بالصور والتفاصيل .. اعرفي موضة الشنط لصيف و خريف 2018

الشنط من أهم القطع اللي لازم تهتمي بيها وتعرفي كل جديد بيخصها، وفي المقال ده هنعرفك على 7 من أهم موضات الشنط في صيف وخريف السنة دي عشان تبقي دايما جاهزة وآخر شياكة، خلينا نبدأ على طول.. 

بالصور والتفاصيل .. اعرفي موضة الشنط لصيف و خريف 2018 

1- الشنطة على شكل بوكس: 

الشنط اللي ليها شكل محدد بتكون مفيدة في انها تبرز الستايل بتاعك وتحسن منه، والشنطة على شكل بوكس شفناها موجودة بشكل كبير في عروض الأزياء العالمية زى عروض أزياء Michael Kors وNatasha Zinko.

2- الشنطة الفرو : 

الفرو مش بس للجاكت والبالطو، لكن كمان الشنطة الفرو هتبقى موضة منتشرة خصوصا مع بداية فصل الخريف و قرب فصل الشتاء،  الشنطة الفرو هتلاقيها مزينة باكتر من شكل اما بالسلسلة الفضية او بالاقفال أو غيرها من إكسسوارات الشنط، بتعتبر قطعة شيك جدا ويفضل تستني و تستخدميها مع ستايلاتك في الشتاء. 

3- الشنطة بإيد قصيرة :

بتعتبركمان من الشنط اللي ليها شكل محدد بس بايد قصيرة، و بتعتبر من أشيك تريندات الشنط فى موسم صيف وخريف السنة دي،  مثالية لخروجة بالليل او لو خارجة مع صحباتك خصوصا لو بتحبي الحاجات البسيطة بعيد عن التفاصيل الكتير، لكن مش عملية أبدا للشغل أو للسفر. 

4- الشنطة الـ Oversized : 

أكتر شنطة عملية ممكن تستخدميها، حجمها الكبير الـ oversized، مناسبة جدا للسفريات القصيرة ومشاوير الشغل كل يوم، تقدرى تحطي فيها ملفاتك المهمة و اللاب توب وشنطة المكياج ومحفظتك وكل حاجة في شنطة واحدة، دي أكتر شنطة عملية ممكن تستخدميها.

5- شنطة برباط : 

الشنطة الي برباط  بتعتبر كمان موضة جديدة لكن هتبقى تريندي جدا وهنشوفها كتير خصوصا مع الفساتين السواريه وفي ستايلات السهرة، وده لأنها بتتعمل من خامات ناعمة زي الساتان وممكن تلاقي منها الدانتيل كمان ، فممكن تبقى اضافة جميلة لدولابك . 

6- شنطة اللوجو : 

الشنطة اللوجو مقصود بيها الشنطة اللي بتبقى منقوشة بلوجو الماركات العالمية زي مايكل كروس أو شانيل، مانقدرش نعتبرها موضة جديدة لكن أكيد موضة مهمة ومكملة معانا في الموضة طول فصول السنة مش بس الصيف والخريف، عشان كده بتعتبر استثمار ناجح جدا عشان هتقدى تلبسيها تقريبا في أي خروجة ومع معظم الستايلات. 

7- شنطة الوسط : 

شنطة الوسط أو شنطة الحزام كمان بتعتبر قطعة عملية وصغيرة، تقدرى تحتفظي فيها بحاجاتك الأساسية بس زي بطاقتك وفلوسك و الموبايل، مناسبة للتمشيات الطويلة أو لو بتعملى رياضة وتجري وفي خروجاتك العفوية مع صحباتك، وبتليق على الستايلات الكاجوال بس. 

شوفي معانا كمان اجدد 13 شنطة من دور الازياء العالمية لموضة ربيع و صيف 2018