17 طريقة لاستخدام البطاطس في الوصفات الجمالية للبشرة والجسم والشعر

بقلمريهام محمود فيبشرة visibility354

البطاطس من المكونات الطبيعية المفيدة جدا للبشرة والجسم والشعر, لانها غنية بفيتامينات C, B6, اللي بتساعد على تنقية البشرة من اي شوائب, ده غير فوايدها للجسم والشعر كمان, والنهاردة هنعرف مجموعة وصفات طبيعية بالبطاطس لبشرة وشعر رائع.

وصفات طبيعية بالبطاطس:

– وصفات البطاطس للعيون:

1- ماسك البطاطس للهالات السودا:

بكل بساطة هاتي ثمرة بطاطس, وقطعيها ودجز, وحطيها في قطعة قماش مبلولة بمية ساقعة, وحطيها فوق عينيكي لمدة 20 دقيقة, كرري الوصفة دي يوميا, مع الاستمرار هتلاحظي اختفاء الهالات السودا.

2- البطاطس لانتفاخات العين:

كمان عشان الانتفاخات, قطعيها شرايح وحطيها في التلاجة لحد ما تسقع, وبعدين حطي الشرايح على عينك لتهدئة الانتفاخات.

3- لعلاج التجاعيد:

عشان التجاعيد اللي تحت العين, ابشري البطاطس واضغطي عليها على مصفى عشان تطلعي منها العصير بتاعها, وبعدين ضيفي له عصير ليمونة, وادهني الخليط تحت العين بقطعة قطن, الوصفة دي بتنمع ظهور التجاعيد والخطوط الرفيعة.

وصفات طبيعية بالبطاطس
وصفات طبيعية بالبطاطس

– وصفات البطاطس للوش:

1- علاج حب الشباب:

هاتي عصير البطاطس, وادهني بيه البشرة على الاماكن اللي فيها حب الشباب, سيبيه لمدة من 10 – 20 دقيقة, وبعدين اغسليه بالمية.

2- ماسك البطاطس للبشرة الدهنية:

حل سريع لمشاكل البشرة الدهنية زي الافراز الزيادة للدهون والمسام الواسعة, هاتي ثمرة بطاطس ابشريها وضيفي عليها مية ورد ومعلقة صغيرة عصير ليمون, قلبيهم مع بعض كويس, حطي الخليط على البشرة وسيبيه لمدة 15 دقيقة, وبعدين اغسليه بالمية.

3- ماسك البطاطس لاصلاح البشرة الجافة:

كمان ممكن تستخدميها للبشرة الجافة لترطيبها بنفس طريقة وصفة البشرة الدهنية باستثناء اختلاف واحد بسيط هتستبدلي الليمون في الوصفة بمعلقة كبيرة عسل نحل.

4- ماسك مهديء للبشرة:

لو بشرتك ملتهبة او بعد جلسة البوتوكس الماسك ده هيساعد على تهدئة بشرتك, كل اللي هتعمليه قطعي البطاطس لدواير وحطيها في الفريزر شوية, وبعدين طلعيها وغطي وشك كله بشرايح البطاطس المتلجة لمدة 15 دقيقة, لكن خلي بالك لو عندك اي جرح مفتوح متحطيش عليه البطاطس.

5- ماسك البطاطس والبيض:

الماسك ده مفيد جدا لو بتعاني من اي مشكلة جلدية, اخلطي بياض بيضة مع عصير ½ ثمرة بطاطس, ادهني بشرتك بالخليط وسيبيه لمدة 20 دقيقة, وبعدين اغسليه بالمية.

6- ماسك البطاطس لتفتيح وتنقية البشرة:

استخرجي عصير البطاطس وانقعي فيه منديل, وبعدين حطي المنديل المبلول بعصير البطاطس على وشك, وسيبيه لمدة 20 دقيقة, وبعدين اغسليه بالمية.

7- ماسك البطاطس للتفتيح وعلاج البقع:

هاتي ثمرة بطاطس, قطعيها مكعبات وحطيها في الخلاط, ضيفي عليها 4 معالق كبيرة مية ورد, اضربيهم مع بعض كويس لحد ما تبقى عجينة ناعمة, ولو بشرتك دهنية ضيفي على الخليط كام نقطة عصير ليمون, ولو بشرتك جافة ضيفي معلقة كبيرة عسل نحل, ولو بشرتك عادية ضيفي عصير ليمون وعسل نحل مع بعض, قلبي المكونات مع بعض كويس, دلوقتي افردي الخليط على البشرة وسيبيه 15 دقيقة, بعدها اغسليه بالمية, ولافضل النتايج كرريه من 2 – 3 مرات في الاسبوع.

8- ماسك البطاطس لترطيب البشرة:

كل اللي هتحتاجيه ثمرة بطاطس مبشورة ومعلقة كبيرة عسل نحل و2 معلقة كبيرة زيت زيتون, اخلطيهم مع بعض كويس, حطي الخليط على البشرة وسيبيه لمدة 10 دقايق, وبعدين اغسليه بالمية, الماسك ده بيساعد على ترطيب البشرة وبيجددها وبيقلل من الخطوط الرفيعة.

9- ماسك الخيار والبطاطس لتنضيف البشرة:

قطعي ثمرة بطاطس وثمرة خيار لقطع صغيرة, وحطيها في الخلاط واضربيهم لحد ما يبقوا عجينة ناعمة, وبعدين اخلطي معاهم معلقة صغيرة مية ومعلقة صغيرة كربوناتو, وحطي الخليط على البشرة وسيبيه 15 دقيقة, وبعدين اغسليه بالمية, استخدمي الماسك ده كل ما تحتاجي تعملي تنضيف عميق للبشرة.

10- ماسك البطاطس لمكافحة علامات الشيخوخة:

حطي ثمرة بطاطس متوسطة الحجم في الخلاط وضيفي عليها معلقة كبيرة لبن, واضربيهم مع بعض كويس لحد ما يبقى عندك عجينة ناعمة, حطيها على بشرتك وسيبيها 30 دقيقة, وبعدين اغسليها بالمية, بعد ما تشيلي الماسك هتحسي بشرتك بقت ناعمة جدا ومشدودة.

11- تونر لتقشير البشرة:

اخلطي 2 معلقة كبيرة عصير ليمون مع بطاطس مبشورة, دلكي بشرتك بالخليط لمدة دقايق, وبعدين سيبيه لمدة 30 دقيقة, وبعدها اغسليه, الماسك ده مش بس هيقشر البشرة كمان هيقلل من التصبغ.

وصفات طبيعية بالبطاطس
وصفات طبيعية بالبطاطس

– وصفات البطاطس للجسم:

1- علاج حروق الشمس:

الماسك بيساعد على علاج حروق الشمس لاي مكان في الجسم, كل اللي هتعمليه بس حطي شرايح بطاطس باردة على المناطق المصابة بالحروق, هيهدي المنطقة بشكل فوري.

2- لعلاج الحكة والطفح الجلدي ولسعات الحشرات:

افركي شريحة بطاطس على المناطق المصابة, هيهدي الحكة والطفح الجلدي واللسعات وهيحسسك براحة بشكل فوري.

وصفات طبيعية بالبطاطس
وصفات طبيعية بالبطاطس

– وصفات البطاطس للشعر:

1- ماسك البطاطس لترطيب الشعر:

اخلطي معلقة كبيرة عسل نحل, مع 2 معلقة كبيرة جل صبار الالوفيرا, و 3 معالق كبيرة من عصير البطاطس, دلكي فروة الراس بالخليط ده, وسرحيه بمشط خشب واسع عشان تنشري الخلطة على الشعر كله لحد الاطراف, سيبيه لمدة ساعة, وبعدين اغسليه.

2- ماسك البطاطس للمعان الشعر:

الوصفة دي بتلمع الشعر جدا, اسلقي 5 ثمرات بطاطس لمدة ساعة, بعدين طلعي البطاطس وخدي مية السلق استخدميها في شطف الشعر.

وصفات طبيعية بالبطاطس
وصفات طبيعية بالبطاطس

افضل 10 مكونات لازم يكونوا عندك للوصفات الطبيعية

افضل مكونات للوصفات الطبيعية