ايه هو ال Capsule Wardrobe وازاي تعمليه عشان تخلي دولابك متجدد وعلى الموضة على طول

ريهام محمود
ريهام محمود
3396

اكيد اي بنت بتكون عايزة تطلع كل يوم بلوك حلو وعلى الموضة وزي ما كلنا عارفين كل يوم بتظهر حاجات جديدة والموضة بتتغير وفي موضات بتبطل وبيظهر غيرها, واحنا مع كل التغيير اللي بيحصل مش بنبقى عارفين ازاي نبقى دايما على الموضة من غير ما نحتاج كل شوية نغير دولابنا, وده اللي هنعرفة النهاردة مع بعض هنقول لكل بنات حوا ازاي تخلي دولابك متجدد وعلى الموضة على طول من خلال فكرة ال Capsule Wardrobe او كبسولة الملابس, وايه هي القطع الاساسية اللي المفروض تكون موجودة في دولابك عشان تحققي ده.

ازاي تخلي دولابك متجدد وعلى الموضة:

– تعالوا نعرف الاول ايه هو فكرة ال Capsule Wardrobe؟

الفكرة دي بترجع للستينات, وهي عبارة عن مجموعة قطع اساسية مش بتبطل ابدا مع مرور الوقت وموضتها مش بتتغير, ومجموعة الملابس دي بيدخل فيها الجيبات والبليزر, والسراويل, والبنطلون الجينز, طيب ايه الفكرة ورا ده او الهدف منه؟ اولا انتي تقدري تنوعي ما بين القطع دي وتعملي اكتر من طقم مختلف وتحسي انك عندك هدوم كتير في الدولاب بمجموعة قطع بسيطة, وده هيخلي كمان عندك قطع تنفع لكل مناسبة, مع وجود كمان الاساسيات المحايدة اللي ممكن تعملي بيها لوك سريع مياخدش منك وقت.

والميزة في الفكرة دي انها هتوفرلك في الفلوس والوقت كمان, ومن ناحية تانية مش هتقولي ابدا الجملة المشهورة عند كل البنات “معنديش حاجة البسها”.

– ازاي تعملي ال Capsule Wardrobe:

السر الاساسي في تكوين الدولاب ده هو اختيار الالوان بعناية جدا عشان تقدري انك تعملي اكتر من طقم وتوفقي بين القطع مع بعض بسهولة وتعملي اكتر من لوك مختلف.

 والنصايح دي هتساعدك لتنفيذ الفكرة:

1- لما تيجي تختاري القطع الكلاسيكية ركزي مع القطع اللي مش بتبطل ابدا.

2- دايما حطي في عين الاعتبار ان يكون عندك: فستان اسود قصير او طويل, بليزر اسود, شيميز ابيض, جينز, سروال اسود.

3- ابني نظام الوان معين او لوحة الوان, يعني يكون عندك اساسي لون اسود او ازرق, واختاري لون فاتح زي اللون البيج او الابيض, او ممكن تعملي كوليكشن بقطع بألوان محايدة.

4- مع لوحة الالوان بتاعتك, ممكن تضيفي قطعة مطبوعة باي تصميم تفضليه, ولو انتي بتحبي اللمسة الانثوية اوي ممكن تختاري قطعة دانتيل, ولو بتحبي الستايل البوهو اختاري قطعة بوهو.

5- القطعة اللي تحت دايما اختاريها بألوان محايدة, لان هتقدري تنسقي عليها من فوق الوان ورسومات بسهولة.

6- ضيفي الاكسسوارات عشان تكملي اللوك, واختيار الاكسسوار المعدن يعتبر حل كويس ممكن تختاري ما بين الدهبي او الفضي او النحاسي, والشنطة السودا الكلاسيك تكون قطعة اساسية عندك عشان تمشي على اغلب اللوك اللي عندك, وشنطة تانية صغيرة ممكن تنفع للخروج بالليل او لو خارجة ومش معاكي حاجات كتير وممكن تختاريها بلون محايد فاتح زي البيج.

ازاي تخلي دولابك متجدد وعلى الموضة 1
ازاي تخلي دولابك متجدد وعلى الموضة 1

– القطع الاساسية عشان تكوني الدولاب بتاعك:

زي ما هو قدامنا في الصورة هما 30 قطعة اساسية.

– 14 توب بموديلاته المختلفة ما بين الشيميز, والسويتر, والكارديجان, وغيرها من القطع اللي ممكن تتلبس من فوق.

– 3 فساتين بموديلات مختلفة.

– 2 بنطلون جينز بألوان مختلفة.

– 2 جيبة قصيرة او طويلة حسب انتي بتلبسي ايه.

– 3 ستايلات جاكيت ال Utility جاكيت اللي بيكون عبارة عن جاكيت قماش بزراير وفي الغالب بيكون ليه حزام في النص تلميه على الوسط, وبليزر, وجاكيت جلد.

– 6 شوز بستايلات مختلفة ما بين الفلات, والبوت, شوز بكعب.

دي القطع الاساسية اللي هتكون في الدولاب بتاعك, وتقدري تنسقي بينهم وتعملي اكتر من لوك بال 30 قطعة دول.

ازاي تخلي دولابك متجدد وعلى الموضة 2
ازاي تخلي دولابك متجدد وعلى الموضة 2

– والصور دي هتوضح لنا الفكرة اكتر:

هنا مثلا هنشوف الفستان الاسود ازاي اتلبس ب 5 لوك مختلفين, على بليزر اسود طويل, وبلطو بيج, ولوحده من غير اي حاجة فوقيه, او عليه شال, او مع بليزر قصير ملون, وممكن تلبسي حزام مختلف كل مرة عشان تغيري شكل الفستان زي ما هو باين قدامنا في الصورة, وهي دي الفكرة اننا بالقطع اللي موجودة في الدولاب نقدر ننسقها مع بعض ونعمل اكتر من طقم مختلف.

ازاي تخلي دولابك متجدد وعلى الموضة 3
ازاي تخلي دولابك متجدد وعلى الموضة 3

وهنا ممكن تعملي لوك كلاسيك من القطع دي. يعني ممكن تنسقي البنطلون الاسود مع الشيميز الابيض والبليزر الاسود, او البليزر الاسود مع الفستان الاسود, او البالطو البيج مع الفستان, وهكذا تقدري تبدلي ما بين القطع وتعملي طقم مختلف.

نصايح وحيل موضة وجمال سهلة وبسيطة هتطلعك بأفضل لوك كل يوم

حيل جمالية عشان تطلعي بأحلى لوك
حيل جمالية عشان تطلعي بأحلى لوك

مقالات متعلقه

8 نصايح موضة تعمليهم في الصيف

8 نصايح موضة تعمليهم في الصيف

ازاي تجددي ستايلك في 2023 ، اعرفي القطع التريندي للسنة دي

ازاي تجددي ستايلك في 2023 ، اعرفي القطع التريندي للسنة دي

10 طرق تلبسي بيهم ملابس عصرية وعلى الموضة من غير ما تصرفي فلوس كتير

10 طرق تلبسي بيهم ملابس عصرية وعلى الموضة من غير ما تصرفي فلوس كتير