29 غلطة مكياج مكنتيش تعرفي انك بتقعي فيهم

بقلمريهام محمود فيمكياج visibility14178

غالبا معظم البنات بيكون لازمهم تجارب كتير ووقت طويل قدام المرايا لحد ما يوصلوا للمكياج اللي يناسبهم وبتكوني في النهاية بردو لسه مش راضية عن النتيجة, والانترنت مليان بنصايح وحاجات كتير خاصة بالمكياج والجمال, لكن اكيد مش كل النصايح مناسبة لكل البنات ده بيختلف من حد للتاني, لكن في غلطات مشتركة تقريبا معظم البنات ممكن يكونوا بيقعوا فيها وهي دي اللي بتخلي المكياج يطلع في النهاية بنتيجة غير مرضية, عشان كده النهاردة من خلال موضوعنا هنقول لكل بنات اكتر غلطات مكياج بتقعي فيها عشان تتجنبي تعمليها بعد كده.

اكتر غلطات مكياج بتقعي فيها:

1- غسيل البشرة زيادة عن اللزوم:

تنضيف وغسل الوش يعتبر هو الخطوة الاولى قبل المكياج, لكن اكيد كل واحدة ليها نوع بشرة مختلف, وكمان مع التقدم في السن بيحصل تغيرات على الجلد, فلو حطيتي كريم الاساس وحسيتي بعدها ان بشرتك جافة او فيها قشور, فدي علامة انك تقللي من عدد مرات غسل الوش في اليوم.

ويعتبر عدد المرات المثالية لغسل الوش هي مرتين في اليوم مرة الصبح ومرة بالليل قبل النوم, والافضل انك تستخدمي غسول خفيف على البشرة, لان الزيوت الطبيعية اللي بتفرزها البشرة بتغذي البشرة بشكل طبيعي وبتخليها صحية وبتعمل وظيفتها على بشرتك من غير تدخل الصابون.

اكتر غلطات مكياج بتقعي فيها
اكتر غلطات مكياج بتقعي فيها

2- بتحطي المكياج على بشرة جافة:

انك تحطي المكياج على بشرة جافة دي تعتبر من اكتر الغلطات اللي بتقعي فيها, لان البشرة هتطلع باهتة وجافة ومشققة, عشان كده المرطب ليه دور مهم جدا, لازم تتأكدي انك ترطبي بشرتك كويس وبشكل صح قبل تطبيق المكياج.

اكتر غلطات مكياج بتقعي فيها
اكتر غلطات مكياج بتقعي فيها

3- بتحطي المكياج في اضاءة غلط:

عشان تقدري تحددي ايه المناسب لبشرتك وايه المكياج الصح, في الحالة دي انتي محتاجة تجربيه على بشرتك في الاضاءة الطبيعية, لانك لما هتحطي المكياج في اضاءة مش طبيعية مش هيطلع معاكي مظبوط, عشان كده حاولي تختاري اللي يناسبك في افضل اضاءة ممكنة.

اكتر غلطات مكياج بتقعي فيها
اكتر غلطات مكياج بتقعي فيها

4- بتستخدمي تكنيك غلط في دمج المكياج:

المكياج اكتر بكتير من مجرد اننا نحط بلاشر اونرسم ايشادو وخلاص, حتى لو استخدمتي درجات محايدة هتطلع شكلها مش طبيعي لو طبقتيها بشكل غلط, لان مفتاح المكياج الطبيعي هو اتقان فن الدمج, لازم تتدمجي كل حاجة كويس على البشرة عشان تطلع بشكل طبيعي وميبقاش المكياج عبارة عن خطوط واضحة على الوش شكلها مش حلو.

اكتر غلطات مكياج بتقعي فيها
اكتر غلطات مكياج بتقعي فيها

5- تطبيق الكونسيلر بطريقة غلط:

دايما في اختلاف حوالين اننا نحط كريم الاساس الاول ولا الكونسيلر, لكن المنطقي ان العيوب معظمها بيتغطى بكريم الاساس, عشان كده الافضل اننا نطبق الاول كريم الاساس وبعدين الكونسيلر, لكن لما تعملي كده يبقى لازم تحطي في اعتبارك حاجتين.

