10 طرق لجذب العلاقات الايجابية لحياتك
علاقاتنا بكل حوالينا مهمة جدا عشان نعيش حياة سعيدة ونحس بسلام داخلي ونبقى راضيين عن حياتنا, حتى الدراسات اثبتت ان الاشخاص اللي بيعيشوا حياة اطول واسعد بيكونوا محاطين بشبكة علاقات ايجابية, واكيد مافيش حد اعلى لعدد الاشخاص اللي المفروض يكونوا في حياتك المهم يكونوا الاشخاص الصح, والنهاردة من خلال موضوعنا هنقول لكل بنات حوا 10 طرق لجذب العلاقات الايجابية لحياتك.
طرق لجذب العلاقات الايجابية:
1- اخرجي من المساحات السلبية:
تعبير المساحات السلبية هو تعبير مجازي اللي هيكون معناه ياما انك تخرجي بالفعل من مكان في اشخاص بيصدروا لك طاقة سلبية باي شكل, او انك تبعدي عن المساحة السلبية اللي جوه مخك بمعنى لو بتفكري في افكار سلبية بتضايقك حاولي تبعدي تفكيرك عنها وتشغلي نفسك في حاجة ايجابية مفيدة.
والسلبية هنلاقيها موجودة في كل مكان حوالينا, وهي مش هتضر سعادتك وعلاقاتك فعليا, الا لو فضلتي في الاماكن السلبية, والخروج منها كل مرة اكيد هيختلف حسب الموقف, لكن اعملي كل اللي تقدري عليه عشان تخرجي من اي مكان او موقف سلبي عشان تقدري تجذبي الاشخاص المناسبين لحياتك.
2- اتوقفي عن الشكوى ووقفي اللي حواليكي انهم يشتكوا لك باستمرار:
اكيد كلنا بنحتاج لاشخاص نفضفض معاهم او نطلع اللي جوانا, لكن المشكلة ان ده بيستنزف طاقتنا لو استمر لفترة طويلة, لان صاحب المشكلة مش هو بس اللي بيكون متضايق وحاسس طاقة سلبية, لكن كمان الشخص المستمع للمشكلة او المستقبل كمان بيكون في نفس الوقت وبيحس انه شايل المسئولية مع صاحب المشكلة, عشان كده لازم تحطي حدود لنفسك وللي حواليكي من الشكوى بشكل مستمر, اكيد الفضفضة كويسة ومقبولة ولكن تكون لفترة مش طويلة ويجي بعدها قبول الوضع الحالي او محاولة تغييره باي طريقة مناسبة.
3- حبي نفسك الاول وبعدين انشري الحب على اللي حواليكي:
مش هتقدري ابدا انك تجذبي علاقات ايجابية لحياتك من غير ما تحبي نفسك الاول, بمجرد ما انتي تبقي اولوية في حياتك, ساعتها بس هتقدري تجذبي العلاقات الايجابية اللي تدعمك اكتر في حياتك.
شوفي من هنا 10 طرق تعرفي بيهم اذا كنتي بتحبي نفسك ولا لا..وازاي تتعلمي تحبي نفسك اكتر.
4- افتكري الماضي لكن متفضليش عايشة فيه:
اكيد صعب اننا نتخلى عن الماضي لانه جزء من حياتنا, لكن الحقيقة هو مش المطلوب اننا ننساه, احتفظي بالماضي في ذاكرتك بكل حاجة فيه لانه يعتبر دروس بنتعلم منها لمستقبلنا, لكن في نفس الوقت متفضليش عايشة فيه ومتتقدميش في حياتك ادي لنفسك الحرية وخلي قراراتك في المستقبل تكون معتمدة على الماضي ده ومن اللي اتعلمتيه منه.
5- اعرفي قيمة نفسك:
قوتنا بتيجي من ايماننا وثقتنا بنفسنا واننا نعرف قيمة نفسنا كويس, لما نصدق ان اللي حوالينا مؤمنين بينا وباللي نقدر نعمله, واننا نتخلى عن قوتنا دي حاجة محدش يقدر ياخدها مننا لكن احنا اللي ممكن نسمح ان حد ياخدها مننا او بنقدمها بايدينا.
واكيد اسمعي لاراء اللي حواليكي لكن مش دايما تصدقيه وتاخديه على انه هو الحقيقة, انتي الوحيدة اللي تقدري تعرفي قيمة نفسك ومش هتلاقي ده في راي اي شخص تاني فيكي.
والكلام ده ينطبق على المدح زي النقد, لان اكيد كلنا بنتقبل المدح او الكلام الحلو لكن ده كمان ممكن يديكي احساس زائف او غلط بقيمة نفسك, ومجرد ما تعرفي قيمة نفسك الحقيقية هتجذبي الاشخاص المناسبين لدايرتك او لحياتك.
6- قولي “لا” بشكل ايجابي:
بالرغم ان كلمة “لا” تعتبر كلمة سلبية في معناها, لكن لما تقولي لا لحاجة ده بينقلك لتجربة جديدة, كلمة “لا” هتخليكي تختاري الحاجات المهمة اكتر بالنسبة لك, وتبعدي الحاجات اللي ممكن انها تستنزف طاقتك.
شوفي من هنا 10 طرق تقولي بيهم “لا” من غير ما تحسي بالذنب او بالاحراج وتحافظي على علاقاتك.
7- دوري على السعادة في كل تجربة:
انك تلاقي السعادة في كل تجربة تمري بيها ممكن يكون تحدي صعب, لكن عشان تجذبي الاشخاص المناسبين لحياتك لازم تعملي ده, لان الخلاصة كده الاشخاص الايجابيين بينجذبوا للاشخاص الايجابيين اللي زيهم, عشان كده حاولي دايما تدوري على الجانب المشرق او تبصي لنص الكوباية المليان وتبصي للحلو او الحاجات الايجابية من اي تجربة تمري بيها, لان ده مش هيساعدك بس انك تفكري بشكل احسن, لكن كمان هيجذب الاشخاص الايجابيين لحياتك.
8- اقضي على القلق:
لو بتفكري بقلق ودايما بتحطي نفسك تحت ضغط ده اكيد مش هيخدمك باي شكل ولا هيحل المشكلة, لان القلق هيخليكي متفكريش صح لان في وسط القلق المنطق كله هيخرج من الشباك, وافضل طريقة عشان تقضي على القلق ده انك تبدأي تاخدي خطوات لحل المشكلة, لانك لما تعملي حاجة ده هينقل تفكيرك من القلق لحل المشكلة.
9- خليكي منتبهه لكل لحظة:
انك تكوني منتبهه ومركزة اهتمامك مع الشخص اللي معاكي ده بيدل على اهمية العلاقة, لان اكيد مش انتي الوحيدة اللي بتدوري على علاقة ايجابية, كمان اللي حواليكي بيدوروا على نفس العلاقة, عشان كده لما تقابلي شخص ذهنه حاضر ومركز اهتمامه معاكي ده اكيد هيكون حاجة مميزة في حياتك.
10- خليكي ممتنة وشاكرة:
مافيش طريقة افضل لجذب العلاقات الايجابية اكتر من انك تعيشي في حالة من الامتنان والشكر, الامتنان هيخليكي تقدري العلاقات في حياتك واللي بدورها هتجذب الاشخاص اللي هيكونوا بنفس التفكير لو الامتنان هو الحاجة المشتركة بينكم, لازم تعرفي ان علاقاتك بتخدمك وانتي بتخدميها.
طرق ازاي تتعرفي على الاشخاص مصاصين الطاقة..وازاي تتعاملي معاهم وتحمي نفسك منهم
