غلطات دايما بنعملهم واحنا بنغسل البنطلون الجينز

البنطلون الجينز تقريبا ظهر من اكتر 100 سنة وكان هو قطعة اساسية في ملابس الشغل لان خامته او قماشه بيتحمل, لكن في الستينات بدأ البنطلون الجينز يدخل عالم الموضة وبقى منتشر وبقت كل الماركات العالمية بتصنعه وبقى قطعة اساسية في دولابنا كلنا لانه عملي ومريح, وعشان نحافظ على القطعة دي اللي تقريبا كلنا بنستهلكها بشكل يومي لازم نتعامل معاها صح, عشان كده النهاردة من خلال موضوعنا هنقولك اكتر غلطات بتعمليها في غسيل الجينز عشان تتجنبيها وتحافظي على خامة ولون البنطلون زاهي زي اول ما اشترتيه.

غلطات بتعمليها في غسيل الجينز:

الغسيل بالايد:

– لو هتغسلي البنطلون على ايدك الافضل انك تغسليه في البانيو مش في طبق عشان تقدري تفردية كله وميبقاش مكرمش في المية, لما تنقعيه النقع ميكونش اكتر من ساعة واحدة, واخلطي كوباية من الخل مع معلقتين كبار ملح ودوبي الخليط ده في كمية صغيرة من المية قبل ما تنقعي البنطلون, لان الخليط ده هيساعد انه يحافظ على لون البنطلون زاهي وهيمنع نزول اللون.

– متستخدميش مية للغسيل تكون حرارتها اعلى من 105 درجة فهرنهايت “40 درجة مئوية”.

– متستخدميش المسحوق البودر في الغسيل لانه بيخلي القطع المعدنية اللي في البنطلون لونها يبهت, استخدمي نوع منظف سايل او شامبو او صابون.

– استخدمي فرشة ناعمة في دعك البنطلون وركزي على الاماكن اللي فيها بقع, وابدأي من جوه الاول وبعدين من بره, ومتستخدميش طريقة الفرك بالايد خالص استخدمي فرشة ناعمة بس.

– لو بتستخدمي صابون للغسيل متحطيهوش بشكل مباشر على القماش, بدل كده حطيه على الفرشة وادعكي بيها البنطلون.

الغسيل في الغسالة:

بالرغم ان الخبراء بينصحوا ان البنطلون الجينز ميتغسلش في الغسالة لكن احيانا عشان نوفر الوقت والمجهود بنضطر نحطه في الغسالة وعشان تغسليه صح في الغسالة.

– اول حاجة اقلبي البنطلون وفضي الجيوب من اي حاجة.

– اختاري في الغسالة دورة غسيل الاقمشة الحساسة او الناعمة, ومتكونش درجة حرارة المية اكتر من 40 درجة مئوية, وبالنسبة للعصر المفروض ميكونش اكتر من 600 لفة “او الافضل انك تلغي دورة العصر خالص”, درجة الحرارة العالية بتأثر على لون وخامة البنطلون وحتى كمان على الحجم, ولو الغسالة عندك فيها دورة غسيل خاصة بالجينز اظبطيها عليها.

– استخدمي المنظفات السايلة, ضيفي ½ كوباية خل للمية قبل الشطف عشان تحافظي على اللون زاهي.

– اغسلي البنطلون مع قطع ملابس تانية تكون غامقة زي الاسود او الرمادي او الازرق لانها هتساعد على منع اللون ينزل ولون البنطلون يبهت.

التجفيف:

– التجفيف كمان خطوة مهمة جدا بعد الغسيل سواء على الايد او في الغسالة.

– الاقمشة الجينز مش بتحب الضوء القوي ولا درجة الحرارة العالية, يعني انسي دورة التجفيف في الغسالة والشمس, افضل حاجة انك تسيبيه ينشف بشكل طبيعي في مكان ضل بعيد عن اشعة الشمس بشكل مباشر.

– متعصريش الجينز, اتخلصي من كل المية الزيادة بايدك عن طريق الضغط بس من غير عصر.

– افردي النسيج بتاعه.

– قبل ما تنشري البنطلون, افرديه على فوطة على سطح مستوي وابرمي الفوطة عليه من اول الرجل لفوق, واضغطي عليها كويس, بعدها فكيها ونشري البنطلون عادي, الطريقة دي هتخلصك من المية الزيادة وهتخلي وزنه خفيف وهتمنع كمان انه يتكرمش.

نصايح اضافية عشان تحافظي على لون الجينز:

– بشكل عام كل ما قل غسيل البنطلون, كل ما هتفضلي محافظة على لونه اطول فترة, ولو فيه بقعة مثلا عليه ممكن تحاولي تتخلصي من البقعة بس من غير تغسلي البنطلون كله.

– لو عايزة تنضفي البنطلون وتتخلصي من الروايح من غير غسيل, حطيه في كيس بلاستيك وحطيه في الفريزر ليلة كاملة.

– حاولي تستخدمي منظف غسيل مناسب للملابس الغامقة, لانه بيحافظ على الالوان اكتر.

– لو في تفاصيل جلد في البنطلون ممكن تفركيها بكمية بسيطة من الجلسرين عشان تمنعي ان الجلد يتشقق ويقشر.

– لو لقيتي الجينز مكرمش وعايزة تفرديه, رشي عليه شوية مية وطبقيه نصين بالطول, وابرميه, وخزنيه في الدولاب بالطريقة دي عشان تتجنبي الكرمشة.

– في بعض الناس بيغسلوا البنطلون وهما لابسينة يعني بيلموا البانيو مية دافية ويقعدوا فيه وبيستخدموا فرشة لازالة اي بقع, وبعدين يقفوا ويشطفوه بالمية, ويتمشوا لحد ما ينشف, لو قررتي تستخدمي الطريقة دي اكيد متنسيش صحتك وتفضلي في مكان دافي.

11 حيلة تحافظي بيهم على بنطلونك الجينز وتجدديه