– متستخدميش كمية كبيرة من المستحضر في مكان واحد, لان كمية كبيرة من الكونسيلر تحت العين ممكن تبينك اكبر من سنك وكمان هيتكتل ويتشقق تحت العين, الطريقة الصح للكونسيلر انك تحطي كمية بسيطة على العضم اللي تحت العين ودمجه كويس, متحطيهوش بشكل مباشر على الهالات, وممكن تستخدمي طريقة الطبقات يعني حطي كمية بسيطة على العيوب وسيبيها تنشف خالص وبعدين حطي طبقة تانية, وممكن تحطي بودر بين الطبقات عشان تثبتي كل طبقة كويس.

– متستخدميش لون كونسيلر واحد لكل العيوب, الكونسيلر نازل ألوان لاستخدامات مختلفة وكل لون بيداري عيب معين, الكونسيلر الخوخي بيداري اللون الازرق وده يعتبر اللون المثالي للهالات تحت العين, الكونسيلرالاخضر بيداري الاحمرار من البشرة, عشان كده الافضل تستخدمي اللون الاخضر عشان تداري البثور والبقع, والكونسيلر الاصفر هو المناسب لو عايزة تداري عيوب بمساحات كبيرة على البشرة, بمجرد ما تطبقي الكونسيلر باي لون من الالوان كطبقة اولى هتحتاجي تستخدمي بعده كونسيلر مناسب للون بشرتك.

اكتر غلطات مكياج بتقعي فيها
اكتر غلطات مكياج بتقعي فيها

شوفي من هنا نصايح في اختيار الكونسيلر المناسب.

6- بتحطي فونديشن كتير:

الفونديشن الكتير مش هيديكي نتيجة كويسة على بشرتك وهتلاقيه شقق وبقى كيكي, لو بتستخدمي مكياج خفيف ومضغوط مش هتكوني محتاجة انك تحطي كريم الاساس على الوش كله ممكن تستخدميه بس على الخدين والانف وتحت العين, وفي بعض البنات بيستخدموه عشان يغطوا البقع وعيوب البشرة لكن دي وظيفة الكونسيلر مش كريم الاساس.

اتأكدي انك تختاري الدرجة المناسبة للون بشرتك, متستخدميش كريم اساس افتح من لون بشرتك لان ده هيظهر العيوب والخطوط الرفيعة اكتر, عشان كده استخدام درجة كريم الاساس المطابقة للون بشرتك بالظبط هو الحل لبشرة خالية من اي عيوب, ومتنسيش انك تمزجيه على البشرة بشكل كويس, واتأكدي انك تحطيه على رقبتك والودان عشان يبقوا كلهم نفس اللون, لان لون الوش والرقبة لما بيكونوا مختلفين بيبان المكياج انه مش طبيعي.

اكتر غلطات مكياج بتقعي فيها
اكتر غلطات مكياج بتقعي فيها

شوفي من هنا انواع كريم الاساس المناسبة لكل نوع بشرة وازاي تحطيه صح.

7- رسمة الحواجب:

الحواجب مهمة جدا في تحديد الوش واظهار شكل العيون اكتر, الحواجب لو كثيفة اوي او مش مترتبة ومش متنضفة كويس, او رفيعة زيادة عن اللزوم كل ده هيغير شكل وشك تماما, عشان كده مهم جدا ان تنضفي حواجبك بشكل منتظم وتعرفي كمان ايه شكل الحواجب المناسب لشكل وشك.

لما تيجي ترسمي الحواجب بالقلم اتجنبي تماما انك تخلي شكلهم حاد او تخلي في خطوط قاسية, املي فراغات الحواجب بشكل ناعم وطبيعي.

استخدام بودر الحواجب بلون غامق وتطبيقة بفرشة صغيرة, هيكون افضل من القلم هيطلع الحاجب بشكل طبيعي اكتر.

اكتر غلطات مكياج بتقعي فيها
اكتر غلطات مكياج بتقعي فيها

8- الايشادو اللي بيلمع والجليتر:

الايشادو اللي بيلمع ممكن يكون جذاب على العين لكن لو استخدمتيه على الجفن كله ممكن يطلع شكله اوفر اوي, عشان كده الافضل انك تستخدمي الايشادو اللامع على الزاوية الداخلية للعين بس, وباقي الجفن يكون بلون مات, واستخدمي الدرجات النيود او الاغمق من لون بشرتك.

