طريقة مكياج عيون انجلينا جولي بالخطوات والصور
لو هنبص على لوك انجلينا جولي ومكياج عيونها هنلاقي انها دايما متمسكة برسمة عين معينة بتظهر بيها في كل اطلالاتها وبتدي عيونها نظرة حلوة جدا وملفتة, ولو انتي بتحبي مكياج عيونها او شكل عينك زيها ونفسك تعملي نفس رسمة عينيها, النهاردة من خلال موضوعنا هنقولك طريقة مكياج عيون انجلينا جولي بالخطوات والصور عشان تقدري تنفذيها بنفسك في البيت بكل سهولة.
طريقة مكياج عيون انجلينا جولي:
اول حاجة بغض النظر عن اللوك او رسمة العين اللي هتعمليها لازم قبل المكياج ترطبي العين وتحطي برايمر كقاعدة اساسية للمكياج, لان ده هيخلي المكياج يتوزع بالتساوي ويبقى شكله ناعم واحلى على العين, ده غير انه هيثبت لفترة اطول.
الحاجات اللي هتحتاجيها:
ايشادو.
ايلاينر.
ماسكارا.
فرش.
رموش صناعية “اختياري”.
الخطوات:
1- الخطوة (1):
غمضي عينك وباستخدام فرشة صغيرة حددي منطقة تنية الجفن, يعني الفرشة يكون مكانها بالظبط لما تحسي بمقلة العين تحتها.
2- الخطوة (2):
خدي ايشادو باللون البني المات وابدأي حطيه على منطقة تنية الجفن اللي احنا حددناها في الخطوة الاولى.
ابدأي امزجيها كويس على تنية الجفن, الاسلوب ده بيساعد على تحديد منطقة التنية وبيبرز العين اكتر.
بالنسبة للجفن كله ممكن تختاري ايشادو بلون محايد يمشي مع اللون اللي انتي اختارتيه لمنطقة تنية الجفن, وهي هنا في اللوك ده استخدمت بودرة شفافة على الجفن كله عشان تبقى طبيعية اكتر وتدي ايحاء ان الجفن مرسوم.
3- الخطوة (3):
خدي نفس الايشادو البني اللي استخدمتيه وحطيه على الجفن اللي تحت, وركزي اكتر على الزاوية الخارجية للعين عشان تعملي لوك ناعم.
ولو اتلغبطي او الرسمة طلعت من بره الجفون ممكن تصلحي اللغبطة باللوس بودر امشي بس على اللغبطة بالفرشة.
متنسيش تملي فراغات الحواجب عشان تظهري شكل العين وتحددي الوش.
4- الخطوة (4):
بمجرد ما تخلصي دمج الايشادو كويس على العين, تقدري دلوقتي تحطي الرموش الصناعية وتقدري تختاري شكل الرموش اللي يريحك, وخطوة الرموش دي اختيارية ممكن تستغني عنها, لكن اكيد الرموش بتظهر العين اكتر.
– نصايح سريعة لتركيب الرموش الصناعية:
اقطعي الرموش لنصين, او لثلث عشان تخلي تركيبها اسهل.
ممكن تحطي طبقة ماسكارا قبل ما تركبي الرموش.
دايما قيسي حجم الرموش على عينيكي, وبعدها تقدري تقطعيها على حسب شكل عينك, ولو لاحظتي بعد ما ركبتي ان في فراغات ما بين رموشك الطبيعية والرموش الصناعية, ممكن تملي الفراغات بايلاينر سائل او جل ده هيخلي الرموش تطلع شكلها طبيعي اكتر.
شوفي من هنا بالخطوات ازاي تركبي الرموش الصناعية.
5- الخطوة (5):
بمجرد ما تخلصي من تثبيت الرموش, حطي الايلاينر بفرشة بزاوية او مدببة, ابدأي الرسمة من الزاوية الخارجية للعين, وامشي بالتدريج لحد ما توصلي للزاوية الداخلية للعين, وخلي الايلاينر قريب جدا من خط الرموش بحيث انها تغطي خط الرموش الصناعية زي ما قولنا عشان تبان طبيعية.
استخدمي ايشادو يكون نفس لون الايلاينر وبالفرشة امشي بيه على خط الايلاينر بتاعك ده هيديه كثافة اكتر, كمان هيثبت الايلاينر بتاعك ويمنع تشققه او تجعده.
6- الخطوة (6):
استخدمي نفس لون الايلاينر اللي استخدميه للجفن اللي فوق, وادمجيه بالفرشة على الجفن اللي تحت.
7- الخطوة (7):
استخدمي اداة تني الرموش عشان تدي طول اكتر للرموش وترفعيهم, وده كمان بيدي وسع اكتر للعين.
حطي الماسكارا على الرموش اللي فوق واللي تحت في كذا طبقة, ممكن تحطي طبقتين او تلاتة من الماسكارا عشان تدي كثافة اكتر لرموشك.
اللمسة النهائية هتكون الروج ممكن تخلي شفايفك بلون روج محايد, او تجربي اللون الاحمر او البينك او السيمون الغامق, وانجلينا جولي معروفة بشفايفها الممتلئة عشان كده في اللوك ده اختارت استخدام لون زاهي وهو اللون البينك عشان تظهر جمال الشفايف.