على طريقة Huda beautyازاى الأنف يبان أصغر بالمكياج في 3 خطوات بس

آية حسان

في

1721

كتير من البنات بقوا شاطرين دلوقتى فى المكياج ومالكين أدواته وبيعرفوا يستخدموه كويس، لكن بتفضل مشكلة واحدة بتقابل كتير من البنات حتى المحترفين منهم وهي مشكلة الأنف الكبير او الأنف البارز وبيبقوا مش عارفين ازاى يستخدموا المكياج صح عشان يداروا المشاكل دى او يخلوا الانف يبان اصغر، ورغم انك لازم تبقى عارفه انك دايما جميلة فى كل حالاتك الا اننا هنساعدك بطرق سهلة أوى تخليكي تعرفي ازاى الأنف ممكن يبان اصغر باستخدام المكياج وببساطة ..

على طريقة Huda beauty ازاى الأنف يبان أصغر بالمكياج في 3 خطوات بس

1- الأنف الواسع يبان أرفع :

أول حيلة معانا من حيل ازاى الأنف يبان أصغر بالمكياج هي تظبيط الحواجب بحيث الأنف الواسع يبان أرفع و أضيق، وعلشان تخلي الأنف يبان أضيق وأرفع استخدمنا حيلة ان الحواجب تبان متباعدة أكتر عن بعضها بحيث انك تقللي من طولها من ناحية عضمة الأنف يعنى من الزاوية الداخلية مش من الخارج، ولو مش عايزة تغيري من حواجبك ممكن تخلي شكلها يبان أصغر باسخدام الطرق المختلفة زي التشقير مثلا أو انك تهتمى بنضافة المنطقة دي كويس من أى حبوب أو شوائب و تستخدمى في المكان ده كريم أساس أفتح بسيط أوى من الدرجة اللى بتستخدميها او ممكن بانك تخلطى كريم الأساس بتاعك مع كريم مرطب عشان تفتحيه بسيط وتستخدميه فى المنطقة دي بس أو بانك تستخدمى كمية بسيطة اوى من الكونسيلر و ماتقليش المكان ده من حواجبك على قد ما تقدري علشان يبان شوية في بينهم مسافة.

2- تصغير الأنف :

لو حسيتى انك منطقة نهاية الأنف اللي هي الجزء المدور، هنا استخدمنا الهايلايتر عشان نبين المنطقة دي اصغر، ببساطة بدل ما تفردى كمية من الهايلايتر لاخر نقطة من الانف،استخدمى بدل منه البرونزر الدهبي اللى لمعته خفيفة و افردى منه كمية بسيطة اوى على بداية الجزء المدور ده، بالطريقة دي هتجذبي النظر بعيد عن المنطقة دي من الأنف خالص و هتبان اصغر وارفع.

3- تغطية بروز الأنف :

بعد ما تخلصى الكونتور، ضيفي كمية بسيطة أوى من البرونزر على المنطقة البارزة اللى انتى شايفاها، ورغم انه هيكون في شادو بسيط للبرونزر الا انه هيخلي أنفك يبان أرفع للعين ومستقيم أكتر، بعد كده ضيفي الهايلايتر على نهاية طرف الأنف عشان تلفتى النظر بعيد عن البروز.