بشكل سريع, خصوصا ان في كتير بيزهقوا بسرعة من الانظمة الغذائية ومش بيكملوا لان نتيجتها بتاخد وقت, عشان كده النهاردة جايبين لكل بنات حوا افضل 8 مشروبات لانقاص الوزن بشكل طبيعي وسريع.
مشروبات لانقاص الوزن:
1- القهوة:
القهوة مش بس وظيفتها انها تعدل مزاجنا وتظبط يومنا كل يوم الصبح, لكن كمان القهوة تعتبر مكون طبيعي بيساعد على تقليل الشهية, وتعتبر من افضل المشروبات اللي ممكن تساعدك على انقاص الوزن.
2- خل التفاح:
خل التفاح واحد من المشروبات المفضلة لانقاص الوزن, كل اللي هتعمليه هتضيفي 2 معلقة كبيرة خل لكوباية مية وتشربيها كل يوم الصبح, الخل بيساعد على تخليص الجسم من المية الزيادة اللي ممكن تسبب زيادة في الوزن.
3- العصير الاخضر:
السموزي او العصير الاخضر بيساعد على انقاص الوزن وكمان محفز رائع جدا اثناء التمارين لو بتمارسي رياضة, ممكن تضيفي سبانخ او ورق اللفت “اللفت الاخضر” لاي نوع عصير بتشربيه, هيساعد على زيادة مستويات الحديد في الجسم بشكل فوري, والالياف اللي موجودة فيه هي المفتاح لعملية انقاص الوزن لانها بتدعم وظيفة الجهاز الهضمي.
4- الشاي الاخضر:
لو انتي مش من محبات القهوة, يعتبر الشاي الاخضر بديل ممتاز جدا بيساعد على انقاص الوزن, الشاي الاخضر غني جدا بمضادات الاكسدة والبوليفينولات اللي بتساعد على تقليل الالتهاب, ويعتبر حارق طبيعي للدهون لانها بيزود من عملية التمثيل الغذائي في الجسم.
5- المية:
كلنا عارفين ان الدكاترة والمتخصصين بينصحوا بشرب 8 كوبايات مية بشكل يومي, ويمكن في كتير مننا بيستصعبوا الكمية دي يوميا ومش بيقدروا يشربوها, بس انتي ممكن تقسمي ال 8 كوبايات على مدار اليوم بشكل بسيط ابدأي يومك بكوباية مية على الريق عشان تنشطي عملية التمثيل الغذائي, وممكن تحاولي تشربي كوباية مية قبل كل وجبة وكوباية بعد الوجبة, المية هتملى جزء من المعدة وهتساعد انك تاكلي كمية اكل اقل على مدار اليوم.
6- الليمون:
الليمون من المشروبات اللي بتساعد على زيادة الشعور بالشبع, وبيزود عملية التمثيل الغذائي في الجسم اللي بدورها هتساعد على انقاص الوزن, بكل بساطة ممكن تضيفي عصير ليمونة لكوباية مية وتشربيها كل يوم الصبح, المية مع الليمون يعتبر من افضل المشروبات اللي بتساعد على تخسيس الوزن.
7- الكالسيوم:
الكالسيوم مش بس بيساعد على تقوية العضم, لكن كمان بيساعد على فقدان الوزن بشكل اسرع, لان الكالسيوم بيساعد على تثبيط او قمع الكالسيتريول وده هرمون بتتغذى عليه الخلايا الدهنية, ومن غير الهرمون ده ممكن الجسم يدمر الخلايا الدهنية بشكل اسرع, كمان ثبت ان الكالسيوم بيقلل من الشهية, وده يخلي اللبن واحد من المشروبات اللي ممكن تساعدك على انقاص الوزن لكن يكون خالي من الدسم.
8- القرفة:
القرفة مفيدة جدا في التقليل من الاصابة بأمراض القلب, كمان بتساعد على خفض مستويات السكر في الدم وزيادة معدل التمثيل الغذائي, بكل بساطة ضيفي معلقة صغيرة من القرفة لكوباية مية سخنة تعتبر من افضل المشروبات اللي ممكن تساعدك على انقاص الوزن, كمان بتملى المعدة وبتقلل من الرغبة في الاكل.
– مشروبات انقاص الوزن الصحية:
اختاري بديل صحي لمشروبات الطاقة, كتير بيفكروا ان مشروبات الطاقة ممكن تساعد على انقاص الوزن, لكن المشروبات دي ممكن تديكي طاقة بس ده مش معناه ان الطاقة دي ممكن تساعدك على انقاص الوزن او حرق الدهون.
شرب اي مشروب من اللي احنا قولناهم يعتبر اختيار صحي ممتاز جدا قبل التمارين الرياضية, او في نص اليوم, او بالليل قبل النوم.
خسي 5 كيلو في اسبوع واحد بس بشاي الكركم