اكتر غلطات مكياج بتقعي فيها
اكتر غلطات مكياج بتقعي فيها

9- استخدام ايلاينر غلط:

الافضل استخدام ايلاينر اسود في حالة بس البشرة السمرا, لان غير كده هيبان اللوك حاد اوي, لو انتي صاحبة بشرة بيضا هيكون افضل لو استخدمتي لون بني, ولو شعرك اشقر وعيونك زرقا يبقى اكيد الايلاينر الاسود لا وتبعدي عنه خالص.

شوية نصايح لما تيجي تختاري الايلاينر:

– دايما اختاري لون افتح للجفن اللي تحت.

رسم الايلاينر على الخط المائي للعين مش فكرة كويسة, بدل كده ممكن تستخدمي قلم بلون نيود ممكن عاجي او بيج او ابيض على خط الماء لانه هيساعد انه يبين العين اوسع.

– عشان تخليه بلوك طبيعي اكتر الافضل ترسمي الايلاينر على ¾ الجفن اللي فوق بس مش الجفن كله.

– عشان متبقاش الرسمة حادة او قاسية اوي ممكن تستخدمي الايلاينر القلم بدل السائل للوك طبيعي اكتر.

اكتر غلطات مكياج بتقعي فيها
اكتر غلطات مكياج بتقعي فيها

10- غلطات الماسكارا:

اولا لازم تستخدمي الماسكارا اللي تكون اغمق من لون حواجبك بدرجتين, متحطيش اكتر من طبقتين ماسكارا عشان هتعمل تكتلات والرموش هتلزق في بعضها, كمان الماسكارا اللي عمرها بيزيد عن 3 او 4 شهور من بداية اول استخدام ليها غالبا بتظهر بشكل مش حلو على الرموش.

متحطيش الماسكارا على رموشك اللي تحت بنفس الطريقة اللي بتستخدميها لرموشك اللي فوق لانها هتعمل تكتلات على الرموش, الافضل تمسكي عصاية الماسكارا بشكل رأسي وتحطي بيها على الرموش اللي تحت.

الماسكارا المضادة للمية ممكن تكون مفضلة لكتير من البنات, لكن المفروض متستخدميهاش على طول لانها بتكون صعبة في ازالتها وده بياثر على صحة الرموش وممكن يسبب تساقطها, ولو انتي عايزة تستخدمي الماسكارا المضادة للمية يبقى اتأكدي انك متستخدميهاش بشكل مستمر ممكن تستخدميها فترة الصيف بس.

اكتر غلطات مكياج بتقعي فيها
اكتر غلطات مكياج بتقعي فيها

11- دمج البرونزر:

البرونزر مش المفروض يتحط على الوش كله, لكن يكون لمسات في مناطق معينة بس عشان تظهرها وتحددها اكتر, وهي عضمة الخد, وعلى الجبهة, والفك, ولو عملتي ده بشكل صح هتلاحظي انك بترسمي شكل 3 على جوانب الوش بالبرونزر.

اكتر غلطات مكياج بتقعي فيها
اكتر غلطات مكياج بتقعي فيها

12- قلم تحديد الشفايف:

تحديد الشفايف بشكل حاد من اسوأ الحاجات اللي ممكن تعمليها في المكياج, لان الشفايف هتطلع في النهاية شكلها مش حلو وكمان لو استخدمتي قلم تحديد بلون اغمق من لون الروج, قلم التحديد مهمته الاساسية تحديد الشفايف بشكل طبيعي عشان تحافظي على الروج منه انه يطلع بره حدود الشفايف مش عشان تعملي خط واضح حوالين الشفايف.

وعشان تحافظي على الروج لفترة طويلة, ارسمي الشفايف بقلم التحديد باللون المناسب للون الروج, وبعدين املي الشفايف كلها بالقلم كقاعدة اساسية للروج وبعدها حطي الروج بتاعك.

اكتر غلطات مكياج بتقعي فيها
اكتر غلطات مكياج بتقعي فيها

13- الوان الروج الغامقة اوي:

اختاري دايما الوان الروج المناسبة للون بشرتك وتكون بألوان طبيعية, وابعدي عن الالوان الغامقة اوي لانها هتبينك اكبر من سنك, ولو حطيتي لون غامق يبقى لازم تتأكدي ان باقي مكياجك يكون بألوان فاتحة.

اكتر غلطات مكياج بتقعي فيها

14- استخدام بودرة كتير:

البودرة اكيد مهمة كلمسة نهائية للمكياج عشان تحافظ عليه فترة اطول, لكن البودرة الكتير بتظهر التجاعيد والخطوط الرفيعة, عشان كده الافضل انك تطبقي البودر على منطقة التي زون بس, وحاولي انك تتجنبيها خالص مع التقدم في السن.

اكتر غلطات مكياج بتقعي فيها

15- استخدام بلاشر زيادة:

اتجنبي انك تحطي كمية بلاشر زيادة عن اللزوم على الخدود, اتأكدي انك تاخدي كمية بلاشر بسيطة على الفرشة لو بتستخدمي بلاشر بودر سايب مش مضغوط اخبطي الفرشة على العلبة عشان تنزلي البلاشر الزيادة قبل ما تطبقيه على الخدود.

اكتر غلطات مكياج بتقعي فيها

16- ابراز اماكن غلط:

متحطيش لون ايشادو واحد على العين كلها, استخدمي دايما الالوان الفاتحة تحت عضمة الحاجب عشان تبرزي العين اكتر, والهايلايت الفضي والدهبي بشكل خاص هيبرز شكل العين جدا مع الشمس والاضاءة الطبيعية.

اكتر غلطات مكياج بتقعي فيها

17- ضوافر بتلمع:

الضوافر الطويلة اوي مع المانيكير الجليتر بيطلع شكلها اوفر جدا ومش حلو, الافضل يكون طول الضوافر مناسب مع لون مانيكير طبيعي, وحافظي دايما على العناية بضوافرك.

اكتر غلطات مكياج بتقعي فيها

18- الشامبو الجاف:

الشامبو الجاف من المنتجات الممتازة جدا اللي بتوفر علينا الوقت والمجهود خصوصا للبنات اللي شعرهم دهني اوي وبيزيت بسرعة ومحتاج غسيل بشكل مستمر, بس لازم تحطيه بشكل صح.

ودي شوية نصايح لما تيجي تستخدمي الشامبو الجاف:

– لما تحطي الشامبو الجاف على الشعر سيبيه شوية لحد ما يمتص كل الزيوت من الشعر, ومتستعجليش وخليكي صبورة شوية قبل ما تتخلصي منه.

– ممكن تستخدميه بعد غسل شعرك بالشامبو العادي على طول, لان استعماله بعد الشامبو على طول هيخلي شعرك يفضل نضيف لاطول فترة.

– مترشيش الشامبو من مسافة قريبة على الشعر, خلي ايدك بعيد عن الشعر بحوالي 6 بوصات دي المسافة المثالية.

– هتكوني محتاجة تغسلي شعرك بعد استخدام الشامبو الجاف من مرة لمرتين, لان تراكمه زيادة عن اللزوم على الشعر ممكن يخلي شكله باهت وجاف.

اكتر غلطات مكياج بتقعي فيها

19- رش برفيوم بكمية كبيرة:

رشة برفيوم واحدة هتكون كافية جدا عشان تخلي الريحة خفيفة وناعمة, لان كتر البرفيوم ممكن يسبب حساسية وصداع ده غير ان الريحة هتكون مزعجة, ممكن تستخدمي ميست الجسم هيكون اختيار افضل واخف.

اكتر غلطات مكياج بتقعي فيها

20- النوم بالمكياج:

لازم تتأكدي قبل ما تنامي انك تشيلي كل المكياج عشان تحافظي على بشرتك صحية, لان النوم بالمكياج ممكن يسبب جفاف البشرة ويخليها معرضة لحب الشباب والالتهابات.

اكتر غلطات مكياج بتقعي فيها

21- النوم على جنبك:

النوم على الضهر مش بس مفيد للعمود الفقري لكن كمان بيساعد على تجنب التجاعيد والخطوط الرفيعة اللي ممكن تتطور لو بتنامي دايما على جنبك, الموضوع بس محتاج شوية ممارسة لحد ما تخلي النوم على الضهر عادة عندك.

اكتر غلطات مكياج بتقعي فيها

شوفي من هنا افضل واسوأ وضعيات النوم وتأثيرهم على صحتك.

22- المكياج الكتير:

المكياج الكتير في النهاية هيطلعك بلوك مش حلو, افتكري دايما ان الجمال في البساطة, لو حاطه ايشادو بألوان زاهية او سموكي يبقى الروج في الحالة دي يكون بألوان نيود اوفاتحة اوطبيعية, لو العكس وحاطه لون روج زاهي يبقى مكياج العيون يكون طبيعي حطي ايلاينر بلون طبيعي وخفيف واظهري العيون بطبقتين ماسكارا.

اكتر غلطات مكياج بتقعي فيها

23- تطابق الوان المكياج مع اللبس:

تطابق الوان المكياج مع اللبس تعتبر مدرسة قديمة في المكياج, وخبراء المكياج بينصحوا ان الافضل لو لابسة حاجة بألوان زاهية يكون المكياج بألوان محايدة, والعكس, ولو لابسة حاجة سوارية فيها لمعة او ميتاليك, يبقى اتجنبي المكياج اللي بيلمع وارسمي عينك سموكي كلاسيكي.

اكتر غلطات مكياج بتقعي فيها

24- استخدام جليتر كتير:

الجليتر اكيد مناسب للسهرات والمناسبات لكن خلي بالك انه ميكونش زيادة عن اللزوم وتخلي وشك كله بيلمع.

اكتر غلطات مكياج بتقعي فيها

25- مكياج العيون والشفايف:

افتكري دايما انك تخلي التركيز على حاجة واحدة بس ياما العيون او الشفايف, لو مكياج العيون بألوان زاهية خلي الشفايف بألوان نيود او محايدة, ولو هتستخدمي روج بألوان زاهية يبقى مكياج العيون يكون طبيعي, لان غير كده اللوك هيطلع في النهاية كارثي.

اكتر غلطات مكياج بتقعي فيها

26- روج زيادة:

الروج اكيد مهم وهو يعتبر اللمسة النهائية اللي بتظهر باقي المكياج, لكن ده مش معناه انك محتاجة كل شوية تحطي منه طول ما انتي بره البيت لان هتلاقي في النهاية اللون بقى زيادة اوي على الشفايف.

اكتر غلطات مكياج بتقعي فيها

27- مش بتستخدمي برايمر:

بدل ما كل شوية تبقي محتاجة انك تصلحي في مكياجك, الافضل انك تستخدمي برايمر قبل المكياج عشان تحافظي على ثباته فترة اطول, وتمنعي لمعان الوش وافراز الدهون.

اكتر غلطات مكياج بتقعي فيها

28- تثبيت مكياج العيون:

عشان تمنعي ال Runny eye وتضمني ان مكياج العيون هيثبت معاكي اطول فترة ومش هيسيح, استخدمي برايمر العين قبل رسم الايشادو.

اكتر غلطات مكياج بتقعي فيها

29- الثقة في صاحبتك انها تعملك مكياجك:

كتير من البنات بيقعوا في الغلطة دي انك تخلي صاحبتك تعملك المكياج, هي اه افضل صاحبة ليكي ومش عايزة تحرجيها او تكسفيها بس لو مش بتعرف تعمل مكياج صح, يبقى متخليهاش تلمس وشك خالص.

اكتر غلطات مكياج بتقعي فيها

– بعض اخطاء المشاهير في المكياج:

اكيد المشاهير مش دايما مكياجهم مثالي هما كمان بيقعوا في غلطات مكياج من اللي احنا قولناها, تعالوا نشوف بعض غلطات للمشاهير في مكياجهم عشان نتعلم منها ونتجنب اننا نعملها, وازاي ممكن تصلحيها لو وقعتي فيها.

1- ديمي لوفاتو: كريم اساس بدرجة غلط:

هنلاحظ هنا انها اختارت درجتين كريم اساس افتح من لون بشرتها وزي ما قولنا ان الدرجة الافتح بتظهر عيوب البشرة اكتر, المفروض هنا عشان تصلح اللوك تستخدم بلاشر بلون غامق على عضمة الخدين والجبهة عشان تدي دفء للوش, واستخدام سفنجة رطبة والضغط على الجلد من غير مسح هيساعد انه يظهر بشرتك بشكل طبيعي.

اكتر غلطات مكياج بتقعي فيها

2- كيم كارداشيان: ماسكارا زيادة:

الماسكارا الزيادة هتطلع الرموش فيك اوي ومش جذابة, زي ما قولنا متستخدميش اكتر من طبقتين من الماسكارا, واستخدمي انواع الماسكارا الخفيفة, ولو عايزة تصلحي الرموش اللي بالشكل ده استخدمي فرشة وسرحي بيها الرموش بالراحة عشان تتخلصي من الماسكارا الزيادة.

اكتر غلطات مكياج بتقعي فيها

3- ريبيكا روميجن: قلم تحديد غامق:

هنا وقعت في غلطة استخدام قلم تحديد غامق عن لون الروج وزي ما احنا شايفين اللوك طالع مش حلو, زي ما قولنا استخدمي قلم تحديد يكون زي لون شفايفك الطبيعية.

اكتر غلطات مكياج بتقعي فيها

4- البلاشر:

الموديل هنا وقعت في غلطة في تطبيق البلاشر انه مش مطبق صح ومش ممزوج كويس على البشرة, اتأكدي انك تستخدمي مع البلاشر فرشة كبيرة وان الشعر بتاعها مش منفصل عن بعضه او رطبه, امسحي البشرة بالتونر وبعدين حطي مرطب وبعده كريم الاساس وسيبيه كام دقيقة قبل ما تحطي البلاشر, حافظي على تنضيف فرش البلاشر دايما, وانه يكون لونه ماشي مع باقي الوان مكياجك.

اكتر غلطات مكياج بتقعي فيها

5- ايفا لونجوريا: استخدمت ايشادو كتير:

مهم انك تتأكدي ان الايشادو اللي بتحطيه الصبح ميكونش بألوان غامقة اوي وكتير, وعشان تصلحي الغلطة دي لو وقعتي فيها, هاتي قطعة قطن وحطي عليها كمية بسيطة من الكريم المرطب او منديل مزيل للمكياج وامسحي بيها الايشادو الزيادة, وبعدها حطي كمية بسيطة من كريم الاساس يكون نفس لون لون بشرتك عشان تهدي لون الايشادو.

اكتر غلطات مكياج بتقعي فيها

6- ليب جلوس سايح:

الكمية الكبيرة من الليب جلوس او الملمع السايح بيدي لوك مش جذاب للشفايف, الافضل حطي طبقة واحدة من زبدة الكاكاو وبعدها حطي روج بلون محايد او طبيعي وبعدها حطي ملمع الشفايف عشان تخليه يثبت فترة طويلة وشكله ميبقاش سايح على الشفايف.

اكتر غلطات مكياج بتقعي فيها

7- نيكول شيرزينجر: حواجب رفيعة زيادة عن اللزوم:

تنضيف الحواجب زيادة عن اللزوم لحد ما تبقى رفيعة اوي بيدي شكل مش حلو للحواجب, وعشان تصلحي الغلطة دي هاتي لون ايشادو مات ولونين يكونوا افتح من لون حواجبك الاصلية بدرجتين وحددي شكل حواجبك اللي انتي عايزاه, وممكن كمان تملي حواجبك بالقلم, لكن خلي بالك ان الرسمة متتلغبطش منك.

اكتر غلطات مكياج بتقعي فيها

8- ايلاينر ملطخ او سايح:

لو جفون عيونك دهنية اومعرضة انها تعرق, الافضل انك تستخدمي طبقة ايشادو كاساس قبل رسم الايلاينر, وممكن تصلحي اللوك بانك تحولي تلطيخ الايلاينر لمكياج عيون سموكي بس ضيفي كمية بسيطة من ايشادو غامق بس اتأكدي ان لون الايشادو نفس لون الايلاينر بتاعك.

اكتر غلطات مكياج بتقعي فيها

9- ايفان راشيل وودز: روج متقشر:

الروج المتشقق او اللي عامل قشور على الشفايف ده سببه ان الشفايف بتكون جافة ومش مترطبة بشكل كويس, وعشان تتجنبي ده حطي طبقة خفيفة من الفازلين او زبدة الكاكاو عشان ترطبي الشفايف.

اكتر غلطات مكياج بتقعي فيها

10- كيلي اوزبورن: كونسيلر واضح:

الغلطة دي ممكن تصلحيها بسهولة بكمية  بسيطة من الكريم المرطب هتصلح لون البشرة وهيديها لون بيج ناعم.

اكتر غلطات مكياج بتقعي فيها

تكنيك الجامسو Jamsu لتثبيت المكياج فترة طويلة

تكنيك الجامسو لتثبيت المكياج