اسرار الطبخ من اشهر البلوجرز المتخصصين في الاكل
لو بتحبي الطبخ وعايزة تبقي شاطرة فيه واكلاتك تطلع احلى النهاردة من خلال موضوعنا هنقول لكل بنات حوا مجموعة من اسرار الطبخ من اشهر البلوجرز المتخصصين في الاكل هتخلي الاكلات تطلع احلى ومظبوطة معاكي.
اسرار الطبخ من اشهر البلوجرز:
1- ليه ضروري الخبز في الفرن بدرجة حرارة دقيقة:
ضبط درجة حرارة الفرن مهمة جدا لسماكة وملمس الكيك او المعجنات بشكل عام, لكن بيكون في افران كتير مافيهاش مؤشر دقيق لدرجة الحرارة وبالتالي ممكن تخبزي الحاجة في درجة حرارة اعلى او اقل وتبوظ منك, والحل في الحالة دي انك تشتري ميزان حرارة للفرن عشان تقدري تظبطي درجة الحرارة لكل حاجة.
2- المتخصصين بيستخدموا صيغ للمقادير عشان يفتكروا الوصفة:
الحلوانية المتخصصين دايما بيستخدموا صيغة او نسب للمقادير عشان يفتكروها وتسهل عليهم الوصفة, مثلا المافن بيحتاج بيضة واحدة, وقطعة زبدة, وجزئين او ضعف الكمية سائل.
وممكن تشوفوا جدول النسب ده هيساعدكوا في وصفات الحلويات.
3- ازاي تخلي الفراخ طريه:
عشان تخلي الفراخ Juicy او طرية, انقعيها شوية في مية مالحة تكون دافية قبل ما تقليها.
4- طريقة سهلة لطهي البيض في الميكروويف:
لو مستعجلة وعايزة تعملي وجبة فطار سريعة, اكسري بيضة او اتنين في مج وغطيه وحطيه في الميكروويف لمدة دقيقة واحدة بس.
5- استخدمي السيشوار لتجفيف الفراخ قبل شويها:
لو عايزة جلد الفرخة يبقى مقرمش ولونه دهبي, قبل ما تحطيها في الفرن او تحمريها جففي الفرخة بالسيشوار عشان تسحبي الرطوبة الزيادة من الجلد ده هيساعد انها تاخد اللون الدهبي وهتبقى جاهزة بشكل اسرع, والطريقة دي تنفع مع الديك الرومي والاسماك.
6- طريقة تجميد الشوربات والبقوليات:
عشان توفري في وقتك وتخزني اكل الاسبوع لو بتشتغلي ومعندكيش وقت تطبخي كل يوم, بكل بساطة تقدري تجمدي الاكلات زي الشوربات او البقوليات وهي مطبوخة في اكياس محكمة الغلق وتضغطي عليها كويس عشان تخرجي منها الهوا, وبعدين تقفليها وتكتبي على كل كيس اسم الصنف وتحفظيه في الفريزر, ولما تحتاجي اي صنف خرجيه من قبلها يفك وسخنيه عادي.
7- استخدمي المقص لتقطيع الفراخ:
كلنا متعودين تقريبا على تقطيع الفراخ باستخدام السكينة, لكن في طريقة فعالة اكتر واسرع في التقطيع وهي باستخدام مقص المطبخ, هتقدري تقطعي كل جزء بسهولة وتشيلي حتى الجلد والدهون الزيادة.
8- طريقة سهلة لطهي اللحمة وتحافظي على نسيجها طري وناعم:
اغمسي اللحمة في خليط من النشا وبياض البيض قبل ما تطبخيها هتخلي نسيج اللحمة يبقى طري وناعم, لان المزيج ده بيحافظ على رطوبة سطح اللحمة وبيقلل فرص انها ممكن تتحرق.
كل اللي هتعمليه هتنشفي الاول اللحمة بورق المطبخ وبعدين اغمسيها في الخليط ده وحطيها في التلاجة لمدة 30 دقيقة لساعة, وبعدين طلعيها واغليها في مية وملح لمدة 30 ثانية وبعدين طلعيها وصفيها, تقدري تحفظيها في التلاجة بالحالة دي لاي وقت تاني تعمليها, تسلقيها او تعمليها في الفرن او تحطيها مع الخضار, وممكن تعملي نفس الطريقة مع الفراخ.
9- ازاي تعملي التارت طري من جوه ومقرمش من بره:
عشان تخلي التارت يطلع مظبوط ويبقى طري من جوه واطرافه مقرمشة من بره, استخدمي مكونات باردة, الزبدة الباردة والدقيق البارد والسكر البارد هتخليه يطلع مظبوط معاكي, كمان استخدام المية الباردة في العجن بتساعد على منع ظهور الجلوتين.
10- سر لرز مثالي:
بنات كتير بيفشل معاهم الرز ياما وبيعجن منهم, هنقولك على سر بسيط عشان يطلع معاكي مظبوط, ببساطة بعد ما الرز يشرب ميتة وتوطي عليه النار غطي الحلة بفوطة المطبخ وحطي فوقيها الغطا وسيبيه يستوي, الطريقة دي هتحافظ على الرطوبة جوا الحلة وهتمنع ان الرز يعجن او يبقى كتل وهتلاقي كل رزاية لوحدها بعد ما يستوي.
11- نضفي الجريل بالبصل:
عشان تتخلصي من اي حاجة لازقة في الشواية بعد استخدامها, ببساطة استخدمي البصل, كل اللي هتعمليه اقطعي بصلة لنصين وامسكيها بشوكة وافركي بيها الشبكة بتاعة الشواية وهي سخنة هتلاقيها نضفت وشالت اي حاجة لازقة فيها.
12- طريقة لطهي المكرونة بسرعة:
الطريقة دي للمكرونة او النودلز, حطيها في كيس محكم الغلق فيه مية باردة وسيبيها لمدة ساعة ونص وبعدين طلعيها واسلقيها, الطريقة دي بتخلي المكرونة مرنة ومبلولة وفي نفس الوقت ناشفة شوية ومحتفظه بشكلها, والنشا اللي فيها مش متفعل, وبالتالي لما تيجي تطبخيها مش هتلزق في بعضها من غير حتى ما تضيفي لها زيت ومش هتاخدي معاكي دقيقة واحدة على النار وهتلاقيها استوت.
13- ازاي مقدار البيض بيأثر على المعجنات:
البيض بيأثر على نسيج العجينة من حيث الكثافة والخفة, وطعمه ولونة ورطوبتة, يعني على سبيل المثال لو العجين من غير بيض هتلاقيه مكبوس اوي ولونه باهت, بعكس العجينة اللي فيها بيض هتلاقيها هشة وخفيفة ولونها دهبي اكتر.
14- نصيحة سهلة عشان تحافظي على صدور الفراخ طرية:
عشان صدور الفراخ تبقى طرية وناعمة لو عايزة تشويها في الطاسة على البوتجاز من فوق, قطعيها نصين هتبقى ارق وبالتالي ده هيخليها تستوي بشكل اسرع بالتساوي من غير ما تنشف منك.