10 ستايلات شعر تريندي لخريف وشتا 2018
مع دخول كل موسم جديد بتظهر ستايلات وتريندات جديدة مناسبة للوقت, وفي موسم الخريف والشتا هنلاقي مجموعة ستايلات مختلفة للشعر سواء في القصة اواللون, والنهاردة هنشوف مع بعض 10 ستايلات شعر تريندي للخريف والشتا في 2018.
ستايلات شعر تريندي للخريف والشتا:
1- ستايل ضفيرة ال DNA:
الضفاير فضلت موضة لفترة كبيرة جدا ومن زمان وهي تعتبر تريند كل سنة ومش بتبطل لكن بيدخل عليها شوية تغييرات وتجديدات وبقت مختلفة عن الضفيرة التقليدية, ومن الستايلات الموضة للضفيرة لموسم الخريف والشتا هي ستايل ال DNA وهي زي ما باين قدامنا في الصورة كده, الشعر بيتعمل ديل حصان وتقسمية تلات خصل وتبدأي تضفريها لحد ما تطلع في الاخر ملفوفة على بعضها بالشكل ده, تقدروا تشوفوا خطواتها بالظبط في الفيديو.
2- ستايل Fringed Bobs:
الشعر القصير الفوضوي مع القصة من الستايلات العصرية الموضة جدا لموسم الخريف والشتا, وممكن تختاري لون شعر مثير للستايل ده, او تختاري الوان ناعمة بطريقة الاومبري بيطلع حلو جدا عليه.
3- اللون البني الشوكولاتة:
اللون البني الشوكولاتة هيكون من الالوان التريندي جدا لموسم الخريف والشتا, كمان الخصلات الكستنائي واللون الكهرمان الاصفر هيكون اختيار حلو جدا لو عايزة تدي شعر ستايل مميز ومختلف, ممكن كمان تغيري شوية وتعملي اللون البني البرونز او تلعبي باللون وتدخلي درجات مختلفة حسب لون بشرتك, يعني باختصار اللون البني الشوكولاتة من الالوان اللي ممكن تلعبي في درجات كتير ليه وتعملي لوك مميز ومختلف بيه.
4- توكة Claw Clips:
الستايل ده من التوك كان موضة جدا في اواخر التمانينات واول التسعينات, رجع تاني موضة للخريف والشتا ده.
5- جربي الالوان:
كلنا بيجي علينا وقت بنزهق من لون شعرنا وبنبقى عايزين نعمل تغيير جذري وحاجة جديدة ومختلفة, ممكن في الحالة دي تعملي الوان زاهية, ومن اكتر الحاجات التريندي للخريف والشتا ال Prints, Unicorn, Mermaid, pixl, holographic, patterns.
6- الباروكات بألوان جريئة:
الباروكات رجعت موضة تاني وكمان مناسبة جدا لموسم الخريف والشتا لانها بتدي دفا للراس, والباروكة تعتبر اختيار مثالي جدا للبنات اللي مش حابين يغيروا لون شعرهم بشكل جذري او يغيروا في قصته او خايفين يعملوا لون جريء وفي نفس الوقت عايزين يعملوا لوك جديد.
7- ستايل ال Middle part:
فرق الشعر من النص يمكن اختفى شوية بعد ما كان موضة من فترة, لكن رجع تريندي تاني لموسم الخريف والشتا, والتسريحة بتبقى بسيطة وعصرية وانيقة في نفس الوقت, والستايل ده مناسب جدا للوش البيضاوي والمدور.
8- الاكستنشن الطبيعي:
الاكستنشن اختيار مثالي جدا للبنات اللي شعرهم خفيف, وبيشمل الاكستنشن بكل انواعه سواء الدمج, او الشريط, او غيرها من الانواع والاختيار بيعتمد على نوع شعرك والمدة بتاعة الاكستنشن اللي انتي عايزاها, والمتخصص اللي هيركب لك الشعر هو هيديكي كل التعليمات بطريقة العناية بيه وغسيله, ونصايح استخدامه بشكل صح.
9- لون الشعر الرمادي:
اللون الرمادي كان معظم البنات بيخافوا انهم يعملوه عشان ميبينهمش اكبر منه سنهم لانه هو التقليدي او العادي انه لون الشيب, لكن هو من الالوان التريندي جدا لموسم الخريف والشتا للسنة دي.
10- درجات الكستنائي:
من اكتر الالوان المناسبة لموسم الخريف والشتا هي الالوان الدافية والكستنائي بدرجاته كلها من الالوان التريندي جدا زي الكستنائي البارد والعسلي والنحاسي والكراميل والقرفة, والالوان دي بتطلع حلوة جدا مع ستايل الشعر الكيرلي والويفي, ومع الوان الكستنائي الاساسية ممكن تضيفي خصل فاتحة او غامقة هتدي شكل حلو جدا للون وهتظهره اكتر.
احدث قصات الشعر القصيرة ل 2018
