17 حيلة جمالية هتوفرلك في الفلوس كل بنت بتحب المكياج محتاجة تعرفهم
اكيد معظم البنات مستحضرات التجميل بتاخد كتير من ميزانيتهم وخصوصا مدمنات المكياج اللي بيحبوا دايما يشتروا كل جديد لكن في طرق بسيطة ممكن توفرلك في ميزانيتك, والنهاردة هنقولك على مجموعة حيل جمالية هتوفرلك في الفلوس وفي نفس الوقت تطلعي بلوك حلو.
حيل جمالية هتوفرلك في الفلوس:
1- فرشة الحواجب لتقشير الشفايف بدل السكراب:
ممكن تستخدمي فرشة الحواجب لازالة الجلد الجاف من الشفايف, حطي طبقة من زبدة الكاكاو او كريم مرطب على الشفايف, وسيبيه كام دقيقة, وبعدين افركيه بالفرشة, هيخلي الشفايف ناعمة جدا ومستعدة للروج وهيطلعه شكله احلى على شفايفك.
2- زيادة فعالية مستحضرات البشرة بورق الفويل:
تقدري تزودي فعالية مستحضرات البشرة باستخدام ورق الفويل, اول حاجة حطي ورق الفويل شوية في التلاجة قبل الاستخدام, وبعد ما تحطي كريم البشرة او السيروم او التونر حطي طبقة من الفويل عليه وسيبيه شوية, ده بيساعد ان البشرة تمتص المستحضر بشكل افضل بكتير, وممكن تستخدمي ورق الفويل الساقع لوحده على العيون لازالة الانتفاخات كل يوم الصبح.
3- حولي المانيكير لمات بالنشا:
لو عندك اي مانيكير بيلمع وعايزة تحولية لمات, ضيفي بس 2 جرام نشا لازازة المانيكير بتاعتك ورجيها كويس, الحيلة دي هتحول المانيكير بتاعك لمات, ولو مش عايزة تعملي كمية المانيكير كلها, ممكن تخلطي شوية بس من المانيكير على شوية نشا لما تيجي تحطي منه بحيث تكون كمية تكفي لمرة واحدة بس.
4- فلتر القهوة بدل مناديل ازالة الدهون:
فلاتر القهوة بتتباع في عبوات كبيرة وبأسعار رخيصة مقارنة بمناديل ازالة الدهون “Blotting sheets” اللي بتكون عبوات صغيرة وسعرها غالي, وفلاتر القهوة مصنوعة من ورق رقيق وناعم خالي من اي مواد كيميائية او روايح اضافية وده بيخليها مثالية جدا في ازالة الدهون الزيادة من البشرة.
5- اعملي كريم حماية من الشمس ملون:
لو عندك كونسيلر او كريم اساس غامق ومش بتستخدميه, ممكن تستغليه وتعملي بيه كريم حماية من الشمس ملون, هاتي اي نوع كريم نهار بتستخدميه يكون فيه عامل حماية من الشمس وامزجي معاه كريم الاساس او الكونسيلر اللي عندك وبكده يبقى حولتي كريم النهار لكريم حماية ملون بطريقة بسيطة جدا.
وتعتبر افضل نسب عشان يطلع معاكي مظبوط هو 3:1 ال 3 لكريم النهار وال 1 لكريم الاساس او الكونسيلر يعني كمية كريم النهار يكون ضعف كريم الاساس 3 مرات.
6- مية الورد بدل مثبت المكياج:
مثبت المكياج مش بس وظيفته تثبيت المكياج لكن كمان بيدي الوش اشراقة وبيخلي المكياج يطلع شكله طبيعي, ولو مش متوفر عندك مثبت مكياج ممكن تستخدمي بداله منتج رخيص ومتوفر وهو مية الورد, حطيها في ازازة ببخاخ وبعد ما تحطي مكياجك رشي مية الورد.
7- الكونسيلر عشان تحولي الروج لمات:
ممكن توفري فلوسك وبدل ما تشتري روج مات, ممكن تحولي الروج اللامع اللي عندك لمات بطريقة بسيطة جدا, حطي طبقة من الكونسيلر على شفايفك, وسيبيه لمدة دقيقة لحد ما الشفايف تمتصه كويس, وبعدها حطي الروج بتاعك هتلاقيه اتحول لمات, وهو مش بس دي وظيفته لكن كمان بيساعد حماية الشفايف من الجفاف.
8- اعملي شامبو جاف من النشا:
بدل ما تشتري شامبو جاف, تقدري تعمليه بنفسك بمكونات بسيطة, اخلطي كميات متساوية من النشا والكاكاو, وضيفي لهم كام نقطة من زيت اللافندر, وكده يبقى الشامبو جاهز, بس لو شعرك فاتح او اشقر يبقى متضيفيش كاكاو اكتفي بالنشا وزيت اللافندر بس.
والشامبو ده فعاليتة افضل على الشعر من البيبي بودر لانه بيتكون من حبيبات دقيقة جدا بتساعد على تنضيف الشعر من الزيوت الزيادة.
9- سكراب للجسم:
اكيد عارفين ان في انواع سكراب كتير للجسم معمولة من القهوة بتتباع في السوق, لكن بدل ما تشتريه من بره تقدري تعمليه في البيت بمكونات بسيطة, ممكن تستخدمي قشور الفواكه الحمضية المجففة والمطحونة, الارز, الشوفان, القهوة, وتمزجي المكونات دي مع بعض او تختاري اي مكون منهم وتخلطيهم مع الشاور جل بتاعك وتستخدميه كسكراب, وممكن كمان تضيفي فواكه, او توت, او زيوت اساسية.
ولو مش عايزة تستخدمي كل المكونات دي ممكن تستخدمي وصفة الشوفان المطحون مع ملح البحر والسكر وزيت الزيتون.
10- عشان تحافظي على شفايفك مشرقة:
عشان ترتاحي من مشكلة تلطيخ الروج او انه يتمسح بعد الاكل, ممكن تستخدمي الطريقة دي عشان تخلي شفايفك لونها وردي طبيعي, اخلطي 2 معلقة كبيرة جيلاتين مع مية سخنة, وضيفي لهم كام نقطة من الوان الطعام باللون الاحمر, وقلبيهم مع بعض كويس, حطي الخليط على شفايفك واستني لحد ما ينشف وبعدين قشريه من على الشفايف.
11- غسل فرش المكياج:
عادة فرش المكياج بيكون ليها شامبو او منظف مخصوص, لكن اكيد الميزانية مش ناقصة كمان منظف الفرش, في طريقة سهلة ورخيصة تقدري تعملي بيها منظف للفرش في البيت, دوبي معلقة صغيرة من اي نوع صابون سايل الخاص بغسيل الاطباق في طبق فيه مية فاترة وضيفي لهم معلقة كبيرة خل ابيض, وانقعي الفرش في الخليط ده وبعدين اشطفيها بالمية, هتلاقي الفرش نضفت تماما من اي اثار مكياج وكمان هتحافظ على شكلها.
12- الماسكارا بدل الايلاينر:
مش لازم تشتري ايلاينر جديد لو عندك ماسكارا سودا او ملونة, بس استخدمي فرشة الايلاينر القديم اللي عندك حطيها في الماسكارا وارسمي بيها عينيكي, الماسكارا هتديكي نفس نتيجة الايلاينر.
13- استخدمي نوع برايمر كويس بدل الايشادو الغالي:
برايمر العيون لو من ماركة كويسة ممكن يوفرلك في الفلوس بدل ما تشتري بالتة ايشادو غالية, ممكن تشتري نوع بسعر معقول في حدود ميزانيتك وتستخدمي معاه برايمر نوعه كويس هيديكي نتيجة مثالية جدا وهيثبتلك الايشادو وهيظهر لونه غني ومشرق اكتر.
14- استخدمي التونر كماسك:
ممكن تستخدمي التونر لتخفيف اي ماسك زي ماسك الطين او الماسكات العشبية او اي نوع ماسك بودر, التونر بيساعد على تهدئة البشرة, كمان ممكن تستخدميه مع ال Fabric sheet masks عشان ترطبيه وتفرديه على البشرة.
15- عشان تستهلكي المنتجات لاخر نقطة:
عشان تستهلكي اي منتج كريمي عندك زي معجون الاسنان او ملمع الشفايف لاخر نقطة ممكن تستخدمي بنسة الشعر, حطيها على الانبوبة من تحت وحركيها ناحية فتحة الانبوبة ببطء, كمان ممكن تخرجي كل الليب جلوس من الانبوبة بتاعته باستخدام الفرشة اللي بيكون فيها سفنجة من فوق دخليها في الانبوبة وحركيها هتتفاجئي بكمية الليب جلوس اللي طالعة معاكي في السفنجة.
16- امنعي فقاعات المانيكير:
فقاعات المانيكير اللي ممكن تظهر على الضوافر بتشوه شكل المانيكير بتاعك, واكيد ده مش معناه انك تتخلصي من المانيكير اللي عندك وتجيبي جديد انت ممكن تحلي المشكلة دي بحيلة بسيطة جدا وفعالة, حطي ازازة المانيكير في التلاجة لمدة 15 دقيقة قبل ما تستخدميها هتخلصك من مشكلة الفقاعات.
17- حافظي على فرشة الماسكارا عالية الجودة:
الماسكارا اللي نوعها كويس بتختلف عن الماسكارا اللي جودتها اقل مش بس في التركيبة لكن كمان في جودة الفرشة في شكلها وميلها ونعومة الشعر بتاعها, فلو انتي الماسكارا بتاعتك اللي جودتها كويسة خلصت وميزانيتك مش سامحة تشتري واحدة زيها ممكن تشتري نوع ارخص منها شوية وتستخدمي معاها فرشة الماسكارا القديمة اللي عندك, هنضمن لك ان النتيجة تقريبا هتطلع واحدة ومش هتلاقي اي فرق ملحوظ بين النوعين.